Mo̱ Loba e na mbale̱ e?
Jalabe̱ la Bibe̱l
E, Bibe̱l e mabola mboṅ i malee̱ ná Loba e na mbale̱. E mome̱le̱ biso̱ ná di longe dube̱ lasu di be̱nedino̱ Loba, seto̱ omo̱ń a mambo mena badiedi ba bebasi ba malangweano̱ biso̱, nde tongwea na “wasa me̱se̱” na bolane̱ “so̱ṅtane̱” lasu. (Roma 12:1; 1 Yohane 5:20) Ombwea man mato̱ti mena ma se̱medi o Bibe̱l:
Mbadi ńena mambo me̱se̱ me longe̱ o misipo ma te̱mno̱ na o̱da e malee̱ ná Muwekedi e. Bibe̱l e makwala ná: “Ebanja ndabo te̱ e longabe̱ nde na moto; nde nu nu longi mambo me̱se̱ e nde Loba.” (Bonahebe̱r 3:4) To̱ na ne̱ni nin mbale̱ e bo̱bino̱ o so̱ṅtane̱, bamabie̱ jita ba nin wase ba mo̱nge̱le̱ ná nika ńe bonde̱ne̱ bwambi. a
Biso̱ bato ba benama di yabane̱ ńo̱ng’a so̱ṅtane̱ janda la longe̱; to̱ di londe̱ nde ńo̱ng’asu y’eyobo, ni ńo̱ngi mo̱ ńe te̱ nde wa. Ońola nika nde Bibe̱l e makwaleano̱ ońola njai po̱ ńena ni titi ń’eyobo, nde ńa mudī, nik’e bambe̱ pe̱ ńo̱ng’a bia Loba na jowe̱ mo̱. (Mateo 4:4; Bebīsedi 4:11) Ni ńo̱ng’a mudī e si malee̱ buka te̱ ná Loba e, nde e malee̱ pe̱ ná e nde Muwekedi ńe ndolo nu mapule̱ ná di londe̱ ni ńo̱ngi.
Bedinge̱ bena be tilabe̱ bebwea ba mimbu oboso ba ponda be londi ná te̱ite̱i ka nje te̱ be tano̱ be bīsabe̱. Mbadi be bedinge̱ beno̱ te̱ite̱i e mabonde̱ nate̱na mo̱ńmo̱ń ná be si wu na mot’a benama.—2 Petro 1:21.
Batiledi ba Bibe̱l ba ta ba be̱ne̱ so̱ṅtane̱ lena bato ba pond’abu ba si tano̱ ba be̱ne̱. K’eyembilan, o pond’a kwaṅ, bato jita ba ta nde bo̱nge̱le̱ ná wase ńe te̱m nde omo̱ń a ńama po̱, ka njo̱u, ngubu, to̱ ńaka. Nde ke̱ Bibe̱l mo̱ e makwala ná Loba “a pane̱ wase omo̱ń a to̱ lambo.” (Hiob 26:7) Mulemlem pe̱ nde byala ba Yesaya 40:22 o eyeme̱ Bibe̱l e tilabe̱no̱ be makwalano̱ ná wase ńe nde tengiledi. Bato jita ba mo̱nge̱le̱ ná yete̱na batiledi ba Bibe̱l ba we̱li be̱ne̱ ni ńai a so̱ṅtane̱ dinde̱ne̱, ye nde ońolana Loba nde a bīse̱ babo̱ ma mambo.
Bibe̱l e be̱n malabe̱ ma myuedi jita mena me ndutu, ka myuedi mō̱ mena me ná mi bola ná moto a si dube̱ Loba yete̱na a si kusi jalabe̱ lao. K’eyembilan: Yete̱na Loba e ndolo na ngińa, ońola nje take na bobe ba londino̱ o wase e? Ońola nje ebasi e mabolano̱ nde bobe o mulopo ma bola bwam e?—Tito 1:16.
a K’eyembilan, Allan Sandage nu ta nde moto nu mokwe̱ ngengeti a kwali buńa bō̱ jombwea misipo ná: “Ye mba ndutu o dube̱ ná nin o̱da e te̱se̱be̱ nde na mo̱me̱ne̱. Ye̱ke̱i te̱ e te̱se̱be̱ nde. Na si bi nga Loba e to̱ ke̱m, nde ná moto a so̱ṅtane̱ betańsedi ba mambo mena me longe̱, ye bwam o dube̱ ná Mukedi e, buka jo̱nge̱le̱ ná a titi.”
