1. An be alijɛnɛ min kɔnɔ Alako ta fan fɛ, o ye mun lo ye ani an cɛsirinin lo ka mun lo kɛ?

 ALIJƐNƐ dɔ be dugukolo kan bi bi nin na. Mɔgɔw fanin b’a kɔnɔ ani u bolo degunnin lo koɲumankɛ la. Mɔgɔ miliyɔn caaman b’a kɔnɔ ani u be hɛɛrɛ la sɔbɛ la. Minw b’o alijɛnɛ kɔnɔ ka ban, u cɛsirinin lo ka mun lo kɛ? U t’a fɛ ka bɔ yen abada! U b’a fɛ fana mɔgɔ caamanba ka na fara u kan o yɔrɔ ɲumanba la. O ye yɔrɔ juman lo ye? Alijɛnɛ lo Alako ta fan fɛ! a

2. Mun lo b’an kabakoya alijɛnɛ koo la Alako ta fan fɛ?

² Sutana ka duniɲa juguman nin kɔnɔ, faratiw ka ca ani mɔgɔw be ɲɔgɔn kɔniya. Nka kabako lo k’a lɔn ko Jehova ka dɛmɛ barika la, a sagokɛlaw b’a batora hɛɛrɛ la ani u kaan bɛnnin lo (1 Zan 5:19; Yir. 12:12). Duniɲa juguman nin be bɔnɛ min lasera adamadenw ma, kanutigi Ala ɲɛɛ b’o la. O kama, a ye labɛn kɛ walisa a sagokɛlaw latanganin ka to ani u k’a bato ninsɔndiya la. A ka Kuma b’a fɔ k’o alijɛnɛ be i ko “sutura” yɔrɔ ani “nankɔ, jii ka ca yɔrɔ min na.” (Ezayi 4:6; 58:11). Jehova ka dɛmɛ barika la, minw b’o alijɛnɛ kɔnɔ, u ninsɔn diyanin lo ani u latanganin lo laban loon gwɛlɛ nunu na.—Ezayi 54:14; 2 Tim. 3:1.

3. Ezayi sapitiri 65nan dafara cogo di galen?

³ Minw tun bena ɲɛnamaya kɛ alijɛnɛ kɔnɔ Alako ta fan fɛ, Jehova tɛmɛna kira Ezayi fɛ k’a ɲɛfɔ u tun bena ɲɛnamaya kɛ cogo min na. O lakalila Ezayi sapitiri 65nan  kɔnɔ ani o dafara a siɲɛ fɔlɔ la saan 537 ka kɔn Krista tile ɲɛ. O wagati la, Yahutu nimisaninw bɔra jɔnya la Babilɔni ka kɔsegi u wolodugu la. Jehova ye a ka jama duga ani a y’u dɛmɛ u ye Zeruzalɛmu lɔ kokura k’a kɛ dugu cɛɲumanba ye, k’a sɔrɔ a tun halakira. U segira ka Alabatosoba fana lɔ ani k’a kɛ tiɲɛn batoli yɔrɔ ye Israɛl.—Ezayi 51:11; Zak. 8:3.

4. Ezayi sapitiri 65nan dafara cogo di an ka wagati la?

⁴ Ezayi ka kiraya kuma y’a daminɛ ka dafa a siɲɛ filanan na saan 1919, tuma min na Jehova sagokɛlaw hɔɔrɔnyara ka bɔ Babilonɛba la. O kɔ le, u y’a daminɛ ka Jehova bato alijɛnɛ kɔnɔ Alako ta fan fɛ dugukolo kuru bɛɛ kan. Masaya weleweledala kisɛyaninw ye kafo caaman sigi ani u tora k’u jija ka kɛ ni kerecɛn jogow ye. Cɛɛw ni muso minw tun ka fari i ko waraw ani u tun ye kakalaw ye, olu ye “jogokura ta, ka kɛ Ala jaa ye.” (Efɛz. 4:24). Tiɲɛn lo ko Ezayi ye duga minw kofɔ, u caaman bena dafa yɛrɛ yɛrɛ la duniɲa kura nata kɔnɔ le. Nka kabi sisan, an be duga dɔw diyabɔra alijɛnɛ kɔnɔ Alako ta fan fɛ. An k’a filɛ o alijɛnɛ be nɔɔ min to an kan ani fɛɛn min kama an man ɲi ka bɔ a kɔnɔ abada!

MINW BE ALIJƐNƐ KƆNƆ ALAKO TA FAN FƐ, OLU BE COGO DI?

5. Layidu min be sɔrɔ Ezayi 65:13 kɔnɔ, ka kɛɲɛ n’o ye nɛɛma juman lo b’an kan alijɛnɛ kɔnɔ Alako ta fan fɛ?

⁵ U be dumuni ni minni kɛ ka fa. Minw be alijɛnɛ kɔnɔ Alako ta fan fɛ ani minw t’a kɔnɔ, kira Ezayi y’a yira ka gwɛ faranfasi min be u ni ɲɔgɔn cɛ (Ezayi 65:13 kalan). Jehova b’a sagokɛlaw balo koɲuman Alako ta fan fɛ. A b’a ka hakili senu, a ka Kuma ani dumuni caaman di an ma Alako ta fan fɛ walisa an ka se ka “dumuni kɛ, . . . [ka] minni kɛ, . . . [ani ka] nisɔndiya.” (Yirali 22:17 lajɛ). Nka minw tɛ o alijɛnɛ kɔnɔ, “kɔngɔ. . . , [ni] minnɔgɔ. . . , [ani] maloya” be olu la. U wasanin tɛ Alako ta fan fɛ.—Amɔsi 8:11.

6. Ka kɛɲɛ ni Zowɛli 2:21-24 ka fɔta ye, Jehova ye fɛɛn minw di an ma Alako ta fan fɛ, u dɔw ye jumanw ye ani an be se ka nafa sɔrɔ u la cogo di?

⁶ Zowɛli ka kiraya kuma kɔnɔ, a kumana fɛɛn jɔnjɔn dɔw koo la i n’a fɔ suman, diwɛn ani tulu walisa k’a yira ko Jehova b’a tɛgɛ labila k’a sagokɛlaw mako wasa Alako ta fan fɛ (Zowɛli 2:21-24). A be tɛmɛ Bibulu, an ka gafew, an ka site web, lajɛnw ani lajɛnbaw lo fɛ k’o kɛ. An k’a ɲini ka nafa sɔrɔ o labɛnw na loon o loon. O bena a to an be dumuni ni minni kɛ ka fa Alako ta fan fɛ.

7. Mun lo b’a to an “dusu diyanin” lo? (Ezayi 65:14).

⁷ U ninsɔndiyanin lo ani u wasanin lo. Ala sagokɛlaw be “pɛrɛn” ninsɔndiya bolo sabu u dusu fanin lo waleɲumanlɔn na (Ezayi 65:14 kalan). An “dusu diyanin” lo sabu tiɲɛnkalanw b’an jija, Ala ka layiduw b’an dusu saalo ani an ka jigiya basiginin lo koɲuman Krista ka kunmabɔsara kan. N’an be baro kɛ n’an balimaw ye o koow kan, o b’an ninsɔn diya sɔbɛ la!—Zab. 34:9; 133:1-3.

8. Koo jɔnjɔn fila jumanw lo be alijɛnɛ kɔnɔ Alako ta fan fɛ?

⁸ Koo jɔnjɔn fila minw be alijɛnɛ kɔnɔ Alako ta fan fɛ, o ye kanuya ni bɛɛn lo ye. Jehova sagokɛlaw be “ɲɔgɔn minɛ kosɔbɛ” cogo min na bi, o b’a yira  ɲɛnamaya bena kɛ cogo min na duniɲa kura kɔnɔ. O yɔrɔ la, an ka kanuya barika bena bonya ani an kaan bɛnnin bena to kosɔbɛ ka tɛmɛ bi kan (Kɔlɔs. 3:14). Balimamuso dɔ y’a ɲɛfɔ ale ye min kɔrɔsi Jehova Seerew koo la, a siɲɛ fɔlɔ k’u kunbɛn. A ko: “N’ tun t’a lɔn n’ be se ka ninsɔndiya sɔrɔ cogo min na, hali n’ ka denbaya kɔnɔ yɛrɛ. Jehova Seerew lo cɛma n’ siɲɛ fɔlɔ y’a ye mɔgɔw be ɲɔgɔn kanu sɔbɛ la cogo min na.” Mɔgɔ o mɔgɔ b’a fɛ ka ninsɔn diya ani ka wasa sɔbɛ la, a tigi ka ɲi ka na an ka alijɛnɛ kɔnɔ Alako ta fan fɛ. Duniɲamɔgɔw mana min o min miiri an koo la, an be ni tɔgɔ ɲuman ye Jehova n’a sagokɛlaw bɛɛ ɲɛɛ kɔrɔ.—Ezayi 65:15.

9. Layidu juman lo kofɔra Ezayi 65:16, 17 kɔnɔ an ka tɔɔrɔw koo la?

⁹ U hakili siginin lo ani u lafiyanin lo. Ezayi 65:14 b’a fɔ ko minw t’a latigɛ ka don alijɛnɛ kɔnɔ Alako ta fan fɛ, u “dusu kasinin bena kule [ani u] nii tɔɔrɔnin bena kasi kosɔbɛ.” Nka koo minw bɛɛ be Ala sagokɛlaw tɔɔrɔ ani k’u dusu kasi do? Loon dɔ, o “fɔlɔfɔlɔ tɔɔrɔw koo tena to hakili la, u bena tunu ka bɔ [Ala] ɲakɔrɔ.” (Ezayi 65:16, 17 kalan). Jehova bena an ka tɔɔrɔw bɛɛ ban ani a laban, u yɛrɛ tɛna na an hakili la tugun.

10. Sababu min dira i ma ka jɛn n’i balimaw ye, mun na i be Jehova waleɲuman lɔn o kosɔn? (jaa lajɛ fana).

¹⁰ Kabi sisan, n’an be n’an balimaw ye lajɛnw na, an hakili siginin lo ani an tɛ miiri an ka gwɛlɛyaw la, o minw b’an hakili ɲagami. N’an be kanuya, ninsɔndiya, hɛɛrɛ, ɲumanya ani dususuman yira, o be kɛ sababu ye an balimaw fana hakili be sigi. O jogow ye Ala ka hakili senu deen faan dɔw ye (Gal. 5:22, 23). Ka jɛn ni Ala ka ɔriganisasiyɔn ye, o ye dugaba yɛrɛ lo ye! Ala ye layidu ta ko a bena “sankolokura, ni dugukolokura” sigi. Minw be to alijɛnɛ kɔnɔ Alako ta fan fɛ, o layidu bena dafa bɛrɛbɛrɛ u ɲɛɛ na.

11. Ka kɛɲɛ ni Ezayi 65:18, 19 ye, an be alijɛnɛ min kɔnɔ Alako ta fan fɛ, o ka ɲi k’an lasun ka mun lo kɛ?

¹¹ U be Ala waleɲuman lɔn ani ka ɲagali. An be alijɛnɛ min kɔnɔ Alako ta fan fɛ, Ezayi b’a ɲɛfɔ fana fɛɛn min kama an ka ɲi ka “nisɔndiya kosɔbɛ” o kosɔn. Jehova lo y’o alijɛnɛ labɛn an ye (Ezayi 65:18, 19 kalan). A tɛ bari an na k’a ye ko a be tɛmɛ an fɛ ka mɔgɔw dɛmɛ walisa u ka bɔ duniɲa nin ka ngalon diinanw  na ka na alijɛnɛ cɛɲumanin kɔnɔ Alako ta fan fɛ! An be duga minw sɔrɔ sabu an be tiɲɛn sira kan, o b’an ɲagali ani o b’an lasun k’u kofɔ mɔgɔ wɛrɛw ye.—Zer. 31:12.

12. Layidu min be Ezayi 65:20-24 kɔnɔ, i be mun lo miiri o koo la, ani mun na?

¹² An be ni jigiya min ye sabu an be alijɛnɛ kɔnɔ Alako ta fan fɛ, o b’an ninsɔn diya kosɔbɛ ani an be Jehova waleɲuman lɔn fana o kosɔn. Miiri k’a filɛ i bena fɛɛn minw ye ani i bena koo minw bɛɛ kɛ Ala ka duniɲa kura kɔnɔ! Ala ye layidu ta Bibulu kɔnɔ ko: “Denɲɛninsanga tena bɔ yen tugu. Ni mɔgɔkɔrɔba min ma se a ka loon ma, o tena sa fewu.” An “bena soow lɔ ka sigi u kɔnɔ. [Ani ka] ɛrɛzɛnforow bɔ k’u deen dumu.” An “tena sigɛn gwansan tugu” sabu “Masaba yɛrɛ [bena] barika don” an na. A ye layidu ta ko an latanganin bena kɛ, an bena wasa ani an bena kuun bɛrɛ sɔrɔ an ka ɲɛnamaya la. Jehova bena “nimanfɛnw bɛɛ [mako] wasa” ‘sanni an [k’a] wele’ yɛrɛ sabu a b’an kelen kelen bɛɛ makoyaw lɔn.—Ezayi 65:20-24; Zab. 145:16.

13. Mɔgɔw be yɛlɛmani minw kɛ n’u y’a daminɛ ka Jehova bato, o lakalila cogo di Ezayi 65:25 kɔnɔ?

¹³ U be hɛɛrɛ la ani u latanganin lo. Ala ka hakili senu barika la, mɔgɔ minw tun ka fari i ko waraw, olu sera ka yɛlɛmani kabakomanw kɛ (Ezayi 65:25 kalan). Jogo jugu minw tun b’u la, u banbara k’o dabila (Ɔrɔm. 12:2; Efɛz. 4:22-24). Tiɲɛn lo ko Ala sagokɛlaw bele ye mɔgɔ dafabaliw ye ani o kama, an be fili tuma dɔw la. Nka, Jehova ye “adamaden [sifa] bɛɛ” jɛn k’u kɛ kelen ye sabu u b’ale n’u balimaw kanu ani o y’a to bɛɛn ni hɛɛrɛ sɔbɛ be u ni ɲɔgɔn cɛ (Titi 2:11). O ye kabako yɛrɛ lo ye ani Sebagayabɛɛtigi Ala dɔrɔn lo be se k’o kɛ!

14. Ezayi 65:25 dafara cogo di balimacɛ dɔ koo la?

¹⁴ Yala mɔgɔ be se k’a sɔɔn yɛlɛma tiɲɛn tiɲɛn na wa? An ka misali dɔ lajɛ. Sanni kanbele dɔ ka saan 20 sɔrɔ, u tun y’a don kaso la siɲɛ caaman. A tun be kakalayakow ni fariyakow kɛ. U tun y’a don kaso la sabu a ye mobili soɲɛ, a ye mɔgɔw ka daa kari k’u ka minanw cɛ ani ka kojuguba wɛrɛw kɛ. A tun labɛnnin lo kɛlɛ kama tuma bɛɛ. A siɲɛ fɔlɔ ka Bibulu ka tiɲɛnkalanw mɛn ani k’a daminɛ ka taga Jehova Seerew ka lajɛnw na, a lara a la kosɔbɛ ko a ye kuun sɔrɔ a ka ɲɛnamaya la. O ye ka Jehova bato alijɛnɛ kɔnɔ Alako ta fan fɛ. A batizenin kɔ ka kɛ Jehova Seere dɔ ye, tuma caaman na a tun be miiri k’a filɛ cogo min na Ezayi 65:25 ɲɛsinna ale ma. A tun ka fari i n’a fɔ wara, nka a yɛlɛmana ka kɛ i n’a fɔ sagaden, o kɔrɔ, hɛɛrɛmɔgɔ.

15. Mun na an b’a fɛ ka mɔgɔ wɛrɛw weele u ka na fara an kan alijɛnɛ kɔnɔ Alako ta fan fɛ, ani an be se k’o kɛ cogo di?

¹⁵ Ezayi 65:13 be daminɛ ko: “Matigi, Masaba ko.” Vɛrise 25nan be laban nin cogo la: “Masaba le ko ten.” O b’a yira ko a ka layiduw be dafa tuma bɛɛ (Ezayi 55:10, 11). An be alijɛnɛ kɔnɔ ka ban Alako ta fan fɛ. Jehova y’a sagokɛlaw kaan bɛn k’u kɛ denbaya kelen ye, o min ɲɔgɔn tɛ yen duniɲa kuru bɛɛ kɔnɔ. An ye o denbayamɔgɔw ye minkɛ, hɛɛrɛ min be se ka sɔrɔ duniɲa juguman nin kɔnɔ, an be n’o ye ani an latanganin lo (Zab. 72:7). O kama, an b’a fɛ ka mɔgɔ caamanba dɛmɛ u ka na fara an kan. An  be se k’o kɛ, n’an be to k’an jija ka mɔgɔw dɛmɛ u ka kɛ Krista ka kalandenw ye.—Mat. 28:19, 20.

AN BE ALIJƐNƐ MIN KƆNƆ, O NEGE DON TƆƆW LA

16. An be alijɛnɛ min kɔnɔ Alako ta fan fɛ, an be se ka mun lo kɛ walisa k’o nege don mɔgɔw la?

¹⁶ An be alijɛnɛ min kɔnɔ Alako ta fan fɛ, an kelen kelen bɛɛ be se ka koo dɔ kɛ walisa k’o nege don mɔgɔw la. An ka ɲi ka min kɛ, o ye ka Jehova ladegi. A tɛ mɔgɔw waajibiya u ka na a ka ɔriganisasiyɔn kɔnɔ. Nka, a be u “sama” dɔɔni dɔɔni le u ka na ale fɛ (Zan 6:44, Bible senuma; Zer. 31:3). Ni mɔgɔ kɔnɔgwɛw y’a lɔn ko Jehova ye kanutigi Ala ye ani ko a be ni jogo ɲumanba wɛrɛw ye, o b’a to u b’u magwɛrɛ a la. An be alijɛnɛ min kɔnɔ Alako ta fan fɛ, an ka jogo ɲumanw n’an ka kɛwale ɲumanw be se k’o nege don mɔgɔw la cogo di?

17. An be alijɛnɛ min kɔnɔ Alako ta fan fɛ, an be se k’o nege don mɔgɔw la cogo di?

¹⁷ An be alijɛnɛ min kɔnɔ Alako ta fan fɛ, an be se k’o nege don mɔgɔw la cogo minw na, u dɔ ye k’an balima kerecɛnw minɛ ni kanuya ani ɲumanya ye. Galen, a be komi mɔgɔ kura dɔw tun nana lajɛn na Korɛnti kafo kɔnɔ ani u y’a fɔ ko: “Tiɲɛ na, Ala be n’aw ye!” (1 Kor. 14:24, 25; Zak. 8:23). Bi fana, an b’a fɛ ni mɔgɔ kuraw nana an ka lajɛnw na, u ka kɛ n’o miiriya ɲɔgɔn ye. O kama, an ka ɲi ka to ka ladili nin sira tagama: “Hɛrɛ ka to aw ni ɲɔgɔn cɛ.”—1 Tes. 5:13.

18. Mun lo be se ka an ka ɔriganisasiyɔn nege don mɔgɔw la?

¹⁸ An ka ɲi k’an jija tuma bɛɛ ka an balimaw jati i ko Jehova b’u jati cogo min na. O la, an ka to k’u ka jogo  ɲumanw lo filɛ sanni ka sinsin u ka dafabaliyakow kan, o minw bena ban loon dɔ. An ka “hinɛ ɲɔgɔn na ka koɲuman kɛ ɲɔgɔn ye, ka yafa ɲɔgɔn ma” tuma bɛɛ. O la, ni bɛnbaliyako dɔ donna an ni ɲɔgɔn cɛ, an bena se k’o ɲɛnabɔ ni kanuya ye (Efɛz. 4:32). N’an b’o kɛ, mɔgɔ minw b’a fɛ u k’u minɛ o cogo la, a nege bena kɛ olu la ka na fara an kan alijɛnɛ kɔnɔ Alako ta fan fɛ. b

TO ALIJƐNƐ KƆNƆ ALAKO TA FAN FƐ

19. a) Dɔw ye mun lo fɔ u kɔseginin alijɛnɛ kɔnɔ Alako ta fan fɛ? (koorilen nin lajɛ: “ U bɔra ka tila ka kɔsegi”). b) An ka ɲi k’an cɛsiri ka mun lo kɛ? (jaa lajɛ fana).

¹⁹ An be alijɛnɛ min kɔnɔ Alako ta fan fɛ, o ka di an ye yɛrɛ le! A cɛ ka ɲi ka tɛmɛ sanga ni wagati bɛɛ kan ani Jehova sagokɛlaw ma deli ka caya a kɔnɔ ten! Jehova ye o alijɛnɛ min labɛn an ye, an ka to k’a waleɲuman lɔn o kosɔn fɔɔ abada! Mɔgɔ o mɔgɔ b’a fɛ ka lafiya, wasali, hakilisigi ani latangali sɔrɔ, a ka ɲi ka na o alijɛnɛ kɔnɔ Alako ta fan fɛ ani a kana bɔ a kɔnɔ fewu! Nka, an ka ɲi k’an janto an yɛrɛ la sabu Sutana b’a seko bɛɛ kɛra walisa k’an lasun an ka bɔ a kɔnɔ (1 Piyɛri 5:8; Yir. 12:9). An man ɲi k’a to a k’o kɛ. An be alijɛnɛ min kɔnɔ Alako ta fan fɛ, a cɛ ka ɲi, a saniyanin lo ani hɛɛrɛ b’a kɔnɔ. An k’an seko bɛɛ kɛ k’o latanga.