Ke ibuotikọ emi

•  Nso idi utom ete?

•  Nso inam ete enyene ufọn?

•  Mme ete ye nditọ iban

•  Item ẹnọde mme ete

•   Mbemiso eyen fo amanade. Utọ ebe emi edide idahaemi ediwụt utọ ete emi edidide ke ini iso. N̄wed Do Fathers Matter? ọdọhọ ete:

   “Ete eyen emi esin̄wamde n̄wan idịbi esie edep n̄kpọ, esimende enye aka ufọkibọk yak okokụt dọktọ, onyụn̄ etiene enye ekese nte ẹdade kọmputa ẹse nte eyen oro etiede ke esịt idịbi ye nte onyụn̄ en̄wekde. Utọ ete oro esinen̄ede ese aban̄a eka eyen esie ye eyen esie ke enye ama akamana.”

   “N̄koyomke n̄wan mi ekere ke enye ndisan̄a ye idịbi edi mbiomo esie ikpọn̄, ntre mma nsinam se n̄kekeme man n̄wam enye. Ima ikam idiana kiet itịm ubet nsekeyen nnyịn. Ama enen̄ede enem nnyịn ndidiana kiet ntịm n̄kpọ mbon man nsekeyen nnyịn oyoyom ndidi do.”​—James.

   Item Bible: “Ẹkûse ẹban̄a mbubehe mbufo kpọt, edi ẹse ẹban̄a mbubehe mbon en̄wen n̄ko.”​—Philippi 2:4.

•   Ke eyen fo ama akamana. Emekeme ndisimụm eyen fo ubọk onyụn ebre mbre ye enye, ndien oro ayanam eyen fo enen̄ede ama fi. Sin̄wam n̄wan fo kama eyen mbufo. Se afo anamde nte ete eyenen̄ede an̄wam eyen mbufo nte enye osụk okponde. Afo ndinen̄ede mma eyen mbufo oyowụt ke enye edi ata akpan enọ ọnọ fi.

   “Sinam n̄kpọ nte eyenọwọn̄ ndusụk ini. Bre mbre ye eyen mbufo. Nyịme ndinam mme n̄kpọ oro mûkpamaha ndinam. Ti, ke nditọ mbufo ẹdikpep ndima owo ẹto mbufo mme ete ye eka.”​—Richard.

   Item Bible: “Nditọ ẹdi udeme emi otode Jehovah; mfri idịbi edi n̄kpọ eyenutom.”​—Psalm 127:3.

•   Nte eyen fo osụk okponde. Ndụn̄ọde oro ẹnamde owụt ke nditọ emi ẹsikperede mme ete mmọ, ẹsidiọn̄ọ n̄wed, n̄kpọ isọpke ifịna mmọ, isidaha ọkpọsọn̄ ibọk ke idiọkusụn̄ isinyụn idụhe etịme etịme uwem. Da ini nam eyen fo enen̄ede ekpere fi.

   “Eyen mi erenowo ọkọdọhọ ke n̄kpọ kiet emi imọ iditabade ima iwọrọ ikpọn̄ nnyịn edi nneme oro isinemede ke ini iwatde ika ebiet mi oyomde usụn̄ m̀mê enye oro isinemede ke ini udia mbubreyo. Ndusụk mme akpan n̄kpọ oro isinemede esidi ke ini owo mîkekereke-kere. Emi esitịbe, sia imesisio ini itie ye idem nnyịn.”​—Dennis.

   Item Bible: “Ẹtịm ẹkpeme nte mbufo ẹsan̄ade, mbak ẹdisan̄a nte mbon ndisịme edi ẹsan̄a nte mbon ọniọn̄, ẹdedep ifet ẹnọ idem mbufo, koro mme usen ẹdiọkde.”​—Ephesus 5:15, 16.

 Ediwak owo ẹdọhọ ke edi utom ete ndinọ ubon esie se inanade mmọ nnyụn̄ n̄kpeme mmọ, ndien ke utom eka edi ndise mban̄a ufọk. (Deuteronomy 1:31; Isaiah 49:15) Edi mme utom oro ẹsikpụhọde ke ndusụk ubon. Kpa ye oro, mme anam ndụnọde ẹdọhọ ke mme ete ye eka ẹsidiana kiet ẹnam mme n̄kpọ oro anamde ufọk mmọ enem. a

 Judith Wallerstein emi esinamde ndụn̄ọde aban̄a ubon etịn̄ se ikọwọrọde enye emi anamde se itịn̄de emi an̄wan̄a. Enye ewet ete: “Ini moto ọkọtọde eyen mi an̄wan emi edide isua duopeba, enye okoyom yak ete esie esịne ye enye ke ambulance emi ẹkedade ẹmen enye ẹka ufọkibọk, sia enye ama ọdiọn̄ọ ke ete esie eyekeme ndikpeme enye ini oro. Edi ke ufọkibọk, enye okoyom ami ntie n̄kpere imọ ke bed emi enye akanade man ndọn̄ enye esịt.” b

 “Ete ekeme ndikpeme mbon ubon esie onyụn̄ anam n̄kpọ asan̄a ọfọn, edi ndusụk ini ekeme ndisọn̄ mme eka ndinam utọ n̄kpọ oro. Kpa ye oro, se idude edi, nte mme eka ẹsinen̄erede ẹkpan̄ utọn̄ ẹnọ nditọ mmọ ẹnyụn̄ ẹnamde n̄kpọ mbọm mbọm ye mmọ esinam nditọ ẹnen̄ede ẹkpere mme eka mmọ. Ete ye eka ẹsidiana kiet ẹnam utom.”​—Daniel.

 Item Bible: “Eyen mi, bọ ntụnọ usọ, kûnyụn̄ ukpọn̄ ibet uka.”​—Mme N̄ke 1:8.

 Nte ete, nam eyen fo an̄wan okụt nte iren ẹkpenamde n̄kpọ ye enye. Se mme usụn̄ oro enye ekemede ndikpep mme n̄kpọ oro mi:

•   Nte anamde n̄kpọ ye eka esie. Edieke amade onyụn̄ okponode an̄wan fo, eyen fo an̄wan oyokụt ke mme edu oro ẹnen̄ede ẹdi ata akpan edu oro anade mme ebe ẹnyene.​—1 Peter 3:7.

•   Nte anamde n̄kpọ ye enye. Ama okpono eyen fo an̄wan ekpep enye ndikpono idem esie. Se enye edinyụn̄ idoride enyịn iren en̄wen ndinam edi oro.

   Edieke esidụhọde eyen fo kpukpru ini, oro ayanam enye idibatke idemesie ke n̄kpọ oyonyụn̄ anam enye oyom ndidiọn̄ọ nte iren en̄wen ẹdade enye, ndien ndusụk mmọ ẹdinam oro ye idiọk uduak.

   “Edieke ete amade enye esie an̄wan esinyụn an̄wamde enye, iren emi mînyeneke utọ nti edu oro idikemeke ndibian̄a enye.”​—Wayne.