SE BIBLE ETỊN̄DE ABAN̄A
Usion̄o Idịbi
Kpukpru isua, ibat nditọ emi ẹsision̄ode ẹduọn̄ọ awak ebe miliọn 50. Ibat emi awak akan ibat owo emi ẹdude ke ndusụk idụt.
Ndi enyene-idem ekpebiere m̀mê ikpososion̄o idịbi, mîdịghe ndi usion̄o idịbi edi idiọkn̄kpọ?
SE MME OWO ẸDỌHỌDE
Odu nsio nsio n̄kpọ emi ẹsinamde iban ẹsion̄o idịbi. Ndusụk ẹsision̄o idịbi koro n̄kpọ ọsọn̄de, ndusụk ẹsion̄o sia owo emi ekesịnde mmọ idịbi akan̄de, ndusụk ẹsion̄o man ẹkeme ndika ufọkn̄wed m̀mê ndinam utom mmọ; mbon eken ẹsision̄o sia mîyomke eyen-anana-ete. Edi ndusụk owo ẹda usion̄o idịbi nte ata idiọkn̄kpọ. Mmọ ẹda ke n̄wan emi osion̄ode idịbi esịn utom oro Abasi ọnọde enye ndikpeme eyen esịt idịbi oro tutu enye amana.
SE BIBLE ỌDỌHỌDE
Abasi ada uwem ke ọsọn̄urua, akpan akpan uwem owo. (Genesis 9:6; Psalm 36:9) Emi esịne uwem eyen emi osụk ọkọride ke idịbi eka esie. Andiwet Bible kiet ọkọdọhọ ete: “Afo ama ekwi mi ke idịbi eka mi.” Enye ama adian do ete: “Enyịn fo ama okụt mi ke ini n̄kedide ọbọn̄eyen, ndien ẹma ẹwewet kpukpru ndido esie ẹsịn ke n̄wed fo, mbemiso usen emi mmọ ẹkeborode.”—Psalm 139:13, 16.
Ibet emi Abasi ọkọnọde idụt Israel owụt nte enye esede uwem eyen emi mîmanake. Nte esịt esimiade owo emi oyomde ndision̄o idịbi ufen owụt n̄ko nte Abasi esede uwem eyen emi mîmanake. Ibet Abasi ọkọdọhọ ke edieke owo anamde n̄wan idịbi n̄kpọ ndien eyen esịt idịbi esie akpa, ke ẹnyene ndiwot owo oro. (Exodus 21:22, 23) Edi mme ebiereikpe ẹkenyene ndibiere m̀mê owo oro anam n̄kpọ oro ke esịt usua m̀mê ke ndudue.—Numbers 35:22-24, 31.
Abasi ọnọ nnyịn ubieresịt. Edieke esịt ọdọhọde n̄wan okûsion̄o idịbi, ndien enye okop se esịt esie etịn̄de, esịt idimiaha enye ufen. * Edi edieke enye anamde se esịt esie mînyịmeke enye anam, esịt ayamia enye ufen mîdịghe obiom enye ikpe. (Rome 2:14, 15) Ndụn̄ọde kiet emi ẹkenamde owụt ke esịt esinen̄ede etịmede iban emi ẹsion̄ode idịbi, ke mmọ ẹsinyụn̄ ẹnen̄ede ẹfụhọ.
Edi nso ke ẹkpenam edieke n̄wan oyomode ke unana idotenyịn, ndien enye ye ebe esie ẹkere ke mmimọ idikemeke ndibọk eyen oro? Bible ọdọhọ ke Abasi ayan̄wam mbon oro ẹnịmde ibet esie. Psalm 18:25 ọdọhọ ete: “Afo ọyọsọn̄ọ ada ye owo emi ọsọn̄ọde ada; oyonyụn̄ ọfọn ama ye owo eke ọfọnde ama.” Bible ọdọhọ n̄ko ete: “Jehovah [ama] unenikpe, ndien enye idikpọn̄ke mbon emi ẹsọn̄ọde ẹda ye enye.”—Psalm 37:28.
“Ubieresịt mmọ [etiene] mmọ edi ntiense, ndien ke ekikere mmọ, esịt obiom mmọ ikpe mîdịghe etebe mmọ ikpe.”—Rome 2:15.
Nso ke akpanam edieke edide ama osion̄o idịbi?
SE MME OWO ẸDỌHỌDE
Ruth emi ọbọkde nditọ esie ikpọn̄ ọdọhọ ete: “Mma nnyenyene nditọ ita, ndien n̄kekereke ke nyekeme ndikama ọyọhọ inan̄. Edi ke mma n̄kosion̄o eyen oro, esịt ama amia mi ufen nte nyom ndikpakpa.” * Edi, ndi Abasi osụk ekeme ndifen nnọ enye?
SE BIBLE ỌDỌHỌDE
Jesus Christ ama anam nnyịn ifiọk se Abasi ekerede ke ini enye ọkọdọhọde ete: “N̄kedịghe ndikot ndinen owo, edi n̄kedi ndikot mme anamidiọk nte ẹkabade esịt.” (Luke 5:32) Edieke itrede idiọkn̄kpọ emi ikanamde, ikabade esịt, inyụn̄ iben̄e Abasi efen ọnọ nnyịn, enye eyefen ọkpọkọm ikanam ata akamba idiọkn̄kpọ. (Isaiah 1:18) Psalm 51:17 ọdọhọ ete: “O Abasi, afo udusịnke esịt eke obụn̄ọde onyụn̄ anuahade ke ndek.”
Edieke owo akabarede esịt onyụn̄ osụhọrede idem ọbọn̄ akam ọnọ Abasi, Abasi eyefen ọnọ enye onyụn̄ anam esịt ana enye sụn̄. Philippi 4:6, 7 ọdọhọ ete: “Ẹda akam ye n̄kpeubọk ọkọrọ ye ekọm ẹben̄e Abasi se mbufo ẹyomde; ndien emem Abasi emi akande kpukpru ekikere eyekpeme mbufo esịt ye ekikere.” * Ke Ruth ama ekekpep Bible onyụn̄ enen̄ede ọbọn̄ akam ọnọ Abasi, Abasi ama anam enye enyene emem. Enye ama edifiọk ke ‘ata edifen nnọ oto Abasi.’—Psalm 130:4.
“[Abasi] inamke ye nnyịn nte idiọkn̄kpọ nnyịn edide; inyụn̄ inọhọ nnyịn ufen nte ekemde ye mme ndudue nnyịn.”—Psalm 103:10.
^ ikp. 10 Dọkta ndidọhọ ke edieke owo mîsion̄oke idịbi, ke enye m̀mê eyen emi odude enye ke idịbi ekeme ndinyene mfịna, inamke usion̄o idịbi ọfọn. Edi edieke uman otụkde n̄wan ndien ẹkụt ke enye mîkpaha, eyen esie ayakpa, enye ye ebe esie ẹnyene ndibiere se ẹdinamde. Emi iwakke nditịbe aba ke ediwak idụt emi ẹnyenede n̄kpọ, sia mme dọkta ẹsidiọn̄ọ se ẹkpenamde.
^ ikp. 15 Ẹkpụhọ enyịn̄.
^ ikp. 18 Ndifiọk ke Abasi ayanam mme akpan̄kpa ẹset ekeme nditiene nnam owo enyene emem. Kot “Mme Mbụme Ẹtode Mme Andikot” ke Enyọn̄-Ukpeme April 15, 2009, emi enemede mme itie N̄wed Abasi oro ẹwụtde ke Abasi ekeme ndinam eyen emi akakpade eka ke idịbi eset.
