SE BIBLE ETỊN̄DE ABAN̄A
Mbuọtidem
Ndusụk mbon oro ẹsikade ufọkabasi ifiọkke se mbuọtidem edide. Nso idi mbuọtidem, ndien ntak emi anade owo enyene mbuọtidem?
Nso idi mbuọtidem?
SE NDUSỤK OWO ẸDỌHỌDE
Ediwak owo ẹkere ke owo emi enyenede mbuọtidem esinịm kpukpru se ẹkpepde enye—m̀mê n̄kpọ oro enen m̀mê inenke. Ke uwụtn̄kpọ, owo ekeme ndidọhọ ke imenịm ke Abasi odu. Edi edieke ẹbụpde enye ntak emi enye enịmde, enye ọdọhọ ke se ẹkekpepde imọ edi oro toto ke edet iba. Emi ekeme ndinam etie nte ke owo emi enyenede mbuọtidem esinịm se ededi emi ẹkpepde enye.
SE BIBLE ỌDỌHỌDE
“Mbuọtidem edi idotenyịn oro enyenede nsọn̄ọ nte ke se ẹtiede ẹbet eyedi, uyarade oro owụtde ke ata idem n̄kpọ odu okposụkedi enyịn mîkwe.” (Mme Hebrew 11:1) Man idotenyịn owo enyene nsọn̄ọ, ana enye enyene mme n̄kpọ emi anamde enye enyene idotenyịn oro. Ikọ Greek oro ẹkabarede “idotenyịn oro enyenede nsọn̄ọ” owụt ke mbuọtidem idịghe se owo etiede ke idemesie ekere. Ana enye enyene mme n̄kpọ emi anamde enye enyene mbuọtidem.
“Tọn̄ọ nte ẹkebot ererimbot, ẹtịm ẹkụt mme edu [Abasi] oro enyịn mîkwe, oro edi, nsinsi odudu esie ye idaha esie nte Abasi, koro ẹkụt mmọ ebe ke mme n̄kpọ oro enye anamde.”—Rome 1:20.
Ntak emi anade inyene mbuọtidem?
SE BIBLE ỌDỌHỌDE
“Mbuọtidem mîdụhe owo ikemeke nditịm nnem [Abasi] esịt, koro ana owo eke asan̄ade ekpere Abasi enịm ete enye odu ye nte ke enye edi andinọ mbon oro ẹnen̄erede ẹyom enye utịp.”—Mme Hebrew 11:6.
Nte ima iketetịn̄, ediwak owo ẹnịm ke Abasi odu sia se ẹkenyụn̄ ẹkpepde mmọ edi oro. Edi Abasi oyom mbon oro ẹkponode imọ ẹnyene mme n̄kpọ emi anamde mmọ ẹnịm ke imọ mmọdo ye nte ke imama mmọ. Oro anam Bible ọdọhọ inen̄ede iyom enye man itịm ifiọk enye.
“Ẹsan̄a ẹkpere Abasi, ndien enye ayasan̄a ekpere mbufo.”—James 4:8.
Nso ke akpanam man enyene mbuọtidem?
SE BIBLE ỌDỌHỌDE
“Mbuọtidem oto ke n̄kpọ oro ẹkopde.” (Rome 10:17) Ntre, akpa n̄kpọ oro anade anam man ọbuọt idem ke Abasi edi ndikpep Bible man okop se enye etịn̄de aban̄a Abasi. (2 Timothy 3:16) Ndikpep Bible ayanam ọfiọk ibọrọ mbụme emi ediwak owo ẹsibụpde, utọ nte: Anie edi Abasi? Nso inam inịm ke Abasi mmọdo? Ndi enye enen̄ede ekere aban̄a mi? Nso ke enye aduak ndinam ke ini iso?
Mme n̄kpọ oro ẹwụtde ke Abasi odu ẹyọyọhọ ererimbot
Mme Ntiense Jehovah ẹyema ndikpep fi Bible. Nte itịn̄de ke ikpehe Intanet nnyịn, jw.org/efi, “Mme Ntiense Jehovah ẹsima ndikpep mme owo Bible, edi nnyịn isinyịkke owo ndomokiet akabade edi owo Ntiense Jehovah. Utu ke oro, nnyịn imesida ukpono inam owo okụt se Bible etịn̄de, sia owo kiet kiet enyene unen ndimek se enye oyomde ndinịm ke akpanikọ.”
Kpukpru se inemede emi owụt ke edieke oyomde ndinyene ata mbuọtidem, ke ana ada se afo okụtde odomo ye se Bible etịn̄de. Ke ini anamde emi, afo editie nte mbon eyo mme apostle emi Bible ọdọhọde ke mmọ “[ẹkebọ] ikọ Abasi ye ata ọkpọsọn̄ udọn̄, ẹnen̄ede ẹdụn̄ọde N̄wed Abasi ke usen ke usen ẹte ise m̀mê mme n̄kpọ emi ẹdi ntre.”—Utom 17:11.
“Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.”—John 17:3.
Ekeme Ndidi Ayama Mmọ Emi N̄ko
MME N̄WED YE NDIYE N̄KPRI N̄WED
Anie Ekeme Ndibọrọ Mbụme Emi Afịnade Ata Ediwak Owo?
Ndi ekere ke ntaifiọk, mme pastọ, m̀mê Abasi?
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
ESSENTIAL BIBLE TEACHINGS
Abasi Ekere Didie?
Bible ọdọhọ ke Abasi edi Ata Ọkpọsọn̄ m̀mê Abasi Ibom, Andibot, ye Ọbọn̄. Edi ata enyịn̄ esie odu ke Bible ebe utịm ike-7,000.
