SE BIBLE ETỊN̄DE: “Owo eke mîsọpke iyatesịt ọfọn akan ọkpọsọn̄ owo.”—Mme N̄ke 16:32.

NSO KE EMI ỌWỌRỌ? Ọfọn ikpep ndisimụm idem n̄kama ke ini n̄kpọ ayatde nnyịn. Imọfiọk ke n̄kpọ eyetịbe ndusụk ini emi edinamde esịt ayat nnyịn, edi edieke nnyịn mîmụmke idem ikama, imekeme ndiduọ obom inyụn̄ inam se nnyịn mîkpanamke. Ndụn̄ọde oro ẹkenamde ndondo emi owụt ke iyatesịt esinam mme owo ẹtịn̄ m̀mê ẹnam n̄kpọ emi mmọ ẹsituade n̄kpọfiọk nte ini akade.

SE AKPANAMDE: Kpep ndisimụm idem n̄kama man udûnam n̄kpọ emi edituade n̄kpọfiọk. Kpa ye emi ndusụk owo ẹsikerede ke owo emi esiduọde obom edi owo uko, ọfọn idiọn̄ọ ke utọ owo oro inyeneke uko. Bible ọdọhọ ete: “Owo eke mîkarake spirit esie etie nte obio eke ẹwụride, emi mînyeneke ibibene.” (Mme N̄ke 25:28) N̄kpọ kiet emi ekemede ndin̄wam fi okûsọp iyatesịt edi ndifiọk ofụri se iketịbede. Bible ọdọhọ ete: “Ikike owo iyakke enye ọsọp iyatesịt.” (Mme N̄ke 19:11) Ke ini n̄kpọ etịbede, ọfọn ikop edem iba. Emi ekeme ndinam inen̄ede idiọn̄ọ se iketịbede ikûnyụn̄ usọp uyat esịt.

SE BIBLE ETỊN̄DE: “Ẹwụt esịtekọm.”—Colossae 3:15.

NSO KE EMI ỌWỌRỌ? Ẹdọhọ ke mbon emi ẹsiwụtde esịtekọm ẹsikop inemesịt. Idem mbon emi owo mmọ akpade m̀mê mbon emi akamba n̄kpọ atakde mmọ ẹdọhọ ke emi edi akpanikọ. Mmọ ẹdọhọ ke se isin̄wamde mmimọ ika iso ikop inemesịt kpa  ye se itịbede edi ndiwụt esịtekọm mban̄a se mmimọ isụk inyenede utu ke ndikere mban̄a se itakde mmimọ.

SE AKPANAMDE: Kpukpru usen, wet mme n̄kpọ emi anamde esịt enem fi. Inaha edi ikpọ n̄kpọ kpọt. Kere ban̄a n̄kpri n̄kpọ n̄ko, utọ nte inem inem nneme emi ekenemede ye owo fo, nte enyọn̄ eyede ke ini utịn asiahade, ye ndidu uwem n̄kụt usen oro. Mme n̄kpọ emi ẹkeme ndinam fi enen̄ede okop inemesịt edieke ekerede aban̄a mmọ onyụn̄ owụtde esịtekọm aban̄a mmọ.

Afo ndikere mban̄a nti n̄kpọ oro mme ufan fo ye mbonubon fo ẹnamde ẹnọ fi ekeme ndinen̄ede n̄n̄wam fi. Ama okụt n̄kpọ emi enen̄erede ama ke uwem mmọ, nam mmọ ẹdiọn̄ọ. Emekeme nditịn̄ iso ye iso mîdịghe ewet ke leta m̀mê ke fon ọnọ mmọ. Emi ayanam enen̄ede ekpere mme ufan ye mbonubon mbufo onyụn̄ anam okop inemesịt sia amanam n̄kpọ ọnọ mbon en̄wen.—Utom 20:35.

DAHA MBEMISO UTỌK ASIAHADE.

“Nditọn̄ọ en̄wan etie nte owo ndin̄wan̄a mmọn̄ nduọk; ke utọk mîka-isiahake kan̄a, daha.”—MME N̄KE 17:14.

KÛTỊMEDE ESỊT UBAN̄A INI ISO.

“Ẹkûtịmede esịt ẹban̄a n̄kpọn̄, koro n̄kpọn̄ eyenyene editịmede esịt esie. Afanikọn̄ usen ekem ye usen.”—MATTHEW 6:34.

KERE BAN̄A SE OYOMDE NDINAM UTU KE NDINAM N̄KPỌ NTIENE NTE ETIEDE FI KE IDEM.

“Ukeme ukere n̄kpọ eyekpeme fi, mbufiọk oyonyụn̄ ekpeme fi.”—MME N̄KE 2:11.