KE USENUBỌK Wednesday, January 24, 2018, ama enem mbon Bethel Canada ye United States etieti ini ẹketọtde mmọ ke ẹmek Brọda Kenneth Cook, Jr ẹsịn ke Otu Emi Ẹsede Ẹban̄a Utom Mme Ntiense Jehovah.

Brọda Cook akamana ke Pennsylvania, U.S.A, okonyụn̄ okpon do. Eyen klas mmọ ekekpep enye akpanikọ esisịt ini mbemiso enye okụrede ufọkn̄wed sekọndri. Enye akana baptism ke June 7, 1980, onyụn̄ ọtọn̄ọ utom usiakusụn̄ ofụri ini ke September 1, 1982. Ke enye ama akanam utom usiakusụn̄ isua iba, ẹma ẹkot enye Bethel. Enye ọkọtọn̄ọ utom Bethel ke Wallkill ke New York ke October 12, 1984.

Ke isua 25 emi eketienede, Brọda Cook ama anam nsio nsio utom ke itie umịn̄n̄wed ye ke ọfis emi ẹsisede n̄kpọ ẹban̄a mbon Bethel. Enye ọkọdọ Jamie ke 1996. Jamie ama eketiene enye anam utom ke Bethel ke Wallkill. Ke December 2009, ẹma ẹnọ mmọ ẹka Patterson ke New York emi ẹsinịmde ufọkn̄wed esop Abasi. Brọda Cook akakanam utom do ke itieutom emi ẹsibọrọde mme mbụme Bible emi mme owo ẹbụpde. Ekem ẹma ẹfiak ẹkot mmọ ẹnyọn̄ ẹdi Wallkill, edi mmọ ikodụhe do ibịghi. Ke April 2016, ẹma ẹsio mmọ ẹka Brooklyn ke New York. Ke ọfiọn̄ ition ebede, mmọ ẹma ẹwọrọ ẹka ibuot itieutom nnyịn ke Warwick ke New York. Ndien ke January 2017, ẹma ẹmek Brọda Cook andin̄wam Kọmiti Uwetn̄wed Otu Emi Ẹsede Ẹban̄a Utom Nnyịn.