ETE John akana baptism ke isua 60 emi ekebede ke ekpri obio kiet ke Gujarat. Obio emi odu ke India. John ye eka esie ye nditọeka esie ition eken ẹkedi ata mbon Catholic. Mmọ ikamaha nte ete mmọ ekedide Ntiense Jehovah.

Usen kiet, ete John ama ọnọ enye efọkn̄wed ete ada ọkọnọ Brọda kiet ke esop mmọ. John ama ada unan ke nnuenubọk nnasia ini enye okokụbọrede akamba iko atian usenubọk oro. Edi enye ikoyomke ndisịn ete esie utom oro. Ntre enye ama ada ọfọn̄ ọbọp unan oro sia iyịp ke ọkọwọrọ, onyụn̄ emen efọkn̄wed oro adaha ndinọ Brọda oro.

N̄wan Brọda oro ke John ọkọnọ efọkn̄wed oro. Enye n̄ko ekedi Ntiense Jehovah. Ini Sista oro oyomde ndibọ efọkn̄wed oro, enye ama okụt ke John ama ada unan ke nnuenubọk. Sista oro ama ada ibọk emi esiwotde n̄kpri unam udọn̄ọ eyet enye unan esie onyụn̄ ada ọfọn̄ ọbọp. Ekem enye ama esịn tea ọnọ John ọn̄wọn̄. Ofụri emi Sista oro ke otop ikọ Abasi esịn n̄kpri n̄kpri nte enye enemede nneme ye John.

Mfọnido Sista oro ama anam John ọtọn̄ọ ndima Mme Ntiense Jehovah. Enye ama obụp Sista oro m̀mê Jesus edi Abasi, m̀mê akpana mme Christian ẹbọn̄ akam ẹnọ Mary. Sista oro ama ekpep usem Gujarati emi mme John ẹsisemde. Ntre enye ama ada usem oro ọbọrọ mbụme esie ke Bible onyụn̄ ọnọ enye ekpri n̄wed “This Good News of the Kingdom.”

Ke ini John ekemende n̄wed oro okokot, enye ama ọfiọk ke se imọ ikotde edi akpanikọ. Enye ama aka ebịne oku ufọkabasi mmọ okobụp mbụme iba oro enye okobụpde Sista oro. Esịt ama ofụt oku oro tutu enye otop Bible ọtọ John onyụn̄ ofiori ete: “Afo Satan emi! Wụt mi itie emi Bible ọdọhọde ke Jesus idịghe Abasi. Wụt mi itie emi Bible ọdọhọde owo okûtuak ibuot unọ Mary. Ndọhọ wụt mi!” John ikpekereke ke oku mmimọ akpanam n̄kpọ ntre. John ama ọdọhọ enye ete: “Tutu amama udûkwe ikpat mi ke Catholic aba.” John iwahake Catholic aba tọn̄ọ usen oro!

John ama ọtọn̄ọ ndikpep Bible ye Mme Ntiense Jehovah, anam se enye ekpepde, onyụn̄ etiene okpono Jehovah. Ediwak owo ke ubon mmọ ẹma ẹditiene ẹdụk esop Abasi nte ini akakade. Ebe isua 60 tọn̄ọ John akada unan ke nnuenubọk nnasia, edi mbọn unan oro inịmeke tutu emi. Mbọn unan oro esinam enye eti ke ekpri mfọnido akanam imọ idikpono Jehovah.​—2 Cor. 6:​4, 6.