SE MME OWO ẸTỊN̄DE

Ndusụk owo ẹkere ke Paradise idụhe. Mbon en̄wen ẹdọhọ ke Paradise edi ediye in̄wan̄ emi ẹsitopde ke n̄ke, emi nti owo ẹdụn̄de ke nsinsi ẹnyụn̄ ẹnam n̄kpọ emi ọnọde mmọ inemesịt.

SE BIBLE ỌDỌHỌDE

Bible ọdọhọ ke “paradise” edi akpa ebietidụn̄ emi Abasi ọkọnọde owo. Ẹkekot enye In̄wan̄ Eden. (Genesis 2:7-15) Mi ke akpa ete ye eka nnyịn ẹkedụn̄. Bible owụt ke udọn̄ọ m̀mê n̄kpa ikodụhe ke Paradise oro. (Genesis 1:27, 28) Nsọn̄ibuot akanam Abasi ebịn akpa ete ye eka nnyịn efep ke ediye Paradise oro. Edi ediwak ntịn̄nnịm ikọ Bible ẹwụt ke Abasi ayanam Paradise afiak odu man mme owo ẹdụn̄.

NTAK EMI EKPENEN̄EREDE EKERE ABAN̄A EMI?

Edieke Abasi edide Abasi ima, enye iditreke ndinam mbon oro ẹsọn̄ọde ẹda ẹkpono enye ẹdụn̄ ke Paradise. Enye n̄ko ayanam mme owo ẹfiọk se mmọ ẹkpenamde man enye ọdiọn̄ mmọ. Bible ọdọhọ ke Abasi ọyọdiọn̄ fi edieke ekpepde n̄kpọ aban̄a enye onyụn̄ anamde se ekpepde onyụn̄ enịmde mme ewụhọ esie.—John 17:3; 1 John 5:3.

“Jehovah Abasi ọtọ in̄wan̄ ke Eden, . . . onyụn̄ emen owo emi enye okobotde ekesịn do.”—Genesis 2:8.

SE MME OWO ẸTỊN̄DE

Ndusụk owo ẹdọhọ ke Paradise odu ke heaven, ke ini mbon en̄wen ẹdọhọde ke edidu mi ke isọn̄.

SE BIBLE ỌDỌHỌDE

Akpa Paradise emi Abasi ọkọnọde owo okodu mi ke isọn̄. Abasi okobot isọn̄ emi ọnọ owo ndidụn̄ ke nsinsi. Bible ọdọhọ ke Abasi okonyụn̄ obot isọn̄ emi ndidu ke nsinsi. (Psalm 104:5) Enye ọdọhọ n̄ko ete: “Heaven enyene Jehovah, edi enye ada isọn̄ ọnọ nditọ owo.”—Psalm 115:16.

Ntak edi oro Bible ọdọhọde ke Paradise edidu ke isọn̄ emi. Abasi ọyọnọ kpukpru mbon oro ẹdidude ke Paradise nsinsi uwem. Emem ye ifụre oyodu. Ubiak ye ufen ididụhe aba. Ini oro ndien ke mme owo ẹdinen̄ede ẹkop inem utịbe utịbe n̄kpọ emi Abasi okobotde ọyọhọ isọn̄ emi.—Isaiah 65:21-23.

“Ebietidụn̄ Abasi omodu ye owo, . . . n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.”—Ediyarade 21:3, 4.

SE MME OWO ẸTỊN̄DE

Ediwak ido ukpono ẹkpep ke nti owo kpọt ẹdidụn̄ ke Paradise. Edi mme owo idiọn̄ọke se ikpanamde man ẹbat mmimọ nte “nti owo.” Ndusụk owo ẹkere ke se inamde owo edi eti owo edi ndinyụn̄ ntiene n̄ka ufọkabasi nnyụn̄ nsịn idem ke mme edinam ufọkabasi nnyụn̄ ntiene n̄ka akam.

SE BIBLE ỌDỌHỌDE

Bible ọdọhọ ke “ndinen owo” ẹdidụn̄ ke Paradise. Edi anie ke Abasi abat nte edinen? Abasi ibatke owo emi etienede esịn idem ke n̄kpọ ufọkabasi edi mînamke uduak Esie nte edinen owo. Bible ọdọhọ ete: “Nte edifọp uwa ye mme uwa ẹnem Jehovah esịt nte edikop uyo Jehovah? Sese! N̄kopuyo ọfọn akan uwa.” (1 Samuel 15:22) Ke nditịn̄ ibio ibio, “ndinen owo” emi ẹdidụn̄de ke nsinsi ke Paradise ẹdi mbon oro ẹnamde ewụhọ Abasi emi ẹdude ke Bible.

SE AKPANAMDE

Ndinam ewụhọ Abasi idịghe ndinyụn̄ ntiene nsịn idem ke n̄kpọ ufọkabasi. Se afo anamde kpukpru usen ekeme ndidiọk mîdịghe enem Abasi esịt. Edieke etịn̄de enyịn ekpep Bible, ọyọfiọk se akpanamde man enem Abasi esịt. Isọn̄ke ndinem Enye esịt. Bible ọdọhọ ke “mme ewụhọ esie idobike owo mbiomo.” (1 John 5:3) Sia edide emesikop item Abasi, enen̄ede ọdọn̄ Enye ndidiọn̄ fi nnyụn̄ nnam fi odu uwem ke Paradise.

“Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.