Enye Oyom Nnyịn Ikụt Unen
San̄a Kpere Abasi
Enye Oyom Nnyịn Ikụt Unen
EDIMA ete ye eka ẹsinen̄ede ẹyom nditọ mmọ ẹkụt unen, ẹwọrọ n̄kpọ, ẹnyụn̄ ẹkop inemesịt. Kpasụk ntre ke Ete nnyịn eke heaven, Jehovah, oyom nditọ esie ke isọn̄ ẹkụt unen. Enye eteme nnyịn nte ikpokụtde unen ke ntak emi enen̄erede ekere aban̄a nnyịn. Ke uwụtn̄kpọ, kere ban̄a se enye akasiande Joshua, emi ẹwetde ke Joshua 1:6-9.
Kere se iketịbede, nte ẹwụtde ke ndise emi. Ke Moses ama akakpa, Joshua ama akabade obufa adausụn̄ nditọ Israel, emi ẹkedide ediwak miliọn owo. Nditọ Israel ke ẹben̄e idem ndidụk isọn̄ emi Abasi ọkọn̄wọn̄ọde ọnọ mme ete ete mmọ. Abasi ọnọ Joshua item. Joshua edikụt unen edieke enye anamde item emi. Edi item emi idịghe ke ufọn Joshua ikpọn̄. Nnyịn n̄ko imekeme ndikụt unen edieke inamde enye.—Rome 15:4.
Jehovah ọdọhọ Joshua ọsọn̄ ubọk onyụn̄ ọsọn̄ esịt—idịghe ini kiet kpọt, edi ofụri ikata. (Ufan̄ikọ 6, 7, 9) Edi akpanikọ ke oyoyom Joshua enyene uko ye odudu man ada idụt oro usụn̄ uforo uforo odụk Isọn̄ Un̄wọn̄ọ. Edi enye edisan̄a didie inyene uko ye odudu?
Joshua ekeme ndida uko ye odudu nto N̄wed Abasi. Jehovah ọdọhọ ete: ‘Kpeme nyụn̄ nam kpukpru mbet emi Moses owo mi eketemede fi.’ (Ufan̄ikọ 7) Etie nte Joshua enyene ibat ibat n̄wed Bible ke ini emi. * Edi ikpîkpu edinyene Ikọ Abasi idinamke enye okụt unen. Joshua ekenyene ndinam n̄kpọ iba man ọbọ ufọn.
Akpa kan̄a, ana Joshua enen̄ede okot Ikọ Abasi. Jehovah ọdọhọ ete: “Edi kere enye ke uwemeyo ye ke okoneyo.” (Ufan̄ikọ 8) N̄wed ndụn̄ọde kiet ọdọhọ ete: “Abasi okowụk Joshua ete eti Ibet Imọ ebe ke ndikot enye uyo ọwọrọ sụn̄sụn̄ nnọ idemesie m̀mê ‘ndikere mban̄a’ se enye okotde.” Ndikot nnyụn̄ ntie n̄kere Ikọ Abasi kpukpru usen ayan̄wam Joshua ese aban̄a se inade ke iso.
Ọyọhọ iba, Joshua enyene ndinam se enye ekpepde ke Ikọ Abasi. Jehovah ọdọhọ enye ete: “[Kpeme] ndinam kpukpru se ẹwetde ke esịt: koro ntem ke afo edikụt unen ke usụn̄ fo.” (Ufan̄ikọ 8) Ẹdọhọ ke Joshua edikụt unen edieke enye anamde uduak Abasi. Mmọn̄ọ, ndi enyene n̄kpọ en̄wen oro akpanamde enye okụt? Uduak Abasi esikụt unen kpukpru ini.—Isaiah 55:10, 11.
Joshua ama anam item Jehovah. Emi ama anam enye odu uwem ebịghi onyụn̄ okụt unen nte andituak ibuot nnọ Jehovah oro ọsọn̄ọde ada.—Joshua 23:14; 24:15.
Ndi ọdọn̄ fi ndikụt unen nte Joshua okokụtde? Jehovah oyom fi okụt unen. Edi ikpîkpu edinyene Ikọ esie, kpa Bible, ikemke. Christian kiet emi ọsọn̄ọde ada anam n̄kpọ Abasi ke ata ediwak isua ọkọnọ ekikere ete: “Da se okotde ke Bible sịn ke edinam.” Edieke okotde Ikọ Abasi kpukpru ini onyụn̄ anamde se ekpepde, do ke “edikụt unen ke usụn̄ fo” nte Joshua okokụtde.
[Ikọ Idakisọn̄]
^ ikp. 7 Etie nte N̄wed Abasi oro Joshua ekenyenede ekedi n̄wed ition oro Moses ekewetde (Genesis, Exodus, Leviticus, Numbers, ye Deuteronomy), n̄wed Job, ye psalm kiet m̀mê iba.