Ndi Kpukpru Nti Owo Ẹdika Heaven?

KE JESUS ama akadia n̄kpọ ye mme apostle esie ke okoneyo emi ekesierede usen emi ẹkewotde enye, enye ama ọn̄wọn̄ọ ke iyọnọ mmọ itie ke heaven. Enye ọkọdọhọ ete: “Ke ufọk Ete mi ediwak ebietidụn̄ ẹdu. Mîkpedịghe ntre, n̄kpọdọhọ mbufo, koro mmọn̄ nnyọn̄ n̄ka n̄ketịm itie nnịm nnọ mbufo.” (John 14:2) Ntak emi Jesus enịmde itie ọnọ mmọ ke heaven? Nso ke mmọ ẹdinam do?

Jesus okoyom ndinọ mme mbet esie san̄asan̄a utom. Enye ama ọdọhọ mmọ kpasụk ke okoneyo oro ete: “Mbufo ẹdi mmọ emi ẹsọn̄ọde ẹda ye ami ke idomo mi; mmonyụn̄ nnam ediomi ye mbufo, kpa nte Ete mi akanamde ediomi ye ami, kaban̄a obio ubọn̄.” (Luke 22:28, 29) Abasi ama ọn̄wọn̄ọ ọnọ Jesus ke enye edidi Edidem emi edinọde kiet ke otu akakan n̄kpọ emi ubonowo ẹnen̄erede ẹyom—oro edi, eti ukara. Jesus ayanyan̄a mme owo osio ke ukụt, oyonyụn̄ osobo mbon oro ẹtụkde mmọ. Jesus editie ke heaven akara okposụkedi emi mbon oro enye edikarade ẹdidude “tutu esịm utịt isọn̄.”—Psalm 72:4, 8; Daniel 7:13, 14.

Edi Jesus idikarake ikpọn̄. Ntem, enye ama ọn̄wọn̄ọ ke iyọnọ mme apostle imọ itie ke heaven. Mmọ ẹkedi akpa mbon oro ẹkemekde man “[ẹkara] isọn̄ nte ndidem.”—Ediyarade 5:10.

Owo ifan̄ ẹdika heaven? Nte esidide ke ukara ekededi, mbon oro ẹdikarade ke Obio Ubọn̄ Abasi eke heaven iwakke ke ẹmende ẹdomo ye kpukpru owo oro enye edikarade. Jesus ọkọdọhọ mbon oro ẹdikarade ye enye ete: “Ẹkûfehe ndịk, ekpri otuerọn̄, koro Ete mbufo emenyịme ndida obio ubọn̄ oro nnọ mbufo.” (Luke 12:32) “Ekpri otuerọn̄” oro edidi owo 144,000 ke ofụri ofụri. (Ediyarade 14:1) Ibat oro iwakke ke imende idomo ye ata ediwak owo emi ẹdidude nsinsi uwem ke isọn̄ ke ntak emi ẹsọn̄ọde ẹda ẹnọ Obio Ubọn̄ oro.—Ediyarade 21:4.

Ntem, idịghe kpukpru nti owo ẹdika heaven. Apostle Peter eketịn̄ in̄wan̄-in̄wan̄ ntem aban̄a eti Edidem David ete: “David ikọdọkke ikodụk ke heaven.” (Utom 2:34) John Baptist ekedi eti owo. Edi Jesus ọkọdọhọ ke owo idimekke enye etiene akakara ke heaven nte edidem. Jesus ọkọdọhọ ete: “Ke otu mmọ eke iban ẹmande, akananam owo idahake ida emi okponde akan John Andinịm owo baptism; edi owo emi ekpride akan ke obio ubọn̄ heaven okpon akan enye.”—Matthew 11:11.

Ndi Afo Ọyọbọ Utịp Nti Owo?

Nso ke ana owo anam man odu uwem ke isọn̄ ke nsinsi? Jesus ọkọdọhọ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Omokụt do ke ima emi Abasi amade ererimbot anam enye ọnọ kpukpru owo nsinsi uwem, edi mbon oro ‘ẹbuọtde idem’ kpọt ẹdibọ utịp emi.

Nnennen ifiọk anam owo enyene mbuọtidem. (John 17:3) Afo emekeme ndiwụt ke idi eti owo edieke enen̄erede ekpep se Jehovah aduakde aban̄a owo. Yak mbuọtidem anam fi ada se ekpepde esịn ke edinam. Nyụn̄ nen̄ede fiọk ete ke emekeme ndinyene nsinsi uwem.

 [Ekebe ke page 7]

Bible Ọdọhọ Didie?

Mbụme:

Nso isitịbe inọ nti owo ke ini mmọ ẹkpade?

Ibọrọ:

“Ama edi mme akpa-n̄kpa, mmọ ifiọkke baba n̄kpọ kiet.”—ECCLESIASTES 9:5.

Mbụme:

Nso idi idotenyịn nti owo?

Ibọrọ:

“Ini ke edi eke kpukpru mme andidu ke udi editi ẹdikopde [Jesus] uyo ẹnyụn̄ ẹwọn̄ọ ẹdi.” —JOHN 5:28, 29.

Mbụme:

M̀mọ̀n̄ ke ata ediwak nti owo ẹdidụn̄?

Ibọrọ:

“Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—PSALM 37:29.