Wobisabisaa mbabun bi a wɔwɔ America nsɛm faa mpaabɔ ho, na hɔn mu ɔha mu nkyekyɛmu 80 kãa dɛ wɔbɔ mpaa. Naaso hɔn wɔkãa dɛ wɔbɔ mpaa no mpo no, sɛ ekyɛ hɔn dodow no mu ebien a, kortsee na wɔkãa dɛ wɔbɔ mpaa da biara. Bi a hɔn mu bi bisa hɔnho dɛ: ‘Ana mepɛ dɛ moho baa me ntsi na ɔsɛ dɛ mobɔ mpaa anaa siantsir fofor bi so wɔ hɔ?’

•  Ebɛnadze nye mpaabɔ?

•  Ana Nyankopɔn tsie mpaabɔ?

•  Ebɛnadze na mubotum abɔ ho mpaa?

•  Dza w’etsipɛmfo kã

 Mpaabɔ yɛ ɔkwan a yɛfa do nye adze nyina Bɔfo no kasa. Ɔwodze, susu dza iyi kyerɛ ho hwɛ! Jehovah wɔ tum kyɛn nyimpa biara, naaso “ɔnye hɛn mu biara ntamu kwan nnwar.” (Asomafo Ndwuma 17:27) Nokwasɛm nye dɛ, Bible no ma yehu dɛm nsato a ɔyɛ enyigye yi: “Hom ntwe mpin Nyankopɔn, na ɔbɔtwe epin hom.”​—James 4:8.

 Ibesi dɛn atwe epin Nyankopɔn?

•   Ɔkwan kor a ibotum afa do ayɛ dɛm nye dɛ ebɔbɔ mpaa​—iyi nye ɔkwan a efa do nye Nyankopɔn kasa.

•   Ɔkwan fofor so nye dɛ ibosũa Bible no​—iyi nye ɔkwan a Nyankopɔn fa do nye wo “kasa.”

 Sɛ enye Nyankopɔn kasa na ɔno so nye wo kasa​—kyerɛ dɛ sɛ ebɔ no mpaa na isũa Bible no a​—ɔbɔboa ma anyɛnkofa a ɔda ɔwo na Nyankopɔn ntamu no mu aayɛ dzen.

 “Jehovah a enye no bɛkasa​—mekyerɛ dɛ adze nyina do tumfo a enye no bedzi nkitaho no​—yɛ ho kwan kɛse a nyimpa biara botum enya.”​—Jeremy.

 “Sɛ mekã mbrɛ misi tse nka ankasa ho asɛm kyerɛ Jehovah wɔ mpaabɔ mu a, metse nka dɛ mabɛn no kɛse.”​—Miranda.

 Sɛ mpo egye Nyankopɔn dzi​—na ebɔ no mpaa a​—bi a ɔbɛyɛ dzen ama wo dɛ ebɛgye ato mu dɛ otsie wo mpaabɔ. Naaso, Bible no frɛ Jehovah dɛ ‘mpaabɔ tsiefo.’ (Ndwom 65:2) Ɔhyɛ wo nkuran mpo dɛ ‘tow wo dadwen nyina kyen no do.’ Ebɛnadze ntsi a? ‘Osiandɛ ɔdwen woho.’​—1 Peter 5:7.

 Susu iyi ho hwɛ: Ana egye ber nye w’anyɛnkofo a ebɛn hɔn papaapa no kasa mpɛn pii? Ibotum so nye Nyankopɔn akasa mpɛn pii. Bɔ no mpaa aber nyina, na sɛ ereyɛ dɛm so a, fa ne dzin Jehovah no dzi dwuma. (Ndwom 86:​5-7; 88:9) Nokwasɛm nye dɛ, Bible no hyɛ wo nkuran dɛ ‘fua asɔryɛ mu’ anaadɛ mma nngyaa mpaabɔ da.​—1 Thessalonicafo 5:​17.

 “Mpaabɔ yɛ nkɔmbɔ a menye mo sor Egya no bɔ a mekã m’akoma mu nsɛm nyina kyerɛ no.”​—Moises.

 “Mekã me tsirmu nsɛm kyerɛ Jehovah, dɛ mbrɛ mekã me tsirmu nsɛm kyerɛ me maame anaa me nyɛnko berɛbo bi no.”​—Karen.

 Bible no kã dɛ: ‘Adze nyina mu hom mfa mpaabɔ nye nkotoserɛ nye ndaase mma hom ebisadze ndu Nyankopɔn asomu.’​—Philippifo 4:6.

 Aso iyi kyerɛ dɛ ibotum abɔ dza ɔhaw wo no ho mpaa? Nyew! Nokwasɛm nye dɛ, Bible no kã dɛ: “Tow w’adzesoa kyen [Jehovah] do, na obosuo wo mu.”​—Ndwom 55:22.

 Naaso, sɛ erobɔ Nyankopɔn mpaa a, ɔnnsɛ dɛ ekã dza ɔhaw wo no ho nsɛm nkotsee kyerɛ no. Akyerɛbaa bi a wɔfrɛ no Chantelle kã dɛ, “Sɛ mboa nkotsee na dabaa mibisa Jehovah a, nna ɔkyerɛ dɛ mennyɛ nyɛnko papa.” Ɔtoa do dɛ “Metse nka dɛ, ɔsɛ dɛ midzi kan da no ase, na ɔsɛ dɛ meda no ase so wɔ ndzɛmba pii ho.”

 Susu iyi ho hwɛ: Ebɛnadze na Jehovah ayɛ ama wo wɔ w’asetsena mu a w’enyi sɔ? Ana ibotum adwen ndzɛmba ebiasa a Jehovah ayɛ ama wo ndɛ a ibotum ada no ase wɔ ho?

 “Adze ketseketse bi mpo, tse dɛ nhyiren a ɔyɛ fɛw a yɛbɔhwɛ no, botum aka hɛn ma yaabɔ mpaa ada no ase.”​—Anita.

 “Dwendwen abɔdze bi a w’enyi gye ho anaa kyerɛwsɛm bi a ɔka w’akoma papaapa ho, na da Jehovah ase wɔ ho.”​—Brian.