Oho. Yɛtaa yɛ efiefi asɛnka, naaso yɛnngye nndzi dɛ yɛnam ɔno do na yebenya nkwagye. (Ephesusfo 2:8) Ebɛnadze ntsi a?

Hwɛ dɛm ntotoho yi: Fa no dɛ ɔbarimba ɔyamuyiefo bi abɔ anohoba dɛ obiara a obotum akɔ bea pɔtsẽe bi wɔ ber bi a ɔahyɛ mu no, ɔbɛma no akyɛdze bi a ɔsom bo. Sɛ egye ɔbarimba no n’anohoba no to mu ampa ara a, aso ibedzi n’akwankyerɛ no do? Nyew! Mbrɛ ɔtse biara no ebɛkã hokwan a enya yi ho asɛm akyerɛ w’anyɛnkofo nye w’ebusuafo, mbrɛ ɔbɛyɛ a hɔn so wobenya do mfaso. Wɔ dɛm mu mpo no, ɔnnyɛ ɔbarimba no akwankyerɛ do a ibedzi no ntsi na ibenya akyɛdze no. Ibenya akyɛdze no osiandɛ ɔbarimba no pɛ dɛ ɔdze ma wo no ntsi.

Dɛm pɛpɛɛpɛr so na Jehovah Adasefo gye Nyankopɔn n’anohoba a ɔnye onnyiewiei nkwa ma hɔn a wɔyɛ setsie ma no nyinara no dzi. (Romefo 6:23) Yɛbɔ mbɔdzen dɛ yɛnye afofor so bɛkyɛ hɛn gyedzi a yɛwɔ no, a yɛwɔ enyidado dɛ hɔn so benya Nyankopɔn n’anohoba ahorow no do mfaso. Naaso yɛnngye nndzi dɛ ɔnam asɛnka edwuma a yɛyɛ no do na yenya nkwagye. (Romefo 1:17; 3:28) Nokwasɛm nye yi, onyimpa biara nnyi hɔ a obotum ayɛ biribi a ɔkyɛn do a ɔbɛma ɔafata dɛ obenya dɛm nhyira a ɔkyɛn do yi. Osiandɛ “ommfi tsenenee mu ndwuma a yɛayɛ, na mbom ofi noara n’ehumbɔbɔr . . . do gyee hɛn nkwa.”​—Titus 3:5.