Yennyi asɔfo a yetua hɔn kaw wɔ hɛn ahyehyɛdze no mu. Mbom, wɔpaw ahwɛfo a wɔfata dɛ ‘wɔnnyɛn Nyankopɔn asɔr’ anaa asafo no, dɛ mbrɛ nna ɔtse aber a Christianfo asafo no hyɛɛ ase no. (Ndwuma 20:28) Dɛm mpanyimfo yi yɛ mbarimba a hɔnho awea wɔ Nyankopɔn Asɛm mu a wodzi asafo no enyim na wɔhwɛ do, “nnyɛ nhyɛdo, na mbom ɔpɛdo, Nyame-do; nnyɛ edzifodzepɛ ntsi, na mbom adwen a ɔayɛ no krado ntsi.” (1 Peter 5:1-3) Edwuma bɛn na wɔyɛ no wɔ asafo no mu dze boa hɛn?

Wɔdwen hɛnho na wɔbɔ hɛnho ban. Mpanyimfo no fi Kyerɛwnsɛm no mu ma akwankyerɛ na wɔboa asafo no ma wɔnye Jehovah nya ebusuabɔ pa. Osiandɛ mpanyimfo no nyim dɛ Nyankopɔn dze dɛm asodzi kɛse yi ahyɛ hɔn nsa ntsi, wɔnnhyɛ asafo no mufo no do, na mbom wɔboa hɛn ma yedzi yie na hɛn enyi gye. (2 Corinthfo 1:24) Dɛ mbrɛ oguanhwɛfo dwen no guan biara ho yie no, dɛmara so na mpanyimfo no bɔ mbɔdzen dɛ wobohu asafo no munyi biara yie.​—Mbɛbusɛm 27:23.

Wɔkyerɛkyerɛ hɛn mbrɛ yɛbɛyɛ Nyankopɔn n’apɛdze. Mpanyimfo no hwɛ asafo nhyiamu ahorow no do dapɛn biara dze hyɛ hɛn gyedzi dzen. (Ndwuma 15:32) Dɛm mbarimba yi a wɔwɔ ahofama yi dzi asɛnka edwuma no so enyim, wɔnye hɛn bɔ mu yɛ asɛnka edwuma no, na wɔma hɛn ntsetsee wɔ ɔsom edwuma no n’afã ahorow nyinara mu.

Wɔhyɛ hɛn mu biara nkuran. Mbrɛ ɔbɛyɛ a ankorankor biara nye Jehovah benya ebusuabɔ pa no, mpanyimfo no tum sera hɛn wɔ hɛn efie anaa wɔnye hɛn bɔ nkɔmbɔ wɔ Ahendzi Asa do. Wɔ nkɔmbɔ no mu no, wofi Kyerɛwnsɛm no mu boa hɛn na wɔkyekye hɛn werɛ so.​—James 5:14, 15.

Wɔ edwuma a mpanyimfo no yɛ wɔ asafo no mu no ekyir no, hɔn mu dodowara wɔ hɔnankasa ndwuma ahorow a wɔyɛ nye hɔn ebusua mu asodzi ahorow a ɔsɛ dɛ wodzi ho dwuma so. Dɛm enuanom mbarimba a wɔyɛ edwumadzen yi fata dɛ yɛdze obu ma hɔn.​—1 Thessalonicafo 5:12, 13.

• Ebɛn edwuma na mpanyimfo no yɛ wɔ asafo no mu?

• Ebɛnadze na mpanyimfo no yɛ dze kyerɛ dɛ wɔdwen hɛn mu biara ho?