O Marta e dua na iVakadinadina i Jiova e Guatemala. E vulica tiko na vosa vaKekchi me rawa ni wasea kina na itukutuku vinaka vei ira na vosataka na vosa qori. Dua na siga e raica ni biubiu mai valenibula e dua na tagane. E kila sara o Marta ni gole mai ena dua na koro ena veiulunivanua era vosa vaKekchi. E vakavudua mera vunau na tacida ena vanua qori. E golevi koya sara o Marta rau qai veivosaki vaKekchi.

E mani sureti koya o Marta me vulica na iVolatabu. E vakadonuya, ia e kaya ni sega vua na ilavo me sauma nona vuli. E vakamacalataka sara o Marta ni sega ni saumi nodra caka vuli iVolatabu na iVakadinadina i Jiova. E kaya tale ga vua ni rawa ni rau vuli ena talevoni, ratou rawa ni tomani koya tale ga nona vuvale. E mani vakadonuya. Ni kila na vosa vakaSipeni, e solia vua o Marta e dua na ilavelave ni Vakadewa ni Vuravura Vou ena vosa vakaSipeni. E solia tale ga vua e dua na ivola ni vuli, Na Cava Sara Mada e Kaya na iVolatabu? ena vosa vaKekchi. Macawa tarava ga ratou vuli sara vakavuvale kei Marta ena talevoni. Ratou dau vuli vakarua e veimacawa. E kaya o Marta: “Au caka vuli ena vosa vakaSipeni, niu sega ni kila vinaka sara na vosa vaKekchi. Sa qai vakadewataka na ka keitou vulica ena vosa vaKekchi o tagane vei watina. Ratou kila vinaka na luvedrau na vosa vakaSipeni.”

Na tagane qori e italatala ni nodratou lotu. E vakavulica sara vei ira nona lewenilotu na ka e vulica tiko ena iVolatabu. Dua na ka nodra taleitaka na ka era rogoca, ra via kila tale ga na sala e vulica kina na veika qori. Ni tukuna vei ira ni vuli iVolatabu tiko, ra tomani koya yadudua sara ena vuli. E veimacawa era dau soqoni vata e rauta ni le 15 mera vuli kei Marta ena talevoni. Toso na gauna, era biuta na gusunivosa ena talevoni me rawa nira rogoca kece na ka era vulica.

Gauna e tukuna kina o Marta vei ira nona qase ni vavakoso na vuli iVolatabu qori, e sikovi ira sara e dua na qase ni vavakoso ena nodra itikotiko. E mani sureti ira ena nona vunau na ivakatawa ni tabacakacaka a ena koro e dua na aua na kena yawa ni vodo ena lori, qai rua na aua ni taubaletaki. Era vakadonuya na gonevuli, ra qai tiko kina e le 17.

Oti e vica na macawa, era gole eso na tacida kei na ivakatawa ni tabacakacaka vei ira na gonevuli me va na siga. E veimataka, era na sarava ena jw.org, na vidio vakaivolatabu ena vosa vaKekchi. Era vulica tale ga na brochure, O Cei e Cakava Tiko na Loma i Jiova Nikua? E veiyakavi, era sarava na JW Broadcasting. E tuvanaka tale ga na ivakatawa ni tabacakacaka mera vakavulici yadudua na gonevuli.

Ena va na siga qori era vunau na tacida ena veikoro e kea, ra veisureti tale ga ena dua na soqoni lavotaki. Era sureti sara e le 47 era tiko ena soqoni mera vulica na iVolatabu. Era vakadonuya sara mera vuli e tinikadua na vuvale.

Oti e vica na vula, era tuvanaka na qase ni vavakoso me caka na soqoni, ena muanimacawa kece ena imatai ni koro era vunau kina. Nikua era soqoni wasoma tiko e rauta ni le 40. Dua na ka nodra marau na tacida nira tiko e le 91 ena iVakananumi ni Mate i Jisu.

Ni raica lesu o Marta na sala era mai vulica kina e levu na iVolatabu, e kaya: “Dua na ka noqu vakavinavinakataki Jiova. Eso na gauna au nanuma ni vakaiyalayala ga na ka au rawa ni cakava. Ia e rawa ni vakayagataki keda o Jiova meda vukei ira eso tale. E kila na lomadra na lewenikoro e kea, qai vagolei ira mai. E lomani ira dina o Jiova.”