Sega. Era sega ni saqata na iVakadinadina i Jiova na veika me baleta na icula. Qori e nodra vakatulewa sara ga na lotu vaKarisito yadua. E levu gona vei ira na iVakadinadina i Jiova era vakatulewataka mera cula.

 Era qara na veiqaravi vakavuniwai e vinaka duadua, era raica tale ga vakabibi na nodra sasaga na tabana ni bula me vakalailaitaki kina na mate. Na gauna dredre mada ga eda donuya tu qo, dua na ka nodra vakavinavinakataki ira na vuniwai kei na nasi ena nodra cakacaka vakaukaua.

 O ira na iVakadinadina i Jiova era dau tokoni ira na vakailesilesi ni valenibula. Kena ivakaraitaki, gauna e tekivu veitauvi kina na COVID-19, era vakarautaka tiko ga na iVakadinadina i Jiova na ivakasala ena nodra website ena vica vata na drau na vosa. Qori mera uqeti kina e levu mera muria tiko ga na ivakaro ni qaqarauni mai na matedewa. E okati kina na ivakaro me kua na veivolekati, kua na sosoqoni vata vakalewelevu, korotinitaki, sava na liga kei na daramaki ni mask. Era muria tale ga eso tale na vakatatabu e vakarautaki, se ra vakatututaka mai na vakailesilesi ni matanitu.—Roma 13:1, 2.

 Vicasagavulu na yabaki sa oti era tabaka na iVakadinadina i Jiova ena nodra ivola na ivakavuvuli qo:

•   Na taqomaki ni noda bula e noda vakatulewa yadua sara ga.—Kalatia 6:5.

   “[Na mekesini qo] e sega ni vakatututaka na iwalewale ni veiqaravi se wainimate. E sega tale ga ni veivakasalataki ena veiqaravi vakavuniwai. E kena inaki ga me vakamacalataka na ka dina, ena qai vakatau vei ira na dauwiliwili na vakatulewa mera cakava.”—Awake!, February 8, 1987.

   “E nomudou vakatulewa yadua sara ga vakavuvale mo dou cula se sega.”—Awake!, August 22, 1965.

•   Eda vinakata meda qaravi vakavuniwai nida mareqeta na bula.—Cakacaka 17:28.

   “O ira na iVakadinadina i Jiova era na qara nodra veivuke na vuniwai ena gauna era tauvimate kina. Era mareqeta vakalevu na bula, era yalorawarawa tale ga ni ciqoma na veiqaravi vakavuniwai e yavutaki vakaivolatabu me rawa nira bula balavu kina.”—The Watchtower, July 1, 1975.

   “Era vakadonuya na iVakadinadina i Jiova na wainimate kei na veiqaravi e vakatura na vuniwai. Nira vinakata mera bula vinaka, mera bula dede tale ga. Eso tale ga na iVakadinadina i Jiova era vuniwai me vakataki Luke na lotu vakarisito ena imatai ni senitiuri. . . . Era vakavinavinakataka vakalevu na iVakadinadina i Jiova na nodra cakacaka vakaukaua kei na nodra dina na vuniwai ena nodra veiqaravi. Era marautaka tale ga na iwali ni tauvimate era vakatura.”—Na Vale ni Vakatawa, 1 Feperueri, 2011.