Sega. Keimami vakabauta na iVakadinadina i Jiova ni bulia na ka kece na Kalou. Ia keimami sega ni duavata kei na ivakavuvuli ni a buli na vuravura ena loma ga ni ono na siga. Na vuna? Na ivakavuvuli qori e veisaqasaqa kei na iVolatabu. Dikeva e rua na ivakaraitaki qo:

1.   Ono na siga na balavu ni bulibuli. Na vakabauta ni creationism oya ni vuravura kei na ka bula kece era tu kina, e buli ena ono ga na siga, oya e 24-na aua ena dua na siga. Ia na vosa “siga” ena iVolatabu e rawa ni sivia na balavu ni gauna qori.​—Vakatekivu 2:4; Same 90:4.

2.   Buli ni vuravura. Eso era vakavuvulitaka ni vuravura e se qai vica toka ga na udolu na yabaki na kena buli. Ia na iVolatabu e vakamacalataka ni vuravura kei na lomalagi sa buli oti ni se bera na ono na siga ni bulibuli. (Vakatekivu 1:1) Oya na vuna keimami sega ni saqata kina na ka era vakadinadinataka na daunisaenisi ni a buli na vuravura ena vica vata na bilioni na yabaki.

 Keimami vakabauta ni a buli na lomalagi kei na vuravura, keimami vakabauta tale ga na nodra vakadidike na saenisi, ke tiko na kena ivakadinadina. Keimami vakabauta ni veisemati vinaka na ka e tukuna na iVolatabu kei na so na vakadidike ni saenisi.