“E 19 na yabaki noqu waraka tu qo!” Na cava e waraka tiko na tacida qori? Na New World Translation of the Christian Greek Scriptures ena vosa vakaBengali. Levu era dau kaya tale ga qori ena gauna e sevutaki kina na New World Translation ena nodra vosa. Ia o kila na ka e okati ena vakadewataki kei na tabaki ni iVolatabu?

 Kena imatai, ena lesi na timi ni vakadewa ena veidusimaki ni Komiti ni Volavola ni iLawalawa Dauvakatulewa. E vakacava na balavu ni gauna ena vakadewataka kina na timi na iVolatabu? E kaya o Nicholas Ahladis e veiqaravi ena Translation Services e Warwick, mai Niu Yoka: “E levu na ka e okati kina. Kena ivakaraitaki, e le vica era na vakadewataka? Vakacava na vosa dredre? Era na kila na dauwiliwili na ivakarau ni bula ena gauna vakaivolatabu? Vakacava na veisau ni vosa e veivanua? E taura e dua ina tolu na yabaki na vakadewataki ni iVolatabu vaKirisi vaKarisito. Ena sivia e va na yabaki na vakadewataki ni iVolatabu taucoko. E balavu sara na vakadewataki ni iVolatabu ni vosa vagalu.”

 E vinakati tale ga nodra vakatutu eso tale ena vakadewataki ni iVolatabu. Kena ivakaraitaki, ena vinakati eso na tagane kei na yalewa e duidui nodra isususu, duidui tale ga na vanua era cavutu mai kina mera vakalewa na ivakarau ni vakadewa. E sega ni saumi na ka era cakava. Na nodra vakatutu ena vukei ira na daunivakadewa mera vakarautaka na iVolatabu e donu, matata qai kilai rawarawa. E kaya e dua e dauveivakavulici ena vakadewa mai Sauca Aferika, e “dua na cakacaka levu era cakava na daunivakadewa ena nodra itavi vei Jiova, kei ira na dauwili iVolatabu.”

 Oti na vakadewa ena tabaki qai dabani na iVolatabu. E vinakati kina na pepa, iqi, na iubi, reveni, kei na so tale na ka (me vaka na adhesive, cover liner, silver leaf, headband, spine stiffener, kei na capping material) me dabani kina na iVolatabu. Ena 2019, e vakayagataki e sivia e 20 na milioni na dola na ilavo ni Merika me voli kina na ka kece qori me vakarautaki kina na iVolatabu. O ira na veiqaravi ena tabaivola era vakayagataka e sivia e 300,000 na aua mera tabaka qai vakauta na iVolatabu.

 Cava na vuna e vakayagataki vakalevu kina na gauna kei na ilavo ena cakacaka qo? E kaya o Joel Blue ena Tabana ni Tabaivola e Veiyasa i Vuravura: “Na iVolatabu e ivola mareqeti duadua me tabaki. Keitou vinakata gona na kena irairai me vakalagilagi kina na Kalou eda qarava, kei na itukutuku eda vunautaka.”

 Me ikuri ni New World Translation, e tabaki tale ga na iVolatabu vei ira era vakaleqai vakayago. Kena ivakaraitaki, sa tiko e tini na vosa ni nodra matanivola na mataboko ni New World Translation. Dua mada ga na iVolatabu taucoko e rawa ni taura e walu na aua na kena caka. Na levu ni kena itabataba e rauta ni 2.3 na mita na kena levu. E vakarautaki tale ga na iVolatabu tabaki rawarawa ga me baleti ira na kaivesu.

 E levu e uqeti ira na New World Translation. Kena ivakaraitaki, na ivavakoso vosa vaKiluba e tiko e Tombe ena Democratic Republic of the Congo. E sivia ni 1,700 na kilomita na yawa ni vanua qori mai na siti. E dua ga na iVolatabu e tiko vua e dua na tacida e kea, qai vakayagataki tu kina na vosa makawa vaKiluba. Era dau vakayagataka na tacida tagane na iVolatabu qori mera vakarautaka kina nodra itavi ena soqoni. Ia ena Okosita 2018, era sa yadua kece na lewe ni vavakoso na New World Translation ena vosa vaKiluba.

 E kaya e dua na tacida yalewa e vosa vakaJamani ena kena vakavoutaki na New World Translation ena nona vosa: “Sa sega niu qai kaya tale tiko meu wilika na iVolatabu. Ia au sa tarogi au ga, ‘Gauna cava meu wiliwili kina?’” E vola e dua na kaivesu: “A soli vei au e dua na New World Translation, e veisautaka sara ga na noqu bula. Niu wilika na kena ivakadewa qo au kila vinaka kina na Vosa ni Kalou, e matata tale ga. Au via kila e levu tale na ka me baleti ira na iVakadinadina i Jiova, kei na sala meu lewena kina nodra lotu.”

 Oni vakavinavinakataki kece na dauwilika na New World Translation ena nomuni cau me tokoni kina na cakacaka qo. Oya nomuni cau moni tokona kina na cakacaka e veiyasa i vuravura, e levu na cau qori e biu ena donate.mr1310.com. Vinaka vakalevu na lomasavu.