Ena dua na ripote ena June 2022, e vola na peresitedi ni isoqosoqo na World Bank Group, “sa tarai vuravura tiko na leqa vakailavo. E tubu tiko ga na isau ni iyaya, da qai sega ni ceguva rawa na kedra isau.”

 E kaya na isoqosoqo na International Monetary Fund, “e tubu totolo na isau ni kakana kei na benisini, e lai tarai ira vakalevu na lewenivanua era tiko ena vanua dravudravua.”

 Ena rawa ni vukei keda na iVolatabu meda kila na vuna eda sotava kina na leqa vakailavo, ka meda cakava meda vosota kina, kei na sala ena wali kina vakadua.

•   E vakatoka na iVolatabu na gauna eda bula tu kina qo, me “iotioti ni veisiga.”—2 Timoci 3:1.

•   E kaya o Jisu ni na vakilai ena gauna qori na “veika vakadomobula,” se ka rerevaki. (Luke 21:11) Na tubu ni isau ni iyaya e vakavuna mera lomaleqa e levu. Era lomaleqataka na veika ena yaco ena gauna se bera mai, kei na ka mera bula kina na nodra vuvale.

•   E parofisaitaka na Vakatakila na tubu ni isau ni kakana ena gauna qo. “Au qai rogoca e dua na domo. . . . e kaya, ‘E dua na kilo na witi se tolu na kilo na varile ena rauta na isau ni dua na siga.’”—Vakatakila 6:6, Easy-to-Read Version.

 Mo kila eso tale na ka me baleta “na iotioti ni veisiga,” kei na parofisai ena Vakatakila, sarava na vidio Veisau o Vuravura me Tekivu Mai na 1914. Wilika tale ga na ulutaga, “Cava e Kilai me Baleti Ratou na Dauvodo Ose?”

•   “Era na tara vale era na tiko kina, era na tea na loganivaini era na kania na vuana. Era na sega ni tara vale qai duatani e tawana, era na sega ni tea qai duatani e kania.”—Aisea 65:21, 22.

•   “Ena levu na covuata e vuravura, ena vuabale ena dela ni veiulunivanua.”—Same 72:16.

•   “‘Nira sa vakacacani na vakaloloma, nira vutugu na dravudravua, au na tucake mai meu cakava e dua na ka,’ e kaya o Jiova.”—Same 12:5. a

 Ena vakarau vakaotia na Kalou na leqa vakailavo e veiyasa i vuravura. Mo kila na sala ena cakava kina qori, wilika na ulutaga vakavalagi “Ena Rawa ni Vinaka na Bula Vakailavo?”

 Ia ena gauna mada ga qo, e rawa ni vukei iko na iVolatabu ena ka mo cakava ni tubu tiko na isau ni iyaya. Ena sala cava? E tu kina na ivakasala yaga mo vakayagataka kina vakavuku na ilavo. (Vosa Vakaibalebale 23:4, 5; Dauvunau 7:12) Mo kila eso tale na ka, wilika na ulutaga “Taqomaka Nomu Bula Vakailavo,” kei na “Cava Mo Cakaca ke Vakalailaitaki na Kemu iSau?”