Ni bera ni mate o Jisu, a tukuna: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.” (Maciu 24:14) Ia ena vakayacori vakacava na cakacaka qo ena vuravura raraba? Ena kena muri vinaka ga na iwalewale a vakavulica o Jisu ni se bula e vuravura.​—Luke 8:1.

Keimami saga me keimami vunau vei ira na tamata ena nodra itikotiko. A vakavulici ira na nona tisaipeli o Jisu mera vunautaka na itukutuku vinaka e veivale. (Maciu 10:11-13; Cakacaka 5:42; 20:20) A tiko na vanua a lesi mera vunau kina na dauvunau ena imatai ni senitiuri. (Maciu 10:5, 6; 2 Korinica 10:13) Na neimami cakacaka vakavunau tale ga nikua e tuvanaki vakamatau, e tiko na vanua e lesi ina ivavakoso yadua. Na sala qori keimami vakayacora rawa kina na ivakaro i Jisu me keimami ‘vunau sara vakavinaka vei ira na lewenivanua.’​—Cakacaka 10:42.

Keimami saga me keimami vunau vei ira na tamata ena vanua cava ga era tu kina. A ivakaraitaki vinaka tale ga o Jisu ena nona vunau vei ira na tamata ena vanua cava ga era tu kina, ena baravi se na yasa ni toevu era dau vakayagataka na lewenivanua. (Marika 4:1; Joni 4:5-15) Keimami veivosakitaka tale ga na iVolatabu kei ira na tamata ena vanua cava ga keimami raici ira kina​—e gaunisala, vanua ni bisinisi, vanua ni gade, se vunau ena talevoni. Keimami vunau vei ira keimami tiko veitikivi, cakacaka vata, vuli vata, kei ira na wekai keimami ena gauna veiganiti. Na sasaga kece qori e rawa kina vei ira e levu e veiyasa i vuravura mera rogoca na ‘itukutuku vinaka e veivakabulai.’​—Same 96:2.

O kila tiko e dua o rawa ni wasea vua na itukutuku vinaka ni Matanitu ni Kalou kei na veika vinaka ena marautaki ena veisiga se bera mai? Kua ni vunitaka na itukutuku qori. Wasea vei ira ena kena gauna totolo duadua!

• Na “itukutuku vinaka” cava me na vunautaki?

• Era vakatotomuria vakacava na iVakadinadina i Jiova na ivakarau ni vunau i Jisu?