Aisea 49:1-26
49 Moni vakarorogo vei au na veiyanuyanu,Moni vakatudaliga na veimatanitu yawa.+
E kacivi au o Jiova niu se bera ni sucu.*+
Niu se tiko ena katonigone i tinaqu e cavuta na yacaqu.
2 E cakava na gusuqu me vaka na iseleiwau gata,E vunitaki au ena yaloyalo ni ligana.+
E vagatari au me vaka na gasau,E vunitaki au ena nona taga ni gasau.
3 E kaya vei au: “O iko na noqu dauveiqaravi Isireli,+Au na vakaraitaka vei iko na noqu lagilagi.”+
4 Ia au kaya: “E sega ni yaga na noqu oca.
Au vakayagataka na noqu kaukaua ena ka wale, e sega ni yaga.
Io ena lewai au ga o Jiova,*Ena saumi* au na noqu Kalou.”+
5 Ia o Jiova ga e buli au mai na katonigone meu nona dauveiqaravi,E kaya vei au meu kauti Jekope lesu vua,Mera soqoni vua na Isireli.+
Au na vakalagilagi ena mata i Jiova,E noqu kaukaua na noqu Kalou.
6 E kaya o koya: “O sega ni noqu dauveiqaravi wale gaMo vueta cake na yavusa i Jekope,Mo vakasukai ira mai na Isireli era maroroi tu.
Au soli iko tale ga mo nodra rarama na veimatanitu,+Me yaco na noqu veivakabulai ina iyalayala kei vuravura.”+
7 Qo na ka e kaya o Jiova, o koya e voli Isireli lesu, na nona Yalosavasava,+ vua e beci,+ vua era cata na lewe ni matanitu, vua na nodra dauveiqaravi na turaga:
“Era na raica na tui era na tucake,Kei ira na turaga era na cuvaEna vuku i Jiova, o koya e daudina,+Na Yalosavasava ni Isireli, e digitaki iko.”+
8 Qo na ka e kaya o Jiova:
“Ena gauna ni yalovinaka, au rogoci iko,+Kei na siga ni veivakabulai, au vukei iko,+Au taqomaki iko tiko ga mo vu ni veiyalayalati kei ira na tamata,+Mo vakavinakataka na vanua,Mo vakasuka vei ira na nodra ivotavota sa biu wale tu,+
9 Mo kaya vei ira na vesu tu, ‘Moni lako mai!’+
Vei ira na tiko ena buto,+ ‘Moni vakaraitaki kemuni!’
Era na kana ena batinisala,Ena tu na kedra veico ena sala makawa* kece.
10 Era na sega ni viakana, se karamaca,+Ena sega ni liwavi ira na cagi katakata se kati ira na siga.+
Ni na liutaki ira o koya e lomani ira,+Ena kauti ira ina bati ni waivure.+
11 Au na cakava na noqu veiulunivanua kece me gaunisala,Kei na noqu sala lelevu me cecere.+
12 Raica! Era lako mai vakayawa,+Raica! O ira qo mai na vualiku kei na ra,O ira qo mai na vanua o Sainimi.”+
13 Moni kaila ena marau na lomalagi, mo reki na vuravura.+
Mera kaila ena marau+ na veiulunivanua.
Ni vakacegui ira na nona tamata o Jiova,+E lomani ira na nona era vakararawataki.+
14 Ia e kaya tiko ga o Saioni:
“Sa biuti au o Jiova,+ sa guilecavi au o Jiova.”+
15 Ena guilecava e dua na yalewa na luvena e sucu tikoSe sega ni lomana na leweniketena?
Ke guilecava mada ga, au na sega sara ni guilecavi iko.+
16 Raica! Au ceuti iko ena qeteqeteniligaqu.
Na nomu bai e tiko ga e mataqu.
17 O ira na luvemu era vakusakusa mai.
O ira na basuki iko kei ira na vakalalai iko era na biuti iko.
18 Mo tacake mo veiraiyaki.
Era soqoni vata kece.+
Era lako yani vei iko.
“Me vaka niu bula dina tiko,” e kaya o Jiova,“O na tokari ira kece me vaka na iukuuku,O na vauci iko kina me vaka na yalewavou.
19 Na nomu veiyasana e yanaraki, e laladidi, na nomu vanua e vakarusai,+Ia qo sa rui lailai vei ira na tiko kina,+O ira na tilomi iko+ era na yawa sara.+
20 Era na kaya e daligamu na gone era sucu ni o yava tu,‘Sa lailai vei au na vanua qo.
Vakarautaka na vanua meu tiko kina.’+
21 O na kaya e lomamu,‘O cei e vakatuburi ira qo mera noqu,Niu yalewa yava, niu sega ni vakaluveni rawa,Au kau vakayawa, au kau vakavesu?
O cei e susugi ira qo?+
Raica! Au biu duadua tu,+Ia era lako mai vei o ira qo?’”+
22 Qo na ka e kaya na Turaga Cecere Duadua o Jiova:
“Raica! Au na laveta na ligaqu vei ira na veimatanitu,Au na vakarewataka na noqu kaunikuila vei ira na lewe ni veivanua.+
Era na roqo mai na luvemu tagane e ligadra,*Era na cola mai na luvemu yalewa e tabadra.+
23 O ira na tui era na qaravi iko,+Kei na nodra raluve era na susugi iko.
Era na cuva vei iko nira tekicuva ina qele+
Era na dramica na kuvu ni yavamu,+O na qai kila ni o yau o JiovaO ira na nuitaki au era na sega ni madua.”+
24 Ena kau tani rawa vua na tamata qaqa o ira na vesu,Se ra vakabulai na nona bobula na tamata voravora?
25 Ia qo na ka e kaya o Jiova:
“Era na kau tani mada ga na nona bobula na tamata qaqa,+Era na vakabulai o ira e vesuka na tamata voravora.+
Au na valuti ira na valuti iko,+Au na vakabulai ira na luvemu.
26 Au na vakani ira na vakasaurarataki iko ena lewedra,Era na mateni ena nodra dra me vaka na waini kamica.
Era na qai kila na tamata kece ni o yau o Jiova,+Na nomu iVakabula,+ o koya tale ga e voli iko lesu,+Na Kaukaua nei Jekope.”+
iVakamacala e ra
^ Ipe., “mai na katonigone.”
^ Se “O Jiova ena lewai au vakadodonu.”
^ Se “vakaicovitaki.”
^ Se rawa ni, “veidelana dravuisiga.”
^ Ipe., “lomaseredra.”
