“E RAWA ni biubiu na basi, na turaga ni Jaina ga me tiko mai!” Qori na ka e rogoca o Alexandra ni vodo basi tiko mai na dua na vanua ena Ceva kei Merika ina dua tale. E sobu sara ni via kila na ka e yaco. E raica o Alexandra ni rau veivosaki tu na turaga ni Jaina kei na vakailesilesi e sa tarova tu na basi. E dredre toka nona vakamacalataka o turaga ni Jaina na kena ituvaki ni sega ni kila vinaka na vosa vakaSipeni. O Alexandra e dua na iVakadinadina i Jiova qai kila toka na vosa vakaJaina. E mani bole o Alexandra me vakadewataka vakaSipeni na ka e kaya na turaga ni Jaina.

E kaya na turaga ni Jaina ni vakalawataki na nona tiko ena vanua ya. Ia a butakoci na nona ilavo kei na veika vakaivola me vakadinadinataka qori. E sega ni vakabauta qori na vakailesilesi, e nanuma tale ga ni vakaitavi tiko ena bisinisi ni volitaki tamata o Alexandra. Ni toso tiko nodratou veivosaki, sa qai vakabauta na vakailesilesi nona ivakamacala na turaga ni Jaina. E vinakati me sauma o turaga ni Jaina eso na ilavo, ia e sega ni tu vua e dua na ilavo. E lomasoli o Alexandra me solia vua e $20. Dua na ka nona vakavinavinaka na turaga ni Jaina qai kaya ni na sauma lesu na ilavo. E kaya o Alexandra ni sega ni vinakata me saumi lesu vua, e marau ni veivuke baleta ni dodonu ga me cakava qori. E solia o Alexandra vua na turaga ni Jaina eso na ivola vakaivolatabu qai uqeti koya me vulica na iVolatabu kei ira na iVakadinadina i Jiova.

Ke da daulotu se sega, e rawa nida veikauaitaki kece. Vakacava o na tu vakarau mo vukea e dua e gadreva na veivuke? E bibi na taro qori ni tukuna o Jisu: “E marau vakalevu o koya e solia na ka, vakalailai o koya e taura na ka.” (Cakacaka 20:35) E vakadinadinataki mada ga vakasaenisi ni yaga na soli ka. Meda raica mada e vica na sala ena yaga kina na soli ka.

E levu era vakadinadinataka ni lakovata na soli ka kei na marau. E vola na yapositolo o Paula: “Na Kalou e taleitaki koya e soli ka ena marau.” A vosa tiko vei ira na lotu vaKarisito era via cau mera tokoni ira kina na tacidra era vakaleqai. (2 Korinica 8:4; 9:7) E sega ni tukuna o Paula nira soli ka o ira qori baleta nira marau, ia era marau nira soli ka.

E laurai ena dua na vakadidike ni soli ka “e vakayadrata na yasa ni noda mona e dau vakasamataki kina na marau, veimaliwai, kei na veinuitaki, na veika qori ena ‘vakilai kina na vakacegu.’” E tukuni ena dua tale na vakadidike ni “vakavu marau vakalevu noda soli ilavo vei ira eso tale, eda sega ni vakayagataka ga o keda.”

Vakacava o nanuma ni o sega ni rawa ni soli ka ena vuku ni kemu ituvaki? Eda vakadinata kece ni yaga dina ‘noda soli ka ena marau.’ E sega ni tukuni me levu sara na ka o solia,  me donu ga na inaki ni soli ka. A vakauta nona cau e dua na iVakadinadina i Jiova vei ira na vakarautaka na mekesini qo qai biuta vata kei na dua na ivola. E tukuni toka ena ivola: “E sega ni levu sara na ka au dau cautaka ena Vale ni Soqoni ena veiyabaki sa sivi. Ia e solia vei au o Jiova e levu na ka. . . . Au marau dina niu rawa ni vakauta yani e dua na noqu cau, e vakacegui au tale ga.”

Na soli ka e sega ni yalani ga ena ilavo. E levu tale na sala eda rawa ni soli ka kina.

E kaya na iVolatabu: “Na tamata yalovinaka e caka vinaka ga vua, ia o koya e yaloca e vakaleqai koya ga.” (Vosa Vakaibalebale 11:17) O ira era yalovinaka era dau lomasoli, era solia nodra gauna kei na igu mera veivuke, era dau veikauaitaki, kei na so tale. E levu na sala e yaga kina vei ira qori, era bulabula tale ga vakayago.

E laurai ena levu na vakadidike ni o ira era dau veivuke era sega ni vakila e levu na ka mosimosi, rarawa, qai sega soti nira lomabibi. Era marautaka nodra bula. Na soli ka e yaga vei ira na tauvimate bibi me vaka na mateniua kei na HIV. O ira mada ga era saga tiko mera valuta na gunu alakaolo, era vakadinata ni nodra dau veivuke e vakaseavutaka nodra lomabibi qai vukei ira mera kua ni sikalutu tale ena nodra malumalumu.

E sega ni kurabuitaki qori baleta e tukuni “na yalololoma, yalovinaka, kei na veikauaitaki e vakamarautaka na loma ni tamata.” Na soli ka e vakaseavutaka na lomaocaoca, e sega ni tubu kina na dra. Era dau vakila tale ga o ira e mate na kedra isa ni nodra vukei ira eso tale e vakaseavutaka nodra lomabibi.

Io, e yaga dina na soli ka.

E uqeti ira nona imuri o Jisu: “Moni dau soli ka, ena qai soli vei kemuni. Era na sova ina nomuni ilobi ni isulu e dua na ivakarau e sinai vinaka, ena tabaki sobu, ena kuretaki, ena vuabale. Na ivakarau oni vakarautaka ena vakarautaki tale vei kemuni.” (Luke 6:38) Ni o soli ka, era na marautaka eso tale qai uqeti ira mera dau soli ka. Na soli ka e uqeta na duavata, e yavu vinaka tale ga ni veitokani.

Era raica na dau dikeva na ivakarau ni veimaliwai ni tamata, ni o ira “era dau veikauaitaki era na uqeti ira eso tale mera cakava tale ga qori. Na wiliki wale ga ni nodra ivakaraitaki ni veikauaitaki e levu e dau uqeti ira eso tale mera veikauaitaki.” E kaya e dua na vakadidike “ni rawa nira vakatotomuria e levu na ka e cakava e dua, se ra mani veikilai se ra qai sota vakadua.” Na ka lailai mada ga e cakava e dua me vakaraitaka kina nona veikauaitaki ena rawa ni uqeti ira eso  tale mera veikauaitaki. Vakacava o na via bula ena dua na vanua e laurai kina na veikauaitaki? Io, na levu ga ni soli ka na kena vinaka.

E laurai na yaga ni soli ka ena dua na ituvaki a yaco mai Florida, Merika. Ni oti ga na vakacaca ni cagilaba, era lai veivuke ena vakacoko eso na iVakadinadina i Jiova. Nira waraka toka na iyaya ni vakacoko ena dua na vale era tara tiko, era raica ni vakacacani tu na bai ena vale tarava ra mani vakavinakataka. E kaya na itaukei ni bai ena nona ivola ina itikotiko liu ni iVakadinadina i Jiova: “Dua na ka noqu vakavinavinaka. Au se qai bau sotava eso na tamata vinaka ena noqu bula.” Na levu ni nona vakavinavinaka na turaga qori e solia kina e dua nona cau ina cakacaka e vakatoka me nodra cakacaka veivakurabuitaki na iVakadinadina.

Era dikeva na saenitisi “ni tiko e dua na ka e uqeti keda meda veivukei.” Era kaya ni o ira mada ga na gonelalai “era rawa ni veikauaitaki ni bera nira kila vosa.” Na vuna? E kaya na iVolatabu nida buli meda “ucuya na Kalou,” oya meda vakaraitaka na nona itovo.—Vakatekivu 1:27.

Na veikauaitaki e dua na nona itovo talei na Dauveibuli, na Kalou o Jiova. E buli keda qai vakarautaka na veika meda marau kina. (Cakacaka 14:17; 17:26-28) Eda na kilai koya na Tamada vakalomalagi kei na nona inaki nida vulica na iVolatabu. E vakamacalataki ena ivola qori na veika marautaki ena cakava ena vukuda na Kalou ena veigauna se bera mai. * (1 Joni 4:9, 10) Ni dau veikauaitaki o Jiova qai buli keda meda ucui koya, e macala ga nida na vakatotomuri koya ena soli ka. Nida cakava qori, eda na vakamarautaki koya da qai vakila na kena yaga.—Iperiu 13:16.

O se nanumi Alexandra tiko a vakamacalataki ena itekitekivu ni ulutaga qo? Era tukuna eso era vodo vata tiko ena basi ni vakalusia nona ilavo vua na turaga ni Jaina. A veitaratara na turaga ni Jaina vei ira na nona itokani me saumi kina na $20 a dinautaka. A cakava tale ga na ka e kerea o Alexandra, me vulica na iVolatabu kei ira na iVakadinadina i Jiova. E kidacala o Alexandra ni rau sota tale kei na turaga ni Jaina ena soqo vakaJaina ni iVakadinadina i Jiova mai Peru. Ni via vakavinavinakataka na turaga ni Jaina na veivuke i Alexandra, a sureti koya kei ira na nona itokani ina nona valenikana.

Eda na marau nida soli ka qai vukei ira eso tale, vakabibi keda vukei ira eso tale mera kilai Jiova na Kalou e dau solia vei keda na iloloma vinaka kece! (Jemesa 1:17) Vakacava o sa vakila tiko na yaga ni soli ka?