Vulica na iTovo ni Kalou Vei Ira na Parofita
E vakayagataki ira na parofita ena gauna makawa na Kalou mera vakasavuya na itukutuku bibi. Vakacava e tiko tale ga ena itukutuku qori na sala meda rawata kina na veivakalougatataki ni Kalou? Io. Meda raica mada qo na ka eda rawa ni vulica vei ratou na le tolu na tagane yalodina.
EPARAMA
E sega ni dau veivakaduiduitaki na Kalou qai vinakata me vakalougatataki keda kece.
E yalataka na Kalou vei Eparama ni na ‘vakalougatataki ena vukuna na vuvale kece e vuravura.’—Vakatekivu 12:3.
Ka eda vulica: E lomani keda vakalevu na Kalou, e vinakata tale ga me vakalougatataka na lewenivuvale kece era talairawarawa vua.
MOSESE
E yalololoma na Kalou qai vakalougatataki ira na vakasaqarai koya dina.
E solia na Kalou Kaukaua Duadua vua na parofita o Mosese na kaukaua me cakava na cakamana lelevu. Ia, se masuta tiko ga o Mosese: “Vakatakila vei au na nomuni ivalavala meu kilai kemuni kina, meu nanumi tiko ga e matamuni.” (Lako Yani 33:13) E marautaka na Kalou na ka e kerea qai vakalougatataki koya ena kilaka kei na yalomatua me kila kina na nona itovo kei na nona ivalavala. Kena ivakaraitaki, e vulica o Mosese ni o koya na Dauveibuli e “Kalou dauyalololoma qai dauveinanumi.”—Lako Yani 34:6, 7.
Ka eda vulica: Ena vakalougatataki keda kece na Kalou ke da saga meda kilai koya vinaka. E vakaraitaka ena iVolatabu na sala meda qaravi koya kina, e tu vakarau tale ga me vakalougatataki keda qai vakadonui keda.
JISU
E yalololoma o Jisu ni vakabulai ira kece na tauvimate
Eda na vakalougatataki me tawamudu ke da vulica na veika me baleti Jisu kei na ka e vakavuvulitaka.
E tu ena iVolatabu e levu na itukutuku me baleta na bula nei Jisu kei na ka e vakavulica. E solia vua na Kalou na kaukaua me cakava e levu na cakamana lelevu me vaka na nodra rai na mataboko, rogo na didivara, e vakabulai ira na lokiloki kei ira mada ga na mate. E vakaraitaka gona o Jisu na veivakalougatataki ena cakava na Kalou vei keda kece ena gauna se bera mai. E vakamacalataka na sala eda na marautaka yadudua kina na veivakalougatataki qori. E kaya: “Ena rawata na bula tawamudu, o koya e vulica tiko ga na veika me baleti kemuni na Kalou dina duadua ga, kei Jisu Karisito oni tala mai.”—Joni 17:3.
O Jisu e dauveinanumi, yalololoma qai dau veikauaitaki. Era torovi koya mada ga na tagane, yalewa, qase kei na gone ni sureti ira: “Vuli vei au, niu yalomalumalumu, au yalomalua tale ga, oni na kunea kina na vakacegu.” (Maciu 11:29) Ena nona gauna era dau beci na yalewa. Ia e dau rokovi ira o Jisu, dokai ira qai kauaitaki ira.
Ka eda vulica: O Jisu e dau lomani ira vakalevu na tamata. E ivakaraitaki vinaka tale ga ena sala meda kauaitaki ira kina eso tale.
E SEGA NI KALOU O JISU
E kaya vei keda na iVolatabu ni “dua ga na Kalou,” qai nona italai o Jisu Karisito. (1 Korinica 8:6) E vakamatatataka o Jisu ni cecere duadua ga na Kalou. E talai koya tale ga mai i vuravura.—Joni 11:41, 42; 14:28. *
^ para. 17 Mo kila e levu tale na ka me baleti Jisu Karisito, raica na wase 4 kei na 5 ni ivola, “Na Cava Eda na Vulica ena iVolatabu?” ena website na www.mr1310.com.
Rawa ni o Wilika Tale ga
SAUMI NA TARO VAKAIVOLATABU
E Kalou Kaukaua Duadua o Jisu?
Cava e tukuna o Jisu me baleti koya kei na Kalou?
