E TIKO ga na gauna me dau caka kina na bubului me vaka e vakaroti ena Lawa e vola o Mosese. Ia ni sa takalevu tu na kena vakayagataki ena gauna i Jisu, sa matau kina vei ira na lewenivanua mera vakadeitaka na ka era cavuta nira bubului. Na vuna era cakava kina qori me kilai ni dina tiko na ka era tukuna, ia e cavuta sara ga vakarua o Jisu ni cata. Qo ga na ka e vakavulica: “Me ‘Io’ ga na nomu io, me ‘Sega’ na nomu sega.”—Maciu 5:33-37; 23:16-22.

E tukuni ena dua na ivolavosa na Theological Dictionary of the New Testament, “na kena sa matau vei ira na Jiu mera bubuluitaka na ka kece era tukuna” e rairai kilai mai na ka e volai ena Talmud, ni vakamatatataka na bubului me muri kei na kena me kua.

Me vakataki Jisu, eso tale era cata na ivalavala qori. Kena ivakaraitaki, e tukuna me baleta e dua na ilawalawa Jiu na daunitukutuku makawa o Flavius Josephus: “Era vakabauta na ilawalawa qo ni ca sara na bubului, e vinaka na lasu. Era kaya ke bubului e dua me vakabauti kina, sa na okati me tamata lasulasu.” Na nodra ivola na Jiu e kilai me Wisdom of Sirach, e tukuni kina: “O koya e bubului e valavala ca.” E cata gona o Jisu na kena raici vakamamada na bubului. Ke da dau vosa dina e veigauna, ena sega ni vinakati meda bubului meda vakabauti kina.