Kena iMatai: E Bula Tiko e Dua na Ka Nida Mate

Kena itekitekivu: E kaya na New Encyclopædia Britannica (1988), Volume 11, tabana e 25, nira ciqoma na vuku lotu vaKarisito taumada na ivakavuvuli vaKirisi, ni kunekunetaki e dua, sa tiko vua e dua na ka ena bula tiko ga ena gauna e mate kina.

Ka e kaya na iVolatabu: “A sa suka ko koya ki na kena qele; e na siga dina ko ya sa oti na ka e vakanananu kina.”​—Same 146:​4, Ai Vola Tabu.

E tiko beka vei keda na “yalo” e bula tiko nida mate? E kaya na iVolatabu ni igu ni bula, se yalo e solia na Kalou vei keda kei ira na manumanu, e vu ni noda cegu rawa. Na igu ni bula qori e yavala tiko kina na yago. Ia nida mate se o ira na manumanu, sa oti tale ga na yavala ni yago kei na igu ni bula a solia vei keda na Kalou. Eda sa sega tale ni vakila e dua na ka.​—Vakatekivu 3:​19; Dauvunau 3:​19-​21; 9:5.

Me tekivu mai na gauna e vakavulici kina ni bula tiko e dua na ka nida mate, eso tale na taro e vure mai: E lako e vei na ka e bula tiko nida mate? Na cava e yaco vei ira na tamata ca nira mate? Nira sa vakabauta rawa o ira na vakatokai ira mera lotu vaKarisito na ivakavuvuli ni bula tiko e dua na ka nida mate, e rawarawa sara nodra vakabauta e dua tale na ivakavuvuli​—na kama i eli.

Vakatauvatana na tikinivolatabu qo: Dauvunau 3:​19; Maciu 10:28; Cakacaka 3:​23

KA DINA:

E sega ni bula tiko e dua na ka nida mate