ITALANOA NI NONA BULA
Vakalougatataki Au Vakalevu na Kalou
Niu se qai yabaki 17, au dau kauaitaka e levu na ka era taleitaka na itabagone, me vaka na vakailala, qalo, kei na qito soka. Ia dua na yakavi e veisau vakasauri na noqu bula niu coqa vakacalaka ena motopai, au paralasi kina, tekivu mai domoqu me yaco ina qeteqeteniyavaqu. A yaco qori ena rauta na 30 na yabaki sa oti, au sa mai davo tu kina vakadua.
Au susu ena vanua o Alicante, ena tokalau kei Sipeni. Keitou dui lewa ga na ka keitou cakava vakavuvale, levu gona na gauna au yavoki tu ga kina e gaunisala. E voleka e vale e dua na sitoa ni vakavinakataki taya e cakacaka tiko kina o José María, keirau mani veitokani sara. E turaga mamarau, dau kauaitaki au vakalevu, na ka sara ga au dau diva me ratou cakava vei au mai vale. Ni yaco eso na ituvaki dredre, e dau vaka ga na taciqu, e noqu itokani voleka, ia e qase vei au ena 20 na yabaki.
A vuli iVolatabu tiko o José María kei ira na iVakadinadina i Jiova. Au raica ni taleitaka na iVolatabu, dau tukuna vei au na ivakavuvuli dina vakaivolatabu. Au vakarorogo tu ga ena veidokai, au sega ni dau kauai ena veika e kaya. Niu se itabagone, levu tale na ka au malele kina. Ia e vakarau veisau vakadua qori.
VAKACALAKA E VEISAUTAKA NOQU BULA
Au sega ni via talanoataka noqu coqa. A yaco ga qori niu yalowai au qai sega ni qaqarauni. Dua ga na siga e veisau kina vakadua noqu bula. Mai na dua na itabagone bulabula qai kaukaua, vakasauri ga noqu paralasi, au sa mai davo tu qo e valenibula. Dredre sara ga meu vakamatauni au ena bula qo. Au vaqaqa lo tiko ga, ‘Cava tale na yaga ni bula vei au?’
E mai sikovi au o José María niu curu tiko ena vanua era dau qaravi kina na mate bibi. Oti e tuvanaka mera mai raici au na iVakadinadina i Jiova ena ivavakoso e voleka e kea. E uqeti au vakalevu nodra veisiko yani. Niu kau tani ga mai na tabana era qaravi tiko kina na mate bibi, au vulica sara na iVolatabu. Au sa qai kila na vuna eda rarawa tiko kina, da mate vaka kina nona vakatara tiko na veika ca na Kalou. Au vulica tale ga na yalayala ni Kalou me baleta na veigauna se bera mai—nira na tawana na vuravura o ira na uasivi nodra bula, ena sega ni dua me kaya tale: “Au tauvimate.” (Aisea 33:24) E se qai imatai ni gauna meu kila kina e dua na inuinui totoka va qori.
E toso vinaka noqu vuli iVolatabu ena gauna au suka mai kina e valenibula. Au vakayagataka e dua na qiqi e buli vakatabakidua me baleta na kequ ituvaki, rawa gona niu tiko ena so nodra soqoni na iVakadinadina i Jiova, au vakaitavi tale ga ena cakacaka vakavunau. Au papitaiso ena ika5 ni Noveba, 1988, niu se qai yabaki 20, ena dua na tavu ni sili e caka me ganiti au. E vukei au na Kalou o Jiova me donu noqu rai me baleta na noqu bula. Ia au na vakaraitaka vakacava noqu vakavinavinaka?
SEGA NI TAROVI AU NOQU LOKILOKI
Au saga sara ga meu kua ni vakalaiva na kequ ituvaki me tarovi kina na veika kece au rawa ni cakava ena veiqaravi vei Jiova. Au via toso vakayalo. (1 Timoci 4:15) A sega ni rawarawa taumada ni ratou saqata noqu vakabauta vou e vale. Ia era vukei au na itokani vakabauta, nira taciqu ra ganequ vakayalo. Era dau kauai meu kua ni calata na soqoni, meu vakaitavi wasoma tale ga ena cakacaka vakavunau.
Ni toso na gauna, sa vinakati meu qaravi vakatabakidua. Dua toka na gauna noqu vaqaqara voli, au sa qai kunea e dua na vanua vinaka era dau qaravi kina na lokiloki e Valencia, e 160 na kilomita mai na vualiku kei Alicante. Au sa vakaitikotiko tudei kina ena gauna qo.
Au sega ni veitosoyaki rawa, ia e gu na lomaqu meu tukuna noqu vakabauta vei ira eso tale
Au sega ni veitosoyaki rawa, ia e gu na lomaqu meu qaravi Jiova tiko ga. Au vakayagataka na noqu ilavo ni malumalumu kei na so tale na ilavo e dau soli vei au me voli kina e dua na kompiuta me biu e yasa ni noqu loga. Au volia tale ga e dua na mobail. Dua na dauveiqaravi e kea e dau mai dolava tiko vakamataka na noqu kompiuta kei na mobail. Au vakayagataka na kumiqu meu tabaka kina na bulukau era tu ena kompiuta. Au dau katia tale ga e dua na tikinikau meu rawa ni tabaka kina na matanivola, meu qiri tale ga ena noqu mobail.
Na tikinikau meu tabaka kina na naba ni mobail
E vukei au vakacava na iyaya vakalivaliva qo? Au rawa sara ga ni rai kina ena website na jw.org kei na Vale ni Vakatawa LAIBRI ENA INTERNET. Dua dina na ivukevuke vinaka vei au! Au dau vuli wasoma e veisiga, au vakadidike tale ga ena ivola vakaivolatabu meu vulica tiko ga kina na veika me baleta na Kalou kei na nona itovo talei. Niu galili se yalolailai, e dau tiko na ka ena website e vakamarautaki au.
E yaga sara na kompiuta meu vakarorogo kina ena soqoni, au saumi taro tale ga. Au rawa ni vakamacala, masu, vunau, se wili Vale ni Vakatawa ena gauna au lesi kina. Au sega ni dau gole ina soqoni qori, ia e vaka ga au tiko kei ira na lewe ni ivavakoso.
Au rawa sara ga ni vakaitavi vakalevu ena cakacaka vakavunau niu vakayagataka na talevoni kei na kompiuta. Au sega ni lako e veivale me vakataki ira e levu na iVakadinadina i Jiova, ia e sega ni tarovi au qori. Niu vakayagataka na iyaya va qori, au rawa kina ni tukuna vei ira eso tale na noqu vakabauta. Au dau taleitaka vakalevu na veivosaki ena talevoni, ra kerei au kina na qase ni ivavakoso meu tuvanaka na cakacaka vakavunau ena talevoni. E yaga sara vakalevu na ituvatuva qo vei ira na lewe ni ivavakoso era tu ga e vale ena vuku ni kedra ituvaki.
Veivakavulici ena iVolatabu
Ia au sega ni vakayagataka tu ga e veigauna na iyaya vovou qori. E tiko tale ga na gauna era dau mai sikovi au kina e veisiga na noqu itokani voleka. Era dau veitomani mai na wekadra kei na so tale era dau taleitaka na veitalanoa vakaivolatabu. So na gauna era dau kerea meu vakamacala sara ga. Era dau veisiko tale ga yani eso na vuvale, ra qai kerea meu vakaitavi ena nodra sokalou vakavuvale. Au dau taleitaka nira mai dabe na lalai ena yasa ni noqu loga, ra qai tukuna na vuna ra lomani Jiova kina.
Sokalou tiko vakavuvale kei na so na itokani
Au dau taleitaka tale ga nodra lai veisiko yani e levu. Era osota tu ga noqu rumu na vulagi, so era tiko voleka ga, so tale era lako sara mai vakayawa. Era kurabui kina na dauveiqaravi ena vale ni malumalumu. Au dau vakavinavinakataki Jiova e veisiga niu mai lewena tu e dua na mataveitacini era duavata.
TOSO TIKO GA
Ni dua e taroga seu sa vakacava tiko, au dau kaya ga, “Io, toso tu ga vakamalua!” Au kila niu sega ni sasaga duadua tiko ga. Se mani cava eda sotava na lotu vaKarisito kece, eda sasaga tiko ga ena “ivalu vinaka ni vakabauta.” (1 Timoci 6:12) Cava e vukei au meu vosota tiko ga? Au masuti Jiova e veisiga, au vakavinavinakataki koya ni vakainaki noqu bula. Au saga tale ga meu qarava vakalevu na Kalou, meu rai vakanamata tiko ga e liu.
O José María
Au dau vakasamataka na bula ena vuravura vou, ena gauna au sa na cici au rika tale ga kina. Ena so na gauna keirau dau veiwali kei na noqu itokani vinaka o José María—e yava lokiloki tale ga—me keirau na veitaucici balavu. Au dau tarogi koya: “O cei ena qaqa?” E sauma lesu mai: “Sega ni bibi o koya e qaqa, bibi ga me daru na bula ena Parataisi, me daru veitaucici kina.”
E dredre toka noqu vakamatauni au ena bula qo niu sa lokiloki tu. Au kila niu a cakava e dua na ka lialia niu se itabagone, au sotava kina na leqa. Ia au vakavinavinaka ni sega ni biuti au o Jiova. E vakalougatataki au vakalevu—me dua noqu vuvale vakayalo, meu guta na bula, meu marautaka noqu vukei ira eso tale kei na inuinui totoka me baleta na gauna se bera mai. Keu vakamacalataka vakalekaleka na noqu bula, au rawa ga ni kaya ni vakalougatataki au vakalevu o Jiova.
Rawa ni o Wilika Tale ga
IVOLA & BROCHURE
Ena Rawa ni Oti na Rarawa?
E kaya na iVolatabu ni cata na veika tawadodonu na Kalou qai kauaitaki ira dina na tamata. Na kena yaga vei iko.
NA VALE NI VAKATAWA
Matanitu ni Kalou—Cava me Bibi Kina Vei Iko?
Na kena isau e vakatau sara ga vei iko.
