NA CAVA o dau cakava ni matadredredre vei iko e dua? Macala ga ni o na matadredredre tale vua. De dua o vakila na marau levu ni o raica na nona matadredredre e dua. E sega ni kurabuitaki qori baleta na nodra matadredredre na noda itokani se o ira mada ga eda sega ni veikilai, e vaka na mate e dau veitakavi qai vakamarautaka na lomada. E kaya e dua na yalewa o Magdalena: “E dau matadredredre na watiqu o Georg. Dua na vakacegu levu au vakila ni dau sota na matai keirau, e seavu sara ga noqu lomaleqa.”

Na matadredredre e vakaraitaka na vinaka ni ivakarau ni lomana e dua, e kilai kina ni dau veilasamaki, veiwali, qai mamarau. E tukuni ena dua na ulutaga ni mekesini na Observer e tabaki ena internet ni “matadredredre . . . e tiki ni noda bula.” E kaya tale na ulutaga qori ni o ira mada ga na gone sucuvou e rawa nira “kila na ivakarau ni yalona e dua mai na irairai ni matana.” E tomana na ulutaga: “E levu era kila rawa na kedra itukutuku eso tale mai na nodra matadredredre, ra qai vakayagataka na itukutuku qori me veidusimaki ena ka era cakava.” *

Ena dua na vakadidike a vakayacori ena Harvard University mai Merika, e laurai kina ni vakatau vakalevu na ivakarau ni yalodra na itabaqase kei na nodra ivukivuki ena irairai ni matadra na veiqaravi. Era marau na itabaqase qai laurai na veisau ena nodra bula ke ra  raica nira “veikauaitaki, veinanumi, qai yalololoma” o ira na veiqaravi. Ia era sega ni taleitaki ira na veiqaravi na itabaqase nira cakacaka galugalu tu ga ra qai sega ni via vosa.

Ena yaga sara mada ga vei iko na nomu matadredredre. E laurai ena so na vakadidike ni na vakanuideitaki iko, o na marau qai vakalailaitaka na lomaocaoca. O na sega ni vakila qori ke o dau mataruburubu.

“VAKAYALOQAQATAKI AU” NA MATADREDREDRE

A iVakadinadina i Jiova donuya na iKarua ni iValu Levu o Magdalena sa cavuti oti mai. Eratou kau vakavuvale ina dua na keba ni veivakararawataki e Jamani ni ratou sega ni via tokona na veiliutaki i Itala. E nanuma lesu o Magdalena: “Era vakatabuya ena so na gauna na yadra me keimami veivosaki kei ira na vo ni kaivesu. Ia era sega ni rawa ni biuta e dua na vakatatabu me baleta na irairai ni mata. Na nodrau matadredredre mada ga na tinaqu kei na tuakaqu e vakayaloqaqataki au qai vukei au meu vosota.”

De dua o na nanuma ni o sega ni rawa ni matadredredre ena vuku ni lomaocaoca ni bula ni veisiga. Ia nanuma tiko na nomu rai e rawa ni vakatau tale ga vakalevu ena ka o dau vakasamataka. (Vosa Vakaibalebale 15:15; Filipai 4:8, 9) E bibi gona mo dau vakasamataka na veika e vinaka qai vakavu marau. * Era raica e levu ni yaga na wili iVolatabu kei na masu. (Maciu 5:3; Filipai 4:6, 7) Na vosa “marau,” “reki,” kei na so tale na vosa veiwekani era basika vaka vica vata na drau ena iVolatabu! Ke o wilika gona e dua se rua na tabana e veisiga, de dua ena vukei iko ya mo dau matadredredre tale ga.

Kua ni waraka mera matadredredre vei iko e liu eso tale. Vakaliuliu mo matadredredre vua e dua tale, o sa veivuke sara tiko ga ya ena nona marautaka na nona qaravi itavi ena loma ni dua na siga. Ia me donu na inaki ni nomu matadredredre, qori e dua na isolisoli ni Kalou ena vakamarautaki keda kei ira era raica noda matadredredre.