EDA DUATANI VAKALEVU NA TAMATA. EDA VOLAVOLA, DROINI, BULI IYAYA, EDA DAU VAKASAMATAKA ESO NA TARO BIBI ME BALETA NA BULA: Na cava e buli kina na lomalagi kei na vuravura? Eda mai tu vakacava ena vuravura qo? Na cava na inaki ni bula? Na cava ena yaco ena veigauna se bera mai?

Eso era sega ni via vakasamataka na taro va ya nira nanuma ni na dredre me saumi. Era vakabauta eso tale na bula vakaidewadewa, era nanuma kina ni sega ni vakaibalebale vei ira na taro ya. E kaya na parofesa ni itukutuku makawa kei na baioloji o William Provine: “E sega na kalou, e sega ni dua na ka e vakainaki. E sega na ivakatagedegede ni itovo, rawa ni vakaveitalia tu ga na bula.”

Eso era sega ni duavata kei na rai qori. Era vakabauta ni tuvanaki vakamaqosa na veika e lomalagi kei na vuravura. E sega tale ga ni vakamelei na donu kei na vakasakiti ni lawa e dusimaka nodra veitosoyaki. Ena levu ni nodra qoroqoro, era via vakatotomuria sara ga ena iyaya era bulia na ka era cakava na veika bula. Nira vakasamataka na vereverea kei na buli vakamatau ni veika bula, era vakadeitaka nira sega ni basika ga vakataki ira, e buli ira e dua e vuku.

Qori na vuna era dikeva tale kina nodra rai eso era vakabauta na bula vakaidewadewa. Dikeva mada e rua na kena ivakaraitaki.

VUNIWAI NI MONA O ALEXEI MARNOV. E kaya: “E sega ni vakabauti na Kalou e koronivuli, e vakavulici kina na bula vakaidewadewa. E tukuni ni o koya e vakabauta na Kalou, e sega ni kila e levu na ka me baleta na bula.” A qai veisau nona rai o Alexei ena 1990.

E kaya: “Au dau saga meu kila na ivakamacala dodonu ni veika e tu wavoliti keda, wili kina na noda mona. E tukuni ni tikiniyago qo e dua vei ira na ka vereverea duadua me bau buli e lomalagi kei vuravura. Ia vakacava e buli na mona me kila se cakacakataka na ka me yacova ga ni mate e dua? Qori ena sega toka ni vakaibalebale. Au mani lomatarotarotaka: ‘Eda mai tu vakacava ena vuravura qo? Na cava na inaki ni bula?’ Niu vakasamataka vakatitobu na tikina qori, au vakadeitaka kina ni tiko na Dauveibuli.”

E vulica na iVolatabu o Alexei ni via kila na inaki ni bula. E vuniwai o watina qai sega ni vakabauta na Kalou. A vulica tale ga na iVolatabu ni toso na gauna me vakacala kina na ka e vulica o Alexei. Ia qo rau sa vakabauta ruarua na Kalou, erau sa kila tale ga ena iVolatabu na inaki ni Kalou me baleti keda na kawatamata.

SAENITISI O  HUABI YIN. A vulica o Huabi Yin na ka vakasaenisi qai vica vata na yabaki nona vakadidike voli me baleta na matanisiga.

E kaya o Huabi: “Ni keimami dau vakadidike na saenitisi, keimami raica ni sa tu rawa e dua na lawa e cecere cake qai donu vinaka. Au lomatarotarotaka kina, ‘E basika vakacava na lawa qori? Ke vinakati me lewai vinaka na ka lalai mada ga me vaka na waqa ni buka ena gauna ni vakasaqa, qai wacava sara na katakata ni matanisiga. O cei mada e cakava rawa ya?’ Toso na gauna au vakadeitaka ni kena isau e cavuti ena imatai ni yatuvosa ena iVolatabu: ‘Ena ivakatekivu, e bulia na lomalagi kei na vuravura na Kalou.’”​—Vakatekivu 1:1.

E vakayacori e levu na vakadidike vakasaenisi ni via kilai na isau ni taro va qo: E cakacaka vakacava na noda mona? Na cava e vakavuna na katakata kei na rarama ni matanisiga? Ia erau dikeva o Alexei kei Huabi ni bibi cake na taro e saumi ena iVolatabu, kena ivakaraitaki: Na cava e buli kina na lomalagi kei na vuravura? Na cava e buli kina na kena lawa? Na cava na inaki ni bula?

E kaya na iVolatabu me baleta na vuravura: “E sega ni bulia [na Kalou] me lala, e bulia ga me tawa.” (Aisea 45:18) Io, e tiko na inaki ni nona bulia na vuravura na Kalou. Ena vakamacalataki na inaki qori ena ulutaga e tarava, qai veisemati vinaka kei na noda inuinui ni veigauna se bera mai.