“Ni dau veivosoti . . . vakarawarawa ke dua e didivaka e dua na ka vua e dua tale.”—KOLOSA 3:13.

Eda dau cala kece. De dua eda na vakacudrui ira eso tale, se ra vakacudrui keda. Kena ibalebale, eda vinakata kece meda veivosoti, meda vosoti tale ga. Nida veivosoti eda na sega ni cati ira na vakacudrui keda. Eda na ‘sega ni sauma na ca’ e caka vei keda, eda na sega ni kauta cake tale mai na nodra cala eso tale se malumalumu. (Roma 12:17) Ia vakacava ke mosimosi na ka e caka vei keda qai dredre meda guilecava? Meda veivosaki vakadodonu ena veidokai kei koya e vakacudrui keda. Me noda inaki meda veiyaloni, meda kua ni vakadonui keda ga se vaqara cala.—Roma 12:18.

“Moni yalomalumalumu ena nomuni okati ira na kena vo mera uasivi kemuni.”—FILIPAI 2:3.

Ke da yalomalumalumu qai veidokai, era na taleitaki keda eso tale. Era kila nida na veinanumi qai yalovinaka, eda na sega ni vakamosia  na lomadra. Ia ke da dau veibeci se muri lomada, eda na vakavuna na veicati kei na veivala. Era na yawaki keda eso tale, qai sega ni levu na noda itokani.

“Ni sega ni dau veivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.”—CAKACAKA 10:34, 35.

Na Dauveibuli e sega ni vakaduiduitaka e dua ena vuku ni vanua e cavutu mai kina, nona vosa, itutu, se roka ni yagona. “E bulia na matatamata kece mai na dua ga na tamata.” (Cakacaka 17:26) Eda rawa ni kaya gona nida dua ga na mataveitacini na kawatamata. Nida yalovinaka qai dokai ira na tamata kece, era na marau, eda na marau tale ga, vakauasivi na noda Dauveibuli.

“Moni vakaisulu ena . . . yalomalua.”—KOLOSA 3:12.

Nida yalomalua, era na taleitaki keda eso tale. Era na sega ni rere mera vosa vei keda se vakadodonutaki keda, nira kila nida yalomalua. Ni dua e sevaki keda, na noda yalomalua ena vakamalumutaka nodra cudru. E kaya na Vosa Vakaibalebale 15:1, “Na vosa vakayalovinaka e vakaseavutaka na cudru.”

“E marau vakalevu o koya e solia na ka, vakalailai o koya e taura na ka.”—CAKACAKA 20:35.

Levu nikua era kocokoco qai dau nanumi ira ga. Ia eda na marau vakalevu nida lomasavu. (Luke 6:38) Era marau na dau lomasavu, nira lomani ira vakalevu na tamata mai na iyau. Qori ena uqeti ira mera dau vakavinavinaka ni dua e solika vei ira. (Kolosa 3:15) Mo taroga, ‘Au dau via maliwai ira na mamaqi kei ira na sega ni dau vakavinavinaka? Se, o ira na dau lomasavu kei ira na dau vakavinavinaka?’ Cava eda vulica kina? Cakava vei ira eso tale na ka o vinakata mera cakava vei iko.—Maciu 7:12.