Akwɛ́ e è nɔ zán dó ahwan mɛ é sukpɔ́ tawun.

•   “Ðo xwe e wá yi é mɛ ɔ, acɛkpikpa lɛ́ gbɔn gbɛ ɔ bǐ mɛ zán ɖɔ̌la Amɛlíka tɔn lǐva 2200 dó ahwan sín tamɛ. Akwɛ́ énɛ́ e è zán dó ahwan kpáxwé é sukpɔ́ hú xwe ɖěvo ɖěbǔ tɔn.”—The Washington Post, 13 février 2024.

 Nǔ e hɛn gblé wɛ ahwan ɖe é hú gǎn akwɛ́. Mǐ ní kpɔ́n kpɔ́ndéwú tɔn ɖokpó: Ahwan e fun wɛ è ɖe ɖo Ukraine é.

•   Sɔ́ja lɛ́. Sɔgbe kpó nǔlínlɛ́n ɖé lɛ́ kpó ɔ, sɔ́ja 500000 mɔ̌ wɛ è ko hu alǒ gblé wǔ, sín hwenu e ahwan ɔ bɛ́ ɖo xwe we ɖíe é.

•   Toví lɛ́. Kpó nǔ e Kplékplé akɔta lɛ́ tɔn ɖɔ é kpó ɔ, toví kpaa 28000 jɛjí wɛ ko kú alǒ gblé wǔ. É ɖo mɔ̌ có, Kplékplé akɔta lɛ́ tɔn sín gǎn ɖaxó ɖokpó ɖɔ: “È sixú xa mɛ nabí e ahwan baɖabaɖa élɔ́ ko gblé gbɛ dó ná é ǎ.” a

 Wǔvɛ́ e gbɛtɔ́ lɛ́ nɔ se ɖó ahwan kpó hunnyahunnya lɛ́ kpó wú gbɔn gbɛ ɔ bǐ mɛ lɛ́ é sukpɔ́ tawun.

•   Gbɛtɔ́ lǐvi 114. Mɛ nabí e sɛ tɛn, ɖó ahwan kpó dǎkaxixo kpó wú gbɔn gbɛ ɔ bǐ mɛ, bɔ è sɔ́ kɛ́n yětɔn ɖo septembre 2023 é nɛ́.

•   Gbɛtɔ́ lǐvi 783. Mɛ nabí e ɖo xwi ɖí xá nǔɖuɖuhwedómɛ wɛ lɛ́ é nɛ́. “Hunnyahunnya lɛ́ wɛ kpo ɖo nǔ e nɔ dɔn adɔ wá hú gǎn é nyí wɛ, bɔ mɛ nabí e adɔ ɖo ya dó ná wɛ gbɔn gbɛ ɔ bǐ mɛ lɛ́ é 70 ɖo 100 jí wɛ nɔ nɔ xá ɖěɖěe mɛ ahwan kpó dǎkaxixo kpó ɖo nǔ gba ɖe wɛ lɛ́ é mɛ.”—Programme alimentaire mondial.

 Ahwan ka ná wá hán gbeɖé a? Mǐ ka sixú ɖó nukún ɖɔ fífá ná wá tíin a? Gbe ɖokpó ka ná wá su bɔ mɛ ɖěbǔ sɔ́ ná nyí yatɔ́nɔ ǎ, lobɔ mɛ bǐ ná kpé wú bo ná nɔ ɖu vǐví sínsɛ́n e ayǐkúngban ɔ nɔ ná lɛ́ é tɔn, bo lɛ́ ɖó nǔɖuɖu túnflá a? Étɛ́ Biblu ka ɖɔ?

 Biblu ɖɔ ɖ’ayǐ ɖɔ ahwan ná tíin ɖo ayǐkúngban ɔ bǐ jí, bo sɔ́ ahwan jlɛ́ dó sɔ́xátɔ́ e ɖo sɔ́ kun wɛ é wú.

•   “Bɔ sɔ́ ɖěvo tɔ́n, bo nyí sɔ́ vɔvɔ; è ná acɛ mɛ e ɖo sɔ́ ɔ jí ɔ ɖɔ é ní bló bónú ahwanfunfun ní gba kpé ayǐkúngban ɔ jí, bónú gbɛtɔ́ lɛ́ ɖě ná nɔ hu ɖě. È sɔ́ hwǐ ɖaxó ɖokpó dó así n’i.”—Nǔɖexlɛ́mɛ 6:4.

 Sɔ́kuntɔ́ we ɖěvo lɛ́ jɛ gǔdo nú sɔ́kuntɔ́ nǔjlɛ́dónǔwú tɔn énɛ́, bɔ yě nɔ te nú adɔ kpó kú kpó e jɛmɛjí kpó nǔ ɖěvo lɛ́ kpó nɔ dɔn wá é. (Nǔɖexlɛ́mɛ 6:5-8) Nú a ná tuun nǔ ɖěvo lɛ́ dó nǔɖɔɖayǐ Biblu tɔn énɛ́ kpó hwɛjijɔ e wú mǐ sixú kú d’é jí ɖɔ yě ɖo jijɛnu wɛ ɖo hwe mǐtɔn nu lɛ́ é kpó wú hǔn, xa xóta “Sɔ́xátɔ́ ɛnɛ lɛ́: Mɛ̌ mɛ̌ é ka nú yě?”

 Zaanɖé din ɔ, è sɔ́ ná zán dɔkun gbɛ ɔ tɔn lɛ́ ɖě dó ahwan mɛ ǎ. Amɔ̌, ényí gbɛtɔ́ lɛ́ wɛ ná bló bɔ nǔ ná nyí mɔ̌ ǎ. Biblu ɖɔ:

•   Mawu “ná sú ahwan kún dó gbɔn gbɛ ɔ bǐ mɛ.”—Ðɛhan 46:10.

•   “È ná súnsún ɖasin bǐ sín nukún yětɔn mɛ; kú sɔ́ ná tíin ǎ, aluwɛ sɔ́ ná tíin ǎ, alěníná sɔ́ ná tíin ǎ, wǔvɛ́ mimɔ sɔ́ ná tíin ǎ; nǔ xóxó lɛ́ ko bú.”—Nǔɖexlɛ́mɛ 21:4.

•   Mawu ná bló bɔ mɛ bǐ ná nɔ fífá mɛ. “Togun Mawu tɔn ná mɔ fífá; é ná vo, é sɔ́ ná nɔ lin nǔ ɖě ǎ.”—Ezayíi 32:18.

 Sɔgbe kpó nǔɖɔɖayǐ Biblu tɔn kpó ɔ, ahwan kpó nǔ ɖěvo e ɖo jijɛ wɛ bɔ mǐ nɔ mɔ égbé lɛ́ é kpó xlɛ́ ɖɔ fífá sín hwenu énɛ́ ko ɖo kɛ́nnɛ́kɛ́nnɛ́.

 Nɛ̌ Mawu ka ná bló bɔ fífá mɔ̌hun ná tíin ɖo sɔgúdo gbɔn? É ná bló mɔ̌, gbɔn acɛkpikpa tɔn jǐxwé tɔn ɔ, alǒ Axɔ́súɖuto tɔn gblamɛ. (Matíe 6:10) Bo ná dó tuun nǔ e Axɔ́súɖuto énɛ́ nyí é kpó le e é sixú hɛn wá nú we é kpó hǔn, kpɔ́n video Étɛ́ ka nyí Axɔ́súɖuto Mawu tɔn?