1. Xɛsi alɔkpa tɛ́ lɛ́ mɛ lɛ́ ka nɔ ɖi ɖo kpaa mɛ?

 LIN tamɛ dó ninɔmɛ élɔ́ lɛ́ e mɛ Kúnnuɖetɔ́ Jehovah tɔn ɖé lɛ́ gbɔn é jí. Nestor kpó asi tɔn María kpó jló ná wa sinsɛnzɔ́ ɖo fí e hudó sukpɔ́ ɖe é. * Amɔ̌, bo ná dó kpé énɛ́ wú ɔ, yě ɖó ná bló hǔzúhúzú lɛ́ ɖo gbɛzán yětɔn mɛ. Yě ka ɖo xɛsi ɖi wɛ ɖɔ ényí émí ma sɔ́ ɖó akwɛ́ nabí ɖé ǎ ɔ, émí sixú gɔn awǎjijɛ jɔ awǎjijɛ ɔ ɖó. Biniam nɔ nɔ to e mɛ è klán gbe xá azɔ̌ mǐtɔn ɖe é ɖokpó mɛ. Ée é húzú Kúnnuɖetɔ́ Jehovah tɔn é ɔ, é mɔ ɖɔ ɖó émí ɖo togun Mawu tɔn mɛ wútu ɔ, è sixú dó ya nú émí. Énɛ́ zɔ́n bɔ xɛsi ɖi i tawun. Amɔ̌, lěe mɛ e ɖo xwédo tɔn mɛ lɛ́ é ná wa nǔ gbɔn hwenu e yě ná mɔ nǔ jɛ sinsɛn yɔ̌yɔ́ e mɛ é ɖe é wú é tlɛ lɛ́ dó xɛsi i hú gǎn. È mɔ kansɛ́ɛ baɖabaɖa ɖé nú Valérie bɔ é ɖo tíntɛ́nkpɔ́n wɛ bo ná mɔ dotóo mɛzɛtɔ́ e ná ɖó sísí nú nǔ ɖěɖěe é ɖi nǔ ná bɔ yě jínjɔ́n Biblu jí, bo kúnkplá hun lɛ́ é. É ɖo wɛn ɖɔ é ɖo xɛsi ɖi wɛ ɖɔ émí táá kú.

2. Aniwú mǐ ka ɖó ná dó gǎn ba mɔ tɛn dó ɖu ɖo xɛsi mǐtɔn lɛ́ jí?

² Xɛsi énɛ́ lɛ́ ɖě ka ko ɖi we kpɔ́n a? Mǐ mɛ gěgé wɛ nǔ nɔ cí mɔ̌ ná. Ényí mǐ ma kplɔ́n bo nɔ ɖu ɖo xɛsi e nɔ ɖi mǐ lɛ́ é jí ǎ ɔ, mǐ ná ɖibla wá gbeta masɔgbe lɛ́ kɔn, bɔ énɛ́ ná ɖibla wa nǔ dó xɔ́ntɔn e mǐ kpó Jehovah kpó zun é wú. Nǔ e ba wɛ Satáan ka ɖe é nɛ́. É nɔ lɛ́ tɛ́nkpɔ́n bo ná bló bónú mǐ ní má se tónú nú sɛ́n Jehovah tɔn lɛ́ ó; gbe e è ɖe nú mǐ ɖɔ mǐ ní jlá wɛn ɖagbe ɔ é lɔ ɖo sɛ́n énɛ́ lɛ́ mɛ. (Nǔɖe. 12:17) Mɛ nyanya e mɛɖé nú ma nɔ blá wǔ ná ǎ é wɛ Satáan nyí, bo lɛ́ ɖó hlɔ̌nhlɔ́n. Amɔ̌, a sixú nya xɛ ɖo hwiɖée jí bo ma wá jɛ fɛn tɔn mɛ ó. Gbɔn nɛ̌ é?

3. Étɛ́ ka ná d’alɔ mǐ bɔ mǐ ná ɖu ɖo xɛsi e mǐ nɔ ɖi lɛ́ é jí?

³ Ényí mǐ kú d’é jí ɖɔ Jehovah yí wǎn nú mǐ, alǒ ɖo xógbe ɖěvo mɛ ɔ, é ɖo ahwan mǐtɔn mɛ ɔ, mǐ sixú bló bɔ gǎn e dó  wɛ Satáan ɖe lɛ́ é ná cifo. (Ðɛh. 118:6) Ði kpɔ́ndéwú ɔ, mɛ e wlán Ðɛhan 118gɔ́ ɔ é gbɔn ninɔmɛ vɛ́ wǔ ɖé lɛ́ mɛ. Kɛntɔ́ gěgé wɛ é ɖó, mɛ e tlɛ ɖo tɛn nukúnɖéjí mɛ lɛ́ é ɖé lɛ́ tlɛ ɖo kɛntɔ́ tɔn lɛ́ mɛ (wěmafɔ 9, 10). Hweɖélɛ́nu ɔ, é gbɔn ninɔmɛ e ɖó linkpɔ́n n’i tawun lɛ́ é mɛ (wěmafɔ 13). Gɔ́ ná ɔ, Jehovah lɛ́ dɔn tó n’i dó nǔjɔnǔ mɛ (wěmafɔ 18. Nǔ ɖo mɔ̌ có, ɖɛhanwlántɔ́ ɔ ji han ɖɔ: “Un ɖi xɛsi ǎ.” Étɛ́ ka zɔ́n bɔ ayi tɔn j’ayǐ b’ɛ lɛ́ ɖeji sɔmɔ̌? É tuun ɖɔ Jehovah e nyí Tɔ́ émítɔn jǐxwé tɔn é gbɛ́ nǔ nú émí có, é ka yí wǎn nú émí tawun. Ðɛhanwlántɔ́ ɔ kú d’é jí ɖɔ gbɛ ná bo gbɔn ɖěbǔ ɔ, Mawu wǎnyíyínɔ émítɔn ná ɖo gbesisɔmɛ hwebǐnu bá d’alɔ émí.—Ðɛh. 118:29.

4. Ényí mǐ ɖeji ɖɔ Mawu yí wǎn nú mǐ ɔ, xɛsi alɔkpa tɛ́ lɛ́ jí mǐ ka sixú ɖu ɖe?

⁴ É byɔ́ ɖɔ mǐ ní kú d’é jí ɖɔ Jehovah yí wǎn nú mǐ mɛ ɖokpó ɖokpó. Énɛ́ ná d’alɔ mǐ bɔ mǐ ná ɖu ɖo xɛsi vovo atɔn élɔ́ lɛ́ e è nɔ ɖi ɖo kpaa mɛ é jí: (1) xɛsi e mǐ nɔ ɖi ɖɔ mǐ kún sixú kpé wú bo sú hudó xwedó mǐtɔn tɔn sín do lɛ́ ó é, (2) xɛsi ɖi nú gbɛtɔ́, (3) xɛsi ɖi nú kú. Mɛ ɖěɖěe xó mǐ ɖɔ ɖo akpáxwé nukɔntɔn ɔ mɛ lɛ́ é kpé wú bo ɖu ɖo xɛsi yětɔn lɛ́ jí ɖó yě kú d’é jí ɖɔ Mawu yí wǎn nú émí.

5. Nǔ tɛ́ lɛ́ ka sixú ɖó adohu adohu ɖaxó nú tatɔ́ xwédo tɔn ɖé? (Kpɔ́n ɖiɖe e ɖo akpa ɔ jí é.)

⁵ Tatɔ́ xwédo tɔn e nyí klisánwun é nɔ ylɔ́ nukúnkpíkpé dó xwedó tɔn wú ɖo agbaza lixo sín azɔ̌ ɖɔ nǔjɔnǔ. (1 Tim. 5:8) Ényí tatɔ́ xwédo tɔn wɛ nú we ɔ, bóyá ɖo jɛmɛjí agaɖanu din tɔn ɔ hwenu ɔ, ado sixú ko hu we ɖɔ azɔ̌ ná gblé dó we. Ado sixú ko lɛ́ hu we ɖɔ a kún ná kpé wú bo ná nǔɖuɖu xwédo towe lobo lɛ́ sú xɔkwɛ́ ó. A sixú ko lɛ́ ɖi xɛsi ɖɔ, ényí azɔ̌ gblé dó émí ɔ, émí kún ná kpé wú bo lɛ́ mɔ ɖěvo ó. Alǒ, lěe é nyí gbɔn nú Nestor kpó María kpó e xó mǐ ɖɔ wá yi é ɖɔhun ɔ, hǔzúhúzú e a ná bló ɖo agbazazɔ́ towe sín akpáxwé b’ɛ ná kúnkplá gbɛzán towe é sixú nɔ hu ado nú we. Ðó nǔ nɔ cí mɔ̌ nú mɛ gěgé wútu ɔ, Satáan ko kpé wú bo bló bɔ, mɛ gěgé ɖó Jehovah sinsɛn te.

6. Linlin tɛ́ Satáan ka nɔ zɔ́n bɔ mǐ ná ɖó?

⁶ Satáan nɔ tɛ́n kpɔ́n bo ná bló bɔ mǐ ná lin ɖɔ Jehovah kún ɖo mǐtɔn ɖɔ wɛ ó, é kún ka ná d’alɔ mǐ bónú mǐ ná kpé nukún dó xwédo mǐtɔn wú ó. Wǎgbɔ tɔn ɔ, mǐ sixú wá gbeta ɔ kɔn ɖɔ ényí é ná bo tlɛ byɔ́ ɖɔ mǐ ní wa nǔ ɖěbǔ, énɛ́ wɛ nyí ɖɔ ényí é ná bo tlɛ byɔ́ ɖɔ mǐ ní wɔn ya nú nǔgbódodó Biblu tɔn lɛ́ bo ná dó sixú kpo ɖo azɔ̌ e wa wɛ mǐ ɖe din é wa wɛ ɔ, mǐ ná wa.

7. Gǎnjɛwú tɛ́ Jezu ka ná mǐ?

⁷ Jezu e tuun Tɔ́ ɔ hú mɛ ɖěvo ɖěbǔ é ná gǎnjɛwú mǐ ɖɔ Mawu mǐtɔn “ko tuun nǔ e hudó [mǐ] ɔ, cóbɔ [mǐ] wá ja byɔ̌byɔ́ ɛ gbé.” (Mat. 6:8) Gɔ́ ná ɔ, Jezu tuun ɖɔ Jehovah ɖo gbesisɔmɛ bo ná sú hudó mǐtɔn lɛ́ sín do. Ðó mǐ nyí klisánwun wútu ɔ, xwédo Mawu tɔn mɛ wɛ mǐ ɖe. Mǐ sixú ɖeji ɖɔ ɖó Jehovah wɛ nyí Tatɔ́ xwédo ɔ tɔn wútu ɔ, é ná wa nǔ sɔgbe xá nǔgbódodó e ɖo 1 Timɔtée 5:8 mɛ é.

8. (a) Étɛ́ ka ná d’alɔ mǐ bɔ mǐ ná ɖu ɖo xɛsi e mǐ nɔ ɖi ɖɔ mǐ kún ná kpé wú bo sú hudó xwédo mǐtɔn tɔn sín do ó é jí? (Matíe 6:31-33) (b) Nɛ̌ mǐ ka sixú wa nǔ asú kpó asi kpó e ɖo nǔɖuɖu má xá nɔví nyɔ̌nu ɖokpó wɛ ɖo ɖiɖe ɔ mɛ é ɖɔhun gbɔn?

⁸ Ényí mǐ kú d’é jí ɖɔ Jehovah yí wǎn nú mǐ kpó xwédo mǐtɔn kpó ɔ, mǐ ná ɖeji ɖɔ mǐ ná mɔ nǔ e hudó mǐ lɛ́ é. (Xa Matíe 6:31-33.) Jehovah jló ná sú nǔ e hudó mǐ lɛ́ é sín do nú mǐ, ɖó é nɔ ná nǔ mɛ kpó wǎnyíyí kpó, lobo nɔ lɛ́ hun alɔ dó wa mɔ̌! Hwenu e é bló ayǐkúngban ɔ é ɔ, é nyí dandannú e sín hudó mǐ ɖó bá nɔ gbɛ lɛ́ é  kpowun wɛ é ná mǐ ǎ. É dá nǔ gěgé ɖó ayǐkúngban ɔ jí bónú mǐ ná ɖu vǐví yětɔn. (Bǐb. 2:9) Hweɖélɛ́nu ɔ, nú é ná bo tlɛ nyí nǔ e sín hudó mǐ ɖó kpowun é jɛ́n ɖo mǐ sí ɔ, mǐ sixú flín ɖɔ Jehovah wɛ nyí tɔn bɔ mǐ ɖó nǔ e hudó mǐ é. (Mat. 6:11) Mǐ ɖó ná hɛn d’ayi mɛ ɖɔ nǔ e Mawu wǎnyíyínɔ mǐtɔn ná ná mǐ din, bo ná lɛ́ ná mǐ ɖo sɔgúdo lɛ́ é ná hú gǎn nǔ ɖěbǔ e mǐ ná sɔ́ dó sá vɔ̌ ná din é flaflá tɔn. Nǔ e wú Nestor kpó María kpó wá ɖ’ayi é nɛ́.—Eza. 65:21, 22.

9. Étɛ́ kpɔ́ndéwú Nestor kpó María kpó tɔn ka sixú kplɔ́n we?

⁹ Xwé ɖɛkpɛ ɖɛkpɛ ɖé gbe wɛ Nestor kpó María kpó ɖe ɖo Colombie, bo lɛ́ ɖó azɔ̌ e kpé kwɛ́ lɛ́ é. Yě ɖɔ: “Mǐ lin tamɛ dó lěe mǐ sixú bló gbɔn bo zán gbɛ e bɔkun é, lobo vlɔ́n kan nú sinsɛnzɔ́ mǐtɔn é jí; amɔ̌, mǐ ɖi xɛsi ɖɔ ényí mǐ ma ɖó akwɛ́ sukpɔ́ ǎ ɔ, mǐ kún ná ɖó awǎjijɛ ɖo gbɛzán mǐtɔn mɛ ó.” Étɛ́ ka d’alɔ yě bɔ yě ɖu ɖo xɛsi yětɔn jí? Yě lin tamɛ dó ali vovo e nu Jehovah ɖe xlɛ́ ɖɔ émí yí wǎn nú yě ɖe lɛ́ é jí. Ðó yě kú d’é jí ɖɔ é ná kpé nukún dó émí wú hwebǐnu wútu ɔ, yě jó azɔ̌ yětɔn e kpé kwɛ́ lɛ́ é dó. Yě sa xwé yětɔn, bo sɛ tɛn yi to ɔ sín akpáxwé e è ɖó wɛnjlátɔ́ Axɔ́súɖuto ɔ tɔn sín hudó ɖe hú gǎn é. Nɛ̌ nǔ ka cí nú yě dó gbeta e kɔn yě wá é wú? Nestor ɖɔ: “Mǐ mɔ ɖɔ xó e è ɖɔ ɖo Matíe 6:33 mɛ é ɔ, nǔgbó wɛ. Mǐ jɛ nǔ ɖěbǔ sín do ɖo agbaza lixo kpɔ́n ǎ. Bɔ din ɔ, mǐ ɖó awǎjijɛ ɖo gbɛzán mǐtɔn mɛ.”

10. Aniwú é ka ɖo wɛn ɖɔ gbɛtɔ́ lɛ́ ní nɔ ɖi xɛsi nú yěɖée?

¹⁰ Sín hwenu e Adámu kpó Ɛvu kpó fɔ́n gǔ dó Jehovah jí é ɔ, gbɛtɔ́ lɛ́ nɔ xo dǎka yěɖée wú. (Nǔt. 8:9) Ði kpɔ́ndéwú ɔ, mɛ lɛ́ nɔ zán acɛ e yě ɖó lɛ́ é nyi do; wɔ̌nxogbɛwútɔ́ lɛ́ nɔ wa alǎnnú mɛ lɛ́ wú; ɖo wěmaxɔ lɛ́ mɛ ɔ, nǔɖɔbamɛtɔ́ lɛ́ nɔ zun wěmaxɔmɛvígbɛ́ yětɔn lɛ́, lobo nɔ lɛ́ gblɔ́n adǎn nú yě, bɔ mɛɖé lɛ́ tlɛ nɔ ɖú zǐngídi xá mɛ e ɖo xwédo yětɔn mɛ lɛ́ é. Énɛ́ wú ɔ, gbɛtɔ́ ná ɖi xɛsi nú nɔzo tɔn ɔ, nǔ ɖo gaan wɛ. Nɛ̌ Satáan ka nɔ tɛ́n kpɔ́n bo nɔ zán xɛsi ɖi nú gbɛtɔ́ dó wa nǔ dó mǐ wú gbɔn?

11-12. Nɛ̌ Satáan ka nɔ zán xɛsi ɖi nú gbɛtɔ́ dó wa nǔ dó mǐ wú gbɔn?

¹¹ Satáan nɔ tɛ́n kpɔ́n bo ná bló bɔ mǐ ná ɖi xɛsi nú gbɛtɔ́ lɛ́ káká bo ná gɔn wɛn ɖagbe ɔ jlá, alǒ gɔn nǔ ɖěvo e Jehovah byɔ́ mǐ lɛ́ é wa. Satáan nɔ sísɛ́ acɛkpikpa lɛ́ bɔ yě nɔ ɖó azɔ̌ mǐtɔn te, bo nɔ lɛ́  klán gbe xá mǐ. (Luk. 21:12; Nǔɖe. 2:10) Gbɛ Satáan tɔn sín tutomɛ vovo lɛ́ nɔ fúnfún adingbanxó baɖabaɖa lɛ́ kpé dó Kúnnuɖetɔ́ Jehovah tɔn lɛ́ wú. Mɛ e ɖi nǔ nú adingbanxó énɛ́ lɛ́ é sixú nɔ cá nú mǐ, alǒ tlɛ xo dǎka mǐ wú. (Mat. 10:36) Wlɛnwín ɖěɖěe Satáan nɔ zán lɛ́ é nɔ kpácá mǐ wɛ a? Ðěbǔ lɔ ǎ. Sín xwe kanweko nukɔntɔn ɔ mɛ wɛ é ko ɖo wlɛnwín énɛ́ lɛ́ zán wɛ.—Mɛ. 5:27, 28, 40

¹² Alyánnú e Satáan nɔ zán dó tɔ́n ahwan mǐ lɛ́ é ɖokpó kpowun wɛ xɛsi ɖiɖi nú gbe e acɛkpikpa lɛ́ nɔ klán xá mǐ é nyí. Nú mɛɖé lɛ́ ɔ, nǔ e mɛ e ɖo xwédo yětɔn mɛ lɛ́ é ná lin hwenu e yě ná se ɖɔ yě húzú Kúnnuɖetɔ́ é wɛ nɔ dó xɛsi yě. Hweɖélɛ́nu ɔ, énɛ́ nɔ dó xɛsi yě hú mɛ xixo dó adǎka mɛ. Yě yí wǎn nú hɛ̌nnumɔ yětɔn lɛ́ tawun, bo ba ɖɔ yě ní wá tuun Jehovah, lobo yí wǎn n’i. Ényí hɛ̌nnumɔ yětɔn lɛ́ ɖɔ xó e ma sɔgbe ǎ é dó Mawu nǔgbó ɔ kpó mɛsɛntɔ́ tɔn lɛ́ kpó wú ɔ, é nɔ ɖó wǔvɛ́ nú yě tawun. É ɖo mɔ̌ có, ɖo ninɔmɛ ɖé lɛ́ mɛ ɔ, hɛ̌nnumɔ yětɔn ɖěɖěe nɔ klán gbe xá yě ɖo bǐbɛ́mɛ lɛ́ é nɔ wá yí gbe nú nǔgbó ɔ. Din ɔ, mǐ ní ɖɔ ɖɔ mɛ e ɖo xwédo mǐtɔn mɛ lɛ́ é gbɛ́ xó mǐtɔn bǐ mlɛ́mlɛ́, ɖó nǔ e mǐ ɖi nǔ ná din lɛ́ é wútu. Nɛ̌ mǐ ka ná wa nǔ gbɔn?

13. Ényí mɛ e ɖo xwédo mǐtɔn mɛ lɛ́ é ɖe alɔ sín kan mǐtɔn mɛ ɔ, nɛ̌ kú e mǐ kú d’é jí ɖɔ Mawu yí wǎn nú mǐ é ka sixú d’alɔ mǐ bɔ mǐ ná dɛ ɖ’é nu gbɔn? (Ðɛhan 27:10)

¹³ Xó ɖaaɖagbe ɖěɖěe ɖo Ðɛhan 27:10 mɛ lɛ́ é sixú dó gbɔ nú mǐ. (Xa.) Ényí mǐ flín lě do Jehovah yí wǎn nú mǐ sɔ é, bónú mɛ e ɖo xwédo mǐtɔn mɛ lɛ́ é ná bo klán gbe xá mǐ ɔ, ado nɔ hu mǐ ǎ. Gɔ́ ná ɔ, mǐ nɔ ɖeji ɖɔ é ná d’ajɔ mǐ ɖó dɛ e dɛ wɛ mǐ ɖe é wú. Jehovah ná kpé nukún dó hudó agbaza tɔn kpó gbigbɔ tɔn kpó mǐtɔn wú, bo ná lɛ́ sú lěe nǔ nɔ cí nú mǐ é sín do hú mɛ ɖěvo ɖěbǔ! Nǔ e wú Biniam e xó mǐ ɖɔ ɖo bǐbɛ́mɛ é ɖ’ayi é nɛ́.

14. Étɛ́ kpɔ́ndéwú Biniam tɔn ka sixú kplɔ́n we?

¹⁴ Biniam tuun ɖɔ è sixú dó ya nú émí dó nǔjɔnǔ mɛ có, é ka húzú Kúnnuɖetɔ́ Jehovah tɔn. Kpɔ́n lěe tuun e Biniam tuun ɖɔ Jehovah yí wǎn nú émí é d’alɔ ɛ bɔ é ɖu ɖo xɛsi ɖi nú gbɛtɔ́ jí gbɔn é. É ɖɔ: “Yadónúmɛ ɔ zɛ nǔ e un ɖó nukún é wú. Amɔ̌, gbeklánxámɛ mɛ e ɖo xwédo ce mɛ lɛ́ é tɔn wɛ dó xɛsi mì hú yadónúmɛ acɛkpikpa lɛ́ tɔn. Xɛsi ɖi mì ɖɔ gbeta e kɔn un wá bo ná húzú Kúnnuɖetɔ́ Jehovah tɔn é ná dó kpo awa mɛ nú tɔ́ ce e ma nyí nǔɖitɔ́ ǎ é, bɔ mɛ e ɖo xwédo ce mɛ lɛ́ é sɔ́ ná ɖó sísí ɖě nú mì ǎ.” Amɔ̌, Biniam kú d’é jí ɖɔ  Jehovah nɔ kpé nukún dó mɛ e é yí wǎn ná lɛ́ é wú hwebǐnu. Biniam tínmɛ ɖɔ: “Un nɔ lin tamɛ dó lěe Jehovah ko d’alɔ mɛ ɖěvo lɛ́ ɖo ninɔmɛ élɔ́ lɛ́ mɛ gbɔn é jí: akwɛ́yózo syɛ́nsyɛ́n, mɛ ɖe ɖó vo ɖo mɛ mɛ kpó dǎka e è nɔ xo mɛ ɖěvo lɛ́ wú dó nǔjɔnǔ mɛ é kpó. Un tuun ɖɔ ényí un tɛ́dó Jehovah wú ɔ, é ná kɔn nyɔ̌ná dó jǐ ce. Azɔn mɔ̌kpán e è wlí mì, bo tlɛ lɛ́ xo mì lɛ́ é ɔ, un mɔ vaan ɖɔ Jehovah nɔ d’alɔ mǐ hwebǐnu, ényí mǐ nɔ gbejí n’i ɔ nɛ́.” Jehovah húzú Tɔ́ ɖejidéwú ɖé nú Biniam, bɔ togun Tɔn xlɛ́ ɖɔ émí nyí xwédo ɖagbe ɖé n’i.

15. Étɛ́wú xɛsi ɖiɖi nú kú ka sɔgbe?

¹⁵ Biblu ɖe xlɛ́ ɖɔ kú ɔ kɛntɔ́ wɛ é nyí. (1 Kɔ. 15:25, 26) Kú sixú ɖó linkpɔ́n nú mǐ tawun, tají ɔ, ényí mɛvívɛ́ mǐtɔn ɖé, alǒ mǐɖésúnɔ ɖo azɔn syɛ́nsyɛ́n ɖé jɛ wɛ ɔ nɛ́. Étɛ́wú mǐ ka nɔ ɖi xɛsi nú kú? Ðó Jehovah dá mǐ bo sɔ́ gbɛ ninɔ káká sɔ́yi sín jlǒ dó ayi mǐtɔn mɛ wútu wɛ. (Nǔt. 3:11, nwt) Amɔ̌, xɛsi ɖiɖi nú kú ɖó bǎ ɖé mɛ sixú cyɔ́n alɔ gbɛ mǐtɔn jí. Ði kpɔ́ndéwú ɔ, é sixú sísɛ́ mǐ bɔ mǐ ná wá gbeta ɖagbe lɛ́ kɔn dó nǔ élɔ́ lɛ́ wú: nǔ e mǐ nɔ ɖu ayǐhɔ́ngbe ayǐhɔ́ngbe é kpó lanmɛ biba kpɔ́n gbe bǐ gbe kpó, alɔdó dotóo lɛ́ tɔn biba kpó atínkɛ́n lɛ́ zínzán kpó hwenu e é byɔ́ dó é, gɔ́ nú alɔ nyinyi nú nǔ e ma ɖo dandan ǎ bo sixú sɔ́ gbɛ mǐtɔn ɖ’axɔ́ nu lɛ́ é.

16. Nɛ̌ Satáan ka nɔ tɛ́n kpɔ́n bo nɔ zán xɛsi e mǐ nɔ ɖi ɖo jɔwámɔ linu nú kú é gbɔn?

¹⁶ Satáan tuun ɖɔ gbɛ xɔ akwɛ́ tawun nú mǐ. Énɛ́ wú ɔ, é ɖɔ ɖɔ mǐ ná sɔ́ nǔ e mǐ ɖó lɛ́ é bǐ dó sá vɔ̌, káká jɛ xɔ́ntɔn e mǐ zun xá Jehovah é jí, bo ná dó sixú nɔ gbɛ. (Jɔb. 2:4, 5) Nǔvú séé wɛ nyí énɛ́ bɔ Satáan ɖó! Ðó Satáan ɖó “acɛ e nɔ hu mɛ é” wútu ɔ, é nɔ zán xɛsi e mǐ nɔ ɖi ɖo jɔwámɔ linu nú kú é dó bló bónú mǐ ná jó Jehovah dó. (Ebl. 2:14, 15) Ðo ninɔmɛ ɖé lɛ́ mɛ ɔ, mɛ e jí Satáan kpa acɛ dó lɛ́ é sixú gblɔ́n adǎn nú mɛsɛntɔ́ Jehovah tɔn lɛ́ ɖɔ ényí yě ma sa nǔɖiɖi yětɔn ǎ ɔ, émí ná hu yě. Ðo ninɔmɛ ɖěvo lɛ́ mɛ ɔ, ényí ajijimɛnú e kúnkplá dotóoxwéxó é ɖé xá mǐ ɔ, Satáan sixú gbɔn yɛkan énɛ́ mɛ bá mɔ tɛn dó bló bónú mǐ ná gbɛ́ nǔ e mǐ ɖi nǔ ná lɛ́ é. Dotóo lɛ́, alǒ mɛ e ɖo xwédo mǐtɔn mɛ bo ma nyí nǔɖitɔ́ ǎ lɛ́ é sixú gbídí kɔ nú mǐ bónú mǐ ná yí gbe bá dó hun; mɔ̌ wiwa ka ná t’afɔ sɛ́n Mawu tɔn lɛ́ jí. Alǒ mɛɖé sixú tɛ́n kpɔ́n bo ná bló bɔ mǐ ná yí gbe nú nukúnkpédómɛwú ɖěvo e ma sɔgbe xá nǔgbódodó Biblu tɔn lɛ́ ǎ é.

17. Sɔgbe xá Hlɔ̌manu lɛ́ 8:37-39 ɔ, aniwú mǐ ma ka ɖó ná ɖi xɛsi nú kú ǎ?

¹⁷ Mǐ nɔ ba ná kú ǎ có, mǐ ka tuun ɖɔ ényí mǐ ná bo tlɛ kú ɔ, Jehovah ná kpo ɖo wǎn yí nú mǐ wɛ. (Xa Hlɔ̌manu lɛ́ 8:37-39.) Ényí xɔ́ntɔn Jehovah tɔn lɛ́ kú ɔ, é nɔ kpo ɖo yě flín wɛ, cí nǔ ɖɔ yě kpo ɖo gbɛ wɛ ɖɔhun. (Luk. 20:37, 38) Akpakpa ɖo sísɔ́ ɛ wɛ b’ɛ ná fɔ́n yě. (Jɔb. 14:15) Axɔ́ ɖaxó wɛ Jehovah sú, bónú mǐ ná dó sixú “mɔ gbɛ mavɔmavɔ.” (Jaan 3:16) Mǐ tuun lě do Jehovah yí wǎn nú mǐ, lobo nɔ lɛ́ kpé nukún dó mǐ wú sɔ é. Énɛ́ wú ɔ, ényí mǐ ɖo azɔn jɛ wɛ, alǒ è gblɔ́n kúdán nú mǐ ɔ, mǐ nɔ jó Jehovah dó ǎ, é nyɔ́ wa ɔ, mǐ nɔ gán jɛ wǔ tɔn, bo nɔ tuun ɖɔ é ná dó gbɔ nú mǐ, ná nǔnywɛ́ mǐ, lobo lɛ́ ná hlɔ̌nhlɔ́n mǐ. Nǔ e Valérie kpó asú tɔn kpó wa é pɛ́ɛ nɛ́.—Ðɛh. 41:4.

18. Étɛ́ kpɔ́ndéwú Valérie tɔn ka sixú kplɔ́n we?

¹⁸ Hwenu e Valérie ɖó xwe 35 é ɔ, è mɔ kansɛ́ɛzɔn syɛ́nsyɛ́n e è ma nɔ mɔ nú mɛ mɔ̌ ǎ é ɖé n’i. Kpɔ́n lěe wǎnyíyí d’alɔ ɛ b’ɛ ɖu ɖo xɛsi e é nɔ ɖi nú kú é jí gbɔn é. É ɖɔ: “Kansɛ́ɛzɔn énɛ́ e è mɔ nú mì é zɔ́n bɔ gbɛzán mǐtɔn húzú ajijimɛ. É byɔ́ ɖɔ è ní zɛ mì cóbónú má gán, mɛzizɛ ɔ ka gɛ́dɛ́  tawun. Un gbɔn dotóo mɛzɛtɔ́ gěgé gɔ́n, amɔ̌, yě bǐ wɛ ɖɔ ɖɔ hun jɛ́n émí ná dó nú mì cóbó ná wa azɔ̌ nú mì. Xɛsi ɖi mì, amɔ̌, un gbɛ́ ɖɔ un kún ná dó hun ó, ɖó un tuun ɖɔ sɛ́n Mawu tɔn gbɛ́! Ðo gbɛzán ce bǐ mɛ ɔ, Jehovah ɖe xlɛ́ mì ɖɔ émí yí wǎn nú mì tawun. Din ɔ, ali ɔ hun bɔ nyi lɔ ná xlɛ́ ɖɔ un yí wǎn n’i. Ényí dotóo lɛ́ dó wɛn nyanya mì hweɖébǔnu ɔ, é nɔ zɔ́n bɔ un nɔ lɛ́ kán ɖ’é jí hú gǎn bo ná bló bɔ Jehovah ná gó ɖó wǔ ye, lobɔ Satáan ná ɖu winnyá. Un wá mɔ dotóo mɛzɛtɔ́ ɖé b’ɛ wa azɔ̌ nú mì ganjí ma zán hun. Azɔn ce kpo ɖo tagba dó nú mì wɛ, amɔ̌, hwebǐnu wɛ Jehovah nɔ ná mǐ nú e hudó mǐ é. Ði kpɔ́ndéwú ɔ, ɖo kplé aklúnɔzángbla fífó tɔn e mǐ bló ɖo aklúnɔzángbla e jɛ nukɔn nú aklúnɔzángbla e mɛ è mɔ kansɛ́ɛzɔn nú mì é mɛ ɔ, mǐ gbéjé xóta ‘Pipehẹ Nuhahun Gbẹ̀mẹ Tọn lẹ po Adọgbigbo Po’ kpɔ́n. * Xóta énɛ́ dó gbɔ nú mǐ tawun. Azɔn mɔ̌kpán wɛ mǐ xa. Xóta mɔ̌ ɖɔhun lɛ́, kpó tuto gbigbɔ tɔn ɖagbe e nyi kpó asú ce kpó nɔ xwedó ayǐhɔ́ngbe ayǐhɔ́ngbe lɛ́ é kpó zɔ́n bɔ mǐ ɖó fífá ayi mɛ tɔn. Yě lɛ́ d’alɔ mǐ bɔ mǐ nɔ jlɛ́ jí, lobo lɛ́ wá gbeta ɖagbe lɛ́ kɔn.”

19. Étɛ́ ka ná jɛ ɖo malínmálín mɛ?

¹⁹ Kpó alɔdó Jehovah tɔn kpó ɔ, klisánwun e gbɔn gbɛ ɔ bǐ mɛ lɛ́ é ko ɖu ɖo ninɔmɛ e syɛ́n tawun lɛ́ é jí, lobo syɛ́nlǐn ɖo Awǒvi nukɔn. (1 Pi. 5:8, 9) Hwi lɔ sixú kpé wú. Zaanɖé din ɔ, Jehovah ná xlɛ́ ali Jezu kpó mɛ e ná kpa acɛ xá ɛ lɛ́ é kpó bɔ yě “ná sú awǒvi sín nǔwiwa lɛ́ sín kún dó.” (1 Jaan 3:8) Énɛ́ gúdo ɔ, mɛ ɖěɖěe ɖo Mawu sɛn wɛ ɖo ayǐkúngban jí lɛ́ é “sɔ́ ná ɖi xɛsi nú nǔɖé ǎ; mɛ ɖěbǔ sɔ́ ná nɔ dó adohuhu nú [yě] ǎ.” (Eza. 54:14; Micée 4:4) Amɔ̌, din hwɛ̌ ɔ, mǐ ɖó ná dó gǎn bo ɖu ɖo xɛsi e nɔ ɖi mǐ lɛ́ é jí.

20. Étɛ́ ka ná d’alɔ mǐ bɔ mǐ ná ɖu ɖo xɛsi e nɔ ɖi mǐ lɛ́ é jí?

²⁰ Mǐ ɖó ná kpo ɖo hlɔ̌nhlɔ́n ná jiɖe e mǐ ɖó ɖɔ Jehovah yí wǎn nú mɛsɛntɔ́ tɔn lɛ́ lobo nɔ nya xɛ ɖo yě jí é wɛ. Tamɛ linlin do lěe Jehovah nya xɛ ɖo mɛsɛntɔ́ tɔn lɛ́ jí ɖo hwexónu gbɔn é kpó xo ɖiɖɔ do lěe é wa mɔ̌ gbɔn é kpó jí ná d’alɔ mǐ bɔ mǐ ná kpé wú. Gɔ́ ná ɔ, lěe é ko d’alɔ mǐɖésúnɔ mɛtún ɔ bɔ mǐ ɖí xwi xá ninɔmɛ e vɛ́ wǔ lɛ́ é gbɔn é hinhɛn d’ayi mɛ sixú d’alɔ mǐ. Kpó alɔdó Jehovah tɔn kpó ɔ mǐ sixú ɖu ɖo xɛsi e nɔ ɖi mǐ lɛ́ é jí!—Ðɛh. 34:5.