AKO 5
Koleā Le Fakatu’utu’u ’a Le ’Atua Ki Le Kele?
1. Koleā na fakatupu ai e le ’Atua le kele?
Ko Seova na soli e ia le kele ki le tagata mo le fafine ko lolā nofo’aga. Na fakatupu e ia le ’uluaki taumātu’a ko Atama mo Eva, na le’aise fakatupu lāua ke lā faka’api le lagi talie kua ’oki le fakatupu o le kau ’āselo ki ai. (Sopo 38:4, 7) Na fakanofo e le ’Atua le ’uluaki tagata i le palatiso fulumālie, e igoa ko le ōloto o Etene. (Senesi 2:15-17) Na soli e Seova kiate ia mo lona sākoga le ma’uli fiafia o le’egato i le kele. Lau ia Pesalemo 37:29; 115:16.
I le kamata’aga, ko le ōloto o Etene ko le palatiso. Ko Atama mo Eva na tonu ke lā faka’apele le kele ki olā sākoga. I le faka’ano o le temi, e lotou pule’i loa le kele kātoa ke liliu ko se palatiso. (Senesi 1:28) Ko le kele e se maumau’i i se temi. E liliu loa ko le nofo’aga tu’umau o le tagata. Lau ia Pesalemo 104:5.
Kotou tio’i a le ’ata viteo Koleā Na Fakatupu Ai e Le Atua Le Kele?
2. Koleā leia e se liliu ai le kele ko le palatiso i aso anei?
Talie ko Atama mo Eva na le’aise fakalogo kia Seova. Na kapu lāua i le ōloto. Na puli le palatiso, na le’aise mafai e le tagata lona fakatu’u. Ofaipe lona pati i le Tosi-Tapu, ko le kele na tuku ki lima o le agaveli.—Sopo 9:24. Lau ia Senesi 3:23, 24.
Na tuku fena’aki e Sehova lana ’uluaki fakatu’utu’u ki le tagata? Le’ai! Talie e Mafimafi. E le’aise mafai ke ano noa ana fakatu’utu’u. (Isaia 45:18) E toe fakaliliu e ia le tagata ki lona kamata’aga mei mu’a. Lau ia Pesalemo 37:11, 34.
3. E toe fakatu’u fefe’aki le Palatiso?
E toe fakatu’u le Palatiso i le kele lolotoga o le agai o Sesu, i lona uiga Sau na filifili e le ’Atua. E taki e Sesu le kau ’āselo mo maumau’i le kau fesagai ki le ’Atua i le tau ko Alemaketone. E pilisoni’i loa Satana i fētu’u e 1000. Ko le kau ’atolasio a le ’Atua e lotou ma’u’uli loa i le tautea ti ko Sesu e takitaki ’ia mo puipui lātou. E lotou ma’u’uli le’egato i le Palatiso i le kele. Lau ia Apokalipisi 20:1-3; 21:3, 4.
4. E gato āfea a mamae?
Ko āfea e fakagato ai e le ’Atua a mamae i le kele? Na fakasā e Sesu a “fakama’iloga” ke iloa ai kua ofi mai le faka’oki o le mālamanei. Ko ano’aga o le mālamanei e fakatupu tu’utamaki ki le ma’uli o le tagata tie fakasā e tou nofo i le “faka’oki o le mālama-nei.” Lau ia Mateo 24:3, 7-14, 21, 22.
Lolotoga fētu’u e afe i lana aga o takitaki le kele mei le lagi, e aga loa Sesu o fakagato a mamae fuli. (Isaia 9:6, 7; 11:9) E le’aise gato i lona uiga Sau, kae e toe Pelepitelo Lasi ke puli’i loa e ia a ’agasala o lātou e ’alofa ki le ’Atua. Iate ia, e aga loa le ’Atua o puli’i a masaki, le matu’a ti mo le mate. Lau ia Isaia 25:8; 33:24.
5. Ko ai ka ma’uli i le Palatiso ka ’au?
I se Fale Fono, e ke fēlave’i ai mo le kakai e ’alofa ki le ’Atua tie loto ke lotou ako ke mālie kiate ia
Ko le kakai fakalogo ki le ’Atua ka ma’uli i le Palatiso. (1 Soane 2:17) Na kakau e Sesu anā tisipulo ke lotou afa le kakai agamalu o ako’i lātou ke lotou liliu ko kakai e mālie ki le ’Atua. I aso anei, e teuteu’i e Seova le miliona kakai ke ma’uli i le Palatiso ka ’au i le kele. (Sofonia 2:3) I Fale Fono a le kau Fakamā’oki a Sehova, e fai ai lalātou tausi, e ako’i ai ke liliu le tagata mo fafine āvaga, mo le tamana mo le tinana ke aga mālie ake. Ko mātu’a mo fānau e ’atolasio fakatasi ki le ’Atua mo ako ke lotou ma’uli mālie o tupu ko le ako o le Tosi-Tapu. Lau ia Mika 4:1-4.
