Níor athraíodh. Léiríonn comparáid idir lámhscríbhinní ársa nach bhfuil aon athrú bunúsach déanta ar an mBíobla ainneoin go bhfuil na mílte bliain caite á athscríobh ar ábhair nach raibh aon teacht aniar ann.

 Fuarthas na mílte lámhscríbhinní ársa den Bhíobla. Tá roinnt difríochtaí i gcuid acu seo, rud a léiríonn go ndearnadh botúin agus iad á gcóipeáil. Is beag tionchar a bhí ag na botúin seo agus ní athraíonn siad brí an téacs. Ach thángthas ar chúpla difríocht suntasach, agus is léir gur iarrachtaí a bhí iontu seo teachtaireacht an Bhíobla a athrú d’aon ghnó. Scrúdóidh muid dhá shampla:

1.   I roinnt sean-aistriúcháin den Bhíobla, tá na focail seo a leanas le fáil ag 1 Eoin 5:7: “ar neamh, an tAthair, an Briathar, agus an Spiorad Naomh; agus is aon an Triúr.” Deimhníonn lámhscríbhinní ar féidir brath orthu, nach raibh na focail seo sa mbuntéacs. Cuireadh leis níos déanaí iad. a Dá bhrí sin, tá siad fágtha ar láir as aistriúcháin chruinn nua-aimseartha den Bhíobla.

2.   Tá ainm pearsanta Dé le feiceáil na mílte uair i lámhscríbhinní ársa an Bhíobla. Ach, tá teidil mar “Tiarna” nó “Dia” úsáidte ina áit i go leor aistriúcháin den Bhíobla.

 Ag an bpointe seo, táthar tar éis a theacht ar an oiread sin lámhscríbhinní go bhfuil sé níos éasca ná riamh botúin a aimsiú. b Céard a léiríonn an chomparáid atá déanta idir na cáipéisí seo faoi chruinneas an Bhíobla inniu?

•   Ag trácht dó ar théacs na Scrioptúir Eabhraise (ar a dtugtar an “Sean-Tiomna”), dúirt an scoláire William H. Green: “Is féidir a rá nár tháinig aon saothar eile ó bhéal go béal aniar ón tseanaimsir atá chomh cruinn sin.”

•   Maidir leis na Scrioptúir Gréigise Críostaí, nó “an Tiomna Nua,” scríobh an scoláire Bíobla F. F. Bruce: “Is mó go mór an fhianaise atá ann go bhfuil scríbhinní ár dTiomna Nua cruinn ná aon fhianaise a bhaineann le go leor de scríbhinní na n-údar clasaiceacha, ach níl duine ar bith ag ceistiú a gcruinnis siúd.”

•   Dúirt Sir Frederic Kenyon, saineolaí ar lámhscríbhinní an Bhíobla, gur féidir le duine “an Bíobla iomlán a thógáil ina láimh agus a rá gan eagla ná leisce gurb é fíor-bhriathar Dé é, agus nach bhfuil aon rud tábhachtach fágtha amach as in imeacht na gcéadta bliain.”

•   Rinne cóipeálaithe an Bhíobla idir Giúdaigh agus Críostaí cur síos cruinn ionraic ar na botúin thromchúiseacha a rinne Pobal Dé. c (Uimhreacha 20:12; 2 Samúéil 11:​2-4; Galataigh 2:​11-​14) Níor fhág siad ar lár sleachta a bhí ag cur síos ar easumhlaíocht na nGiúdach ná sleachta a léirigh go raibh teagasc daonna mícheart. (Hóisé 4:2; Malaicí 2:​8, 9; Matha 23:​8, 9; 1 Eoin 5:​21) Trí na cuntais seo a chóipeáil go cruinn, léirigh na cóipeálaithe go bhféadfaí muinín a bheith astu, agus go raibh meas mór acu ar Bhriathar naofa Dé.

•   Scríobhadh an Bíobla faoi inspioráid Dé an chéad lá riamh, mar sin níl sé ach réasúnach go ndéanfadh sé cinnte go mbeadh sé cruinn. d (Íseáia 40:8; 1 Peadar 1:​24, 25) Bhí sé beartaithe aige go rachadh sé chun tairbhe do gach duine, an dream a mhair san am a caitheadh agus muidne inniu. (1 Corantaigh 10:11) Is féidir a rá, “Gach ar scríobhadh fadó is dár dteagascna a scríobhadh é chun go mbeadh an fhoighne agus an sólás atá le fáil sa scrioptúr ina n-ábhar dóchais againn.”​—Rómhánaigh 15:4.

•   Bhí Íosa agus a lucht leanúna ag tagairt i gcónaí den mhéid a bhí luaite sna cóipeanna de na Scrioptúir Eabhracha agus níor léirigh siad aon imní faoi chruinneas na dtéacsanna ársa sin.​—Lúcás 4:​16-​21; Gníomhartha 17:​1-3.