“Ejaakɛ Nyɔŋmɔ hãaa wɔ gbeyeishemɔ mumɔ, shi moŋ ehã wɔ hewalɛ kɛ suɔmɔ kɛ hiɛshikamɔ mumɔ.”​—2 Timoteo 1:7, Jeŋ Hee Shishitsɔɔmɔ.

 “Ejaakɛ Nyɔŋmɔ hãaa wɔ gbeyeishemɔ mumɔ, shi moŋ hewalɛ kɛ suɔmɔ kɛ jwɛŋmɔ ni sa mumɔ eŋɔhã wɔ.”​—2 Timoteo 1:7, Ga Biblia momo.

 Nyɔŋmɔ baanyɛ eye ebua mɔ ko ni ená ekãa kɛfee nɔ ni ja. Nyɔŋmɔ sumɔɔɔ ni “gbeyei’ ni esaaa ko mɔmɔɔ wɔ ni wɔkanyɛ wɔfee nibii ni sa ehiɛ.

 Wɔbaasusu sui etɛ ni Nyɔŋmɔ kɛhãa ni atsĩ tã yɛ kuku nɛɛ mli ni baanyɛ eye ebua mɔ ko koni eye gbeyeishemɔ nɔ lɛ ahe.

 “Hewalɛ.” Yɛ henyɛlɔi ni he yɔɔ gbeyei kɛ shihilɛi ni mli wawai fɛɛ ni Kristofoi kɛkpeɔ lɛ sɛɛ lɛ, amɛnyɛ amɛtee nɔ amɛkɛ ekãa esɔmɔ Yehowa. Amɛyako sɛɛsɛɛ. (2 Korintobii 11:23-27) Mɛni yeɔ ebuaa amɛ ni amɛnyɛɔ amɛfeɔ nakai? Bɔfo Paulo tsɔɔ mli akɛ: “Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.” (Filipibii 4:13) Nyɔŋmɔ baanyɛ ehã mɛi ni jáa lɛ lɛ “hewalɛ ni fa kɛteke nɔ” koni amɛkɛye naagba fɛɛ naagba nɔ.​—2 Korintobii 4:7.

 “Suɔmɔ.” Suɔmɔ ni mli wa ni Kristofonyo ko yɔɔ kɛhã Nyɔŋmɔ lɛ yeɔ ebuaa lɛ ni ekɛ ekãa feɔ nɔ ni ja. Nakai nɔŋŋ suɔmɔ ni Kristofonyo yɔɔ kɛhã enyɛmi gbɔmɔ lɛ tsirɛɔ lɛ ni ekɛ mɛi krokomɛi ahiamɔ nii yeɔ enɔ hiɛ, kɛ́ aate shi aawo lɛ loo ekɛ yiwaa miikpe po.​—Yohane 13:34; 15:13.

 “Hiɛshikamɔ mumɔ.” Yɛ Biblia lɛ mli lɛ, kɛ́ akɛ hiɛshikamɔ mumɔ tsu nii lɛ, bei pii lɛ, etsɔɔ bɔ ni Kristofonyo ko damɔɔ Biblia mli shishitoo mlai anɔ ekɛ hiɛshikamɔ kpɛɔ yiŋ ni sa. Kɛ́ mɔ ko yɛ hiɛshikamɔ mumɔ lɛ, enyɛɔ ejwɛŋɔ jogbaŋŋ kɛ́ ekɛ shihilɛi ni mli wawai miikpe po. Ebaanyɛ ekpɛ yiŋ ni tsɔɔ akɛ esusuɔ nii ahe tamɔ bɔ ni Nyɔŋmɔ susuɔ nii ahe lɛ, ejaakɛ ele akɛ naanyobɔɔ ni yɔɔ ekɛ Nyɔŋmɔ teŋ lɛ he miihia kwraa fe mɛi krokomɛi asusumɔi.

 Bɔfo Paulo ŋma Timoteo wolo ni ji enyɔ lɛ kɛmaje enaanyo ni esumɔɔ waa kɛ ehefatalɔ nitsulɔ Timoteo. Yɛ wolo nɛɛ mli lɛ, Paulo wo oblanyo Timoteo hewalɛ ni eya nɔ etsu nii waa yɛ sɔɔmɔ nitsumɔ lɛ mli. (2 Timoteo 1:1, 2) Ekolɛ, no mli lɛ Timoteo hiɛ gboɔ, ni kulɛ no baanyɛ atsĩ enaa ni ekɛ enyɛmɔ fɛɛ akatsu babaoo yɛ Kristofoi asafo lɛ mli. (1 Timoteo 4:12) Shi Paulo hã Timoteo yɔse akɛ, Timoteo ená nikeenii ko, ni no ji hegbɛ krɛdɛɛ ni ená ni ekɛsɔmɔɔ yɛ asafo lɛ mli lɛ. Ewo Timoteo hewalɛ koni ekɛ hegbɛ ni eyɔɔ akɛ nɔkwɛlɔ loo asafoŋ onukpa lɛ atsu nii jogbaŋŋ yɛ asafo lɛ mli, be ni eshiɛɔ sane kpakpa lɛ, kɛ be ni ekɛ ehemɔkɛyeli lɛ he kai kpeɔ lɛ.​—2 Timoteo 1:​6-8.

 Eyɛ mli akɛ aŋma wiemɔi nɛɛ ahã Timoteo moŋ, shi ehãa mɛi fɛɛ ni miisumɔ ni amɛsɔmɔ Nyɔŋmɔ ŋmɛnɛ lɛ náa nɔmimaa akɛ, ekɔɔɔ he eko naagbai ni amɛkɛbaakpe lɛ, Nyɔŋmɔ baaye ebua amɛ koni amɛye omanye.