“Nyɛnyaa yɛ hiɛnɔkamɔ lɛ hewɔ. Nyɛfia shi yɛ amanehulu mli. Nyɛhiɛa sɔlemɔ mli daa.”​—Romabii 12:12, Jeŋ Hee Shishitsɔɔmɔ.

 “Nyɛnyaa yɛ hiɛnɔkamɔ mli; nyɛmiaa nyɛhiɛ yɛ amanehulu mli; nyɛhiɛa sɔlemɔ mli daa.”​—Romabii 12:12, Ga Biblia momo.

 Yɛ ŋmalɛ nɛɛ mli lɛ, bɔfo Paulo wo Kristofoi ni yɔɔ Roma lɛ hewalɛ ni amɛfee nibii etɛ komɛi ni baaye abua amɛ koni kɛ́ aawa amɛyi jio, amɛkɛ naagbai miikpe jio lɛ, amɛnyɛ amɛfi shi ni amɛye anɔkwa.

 “Nyɛnyaa yɛ hiɛnɔkamɔ lɛ hewɔ.” Kristofoi yɛ naanɔ wala he hiɛnɔkamɔ ko ni nɔ bɛ​—amɛteŋ mɛi komɛi baaya ŋwɛi, ni amɛteŋ mɛi pii hu baahi shi yɛ paradeiso shikpɔŋ lɛ nɔ. (Lala 37:29; Yohane 3:16; Kpojiemɔ 14:1-4; 21:3, 4) Hiɛnɔkamɔ nɛɛ eko ji akɛ Nyɔŋmɔ Maŋtsɛyeli lɛ  a baajie naagbai fɛɛ ni hãa adesai piŋɔ lɛ fɛɛ kɛje shihilɛ mli. (Daniel 2:44; Mateo 6:10) Kɛ́ Nyɔŋmɔ tsuji kɛ jaramɔ shihilɛ miikpe po lɛ, amɛbaanyɛ amɛya nɔ amɛnya, ejaakɛ amɛyɛ hekɛnɔfɔɔ akɛ bɔ fɛɛ bɔ ni fee lɛ, amɛ hiɛnɔkamɔ lɛ baaba mli. Ni kɛ́ amɛfi shi lɛ, amɛbaasa Nyɔŋmɔ hiɛ ni ebaajɔɔ amɛ.​—Mateo 5:11, 12; Romabii 5:3-5.

 “Nyɛfia shi yɛ amanehulu mli.” Yɛ Biblia lɛ mli lɛ, bei pii lɛ, kɛ́ akɛ Greek wiemɔ ni atsɔɔ shishi akɛ “fi shi” lɛ tsu nii lɛ, etsɔɔ akɛ aya nɔ ahi shihilɛ ko mli moŋ fe ni abaajo naa foi; amia hiɛ loo adamɔ shi shiŋŋ yɛ nɔ ko naa.” Akɛni Kristo sɛɛnyiɛlɔi lɛ “fataaa je lɛ he” b hewɔ lɛ, amɛkpaa gbɛ akɛ abaawa amɛyi, ni enɛ biɔ ni amɛfi shi. (Yohane 15:18-20; 2 Timoteo 3:12) Kɛ́ Kristofonyo ko kɛ anɔkwayeli sɔmɔɔ Nyɔŋmɔ be mli ni eefi shi yɛ kai amli loo ekɛ kai ni naa wala miikpe po lɛ, ehemɔkɛyeli lɛ mli waa ejaakɛ ele akɛ bɔ fɛɛ bɔ ni fee lɛ Yehowa baajɔɔ lɛ. (Mateo 24:13) Hemɔkɛyeli ni mli wa nɛɛ hãa enyɛɔ ekɛ tsuishitoo kɛ miishɛɛ fiɔ shi yɛ jaramɔ shihilɛi amli.​—Kolosebii 1:11.

 “Nyɛhiɛa sɔlemɔ mli daa.” Dani Kristofoi baanyɛ aya nɔ aye Nyɔŋmɔ anɔkwa lɛ, ehe baahia ni amɛya nɔ amɛsɔle be fɛɛ be. (Luka 11:9; 18:1) Esa akɛ amɛsɔle kɛbi Nyɔŋmɔ dɛŋ gbɛtsɔɔmɔi be fɛɛ be, ni amɛkɛ amɛhiɛ afɔ̃ enɔ yɛ amɛshihilɛ mli nɔ fɛɛ nɔ mli. (Kolosebii 4:2; 1 Tesalonikabii 5:17) Amɛyɛ hekɛnɔfɔ̃ɔ kwraa akɛ Nyɔŋmɔ baahã amɛnibimɔi lɛ ahetoo, ejaakɛ amɛyeɔ efamɔi lɛ anɔ, ni amɛkɛ amɛhiɛ fɔ̃ɔ enɔ kwraa. Amɛbɔɔ mɔdɛŋ fɛɛ ni amɛbaanyɛ koni amɛsa ehiɛ. (1 Yohane 3:22; 5:14) Amɛle hu akɛ kɛ́ amɛhiɛ sɔlemɔ mli daa ni amɛfɔ̃ɔɔ lɛ, Nyɔŋmɔ baawaje amɛ koni amɛya nɔ amɛye lɛ anɔkwa, ekɔɔɔ he eko kai ni amɛkɛbaakpe.​—Filipibii 4:13.

 Paulo ŋma wolo nɛɛ emaje Kristofoi ni yɔɔ Roma lɛ aafee afi 56 Ŋ.B. Yɛ wolo ni eŋma lɛ yitso 12 lɛ mli lɛ, ewo Kristofoi lɛ ŋaa yɛ bɔ ni amɛbaajie sui kpakpai akpo, bɔ ni amɛkɛ amɛnyɛmimɛi Kristofoi kɛ mɛi krokomɛi lɛ baaye ahã, kɛ bɔ ni amɛkɛ mɛi baaye ahã kɛ́ aawa amɛyi po lɛ he. (Romabii 12:9-21) Ŋaa ni ewo Kristofoi ni yɔɔ Roma lɛ ba yɛ ebe naa waa, ejaakɛ etsɛɛɛ ni amɛkɛ shiteekɛwoo ko ni naa wa waa kpe.

 Afii fioo komɛi asɛɛ, yɛ afi 64 Ŋ.B. lɛ, la wulu ko tso ni eshã Roma maŋtiase lɛ fã kpotoo. Anu ni mɛi miiwie huhuuhu akɛ Nɔyelɔ Nero ji mɔ ni wo maŋ lɛ mli la lɛ. Tacitus, ni eji Roma yinɔsane he nilelɔ lɛ bɔ amaniɛ akɛ be ni Nero fee enɛ lɛ, etsi sane lɛ efɔ̃ Kristofoi lɛ anɔ akɛni esumɔɔɔ ni ashwaa lɛ hewɔ. Ekã shi faŋŋ akɛ, enɛ kɛ yiwaa kpele ba Kristofoi ni hi shi yɛ nakai beiaŋ lɛ anɔ. Ŋaa ni Paulo wo amɛ yɛ bɔ ni amɛbaafee amɛfi shi yɛ yiwai anaa lɛ ye ebua amɛ ni amɛnyɛ amɛkɛ hemɔkɛyeli kɛ tsuishitoo kpee jaramɔ shihilɛ nɛɛ naa. (1 Tesalonikabii 5:15; 1 Petro 3:9) Nyɔŋmɔ tsuji ni yɔɔ ŋmɛnɛ lɛ baanyɛ amɛkase nɔkwɛmɔnɔ kpakpa ni Kristofoi nɛɛ fee lɛ.

 Kwɛmɔ Romabii awolo lɛ hiɛkpamɔ vidio kuku nɛɛ.