Yeremia 1:1-19
1 Yeremia,* ni ji osɔfoi ni yɔɔ Anatot+ yɛ Benyamin shikpɔŋ lɛ nɔ lɛ ateŋ mɔ kome ni atsɛɔ lɛ Hilkia* lɛ binuu lɛ wiemɔi nɛ.
2 Yehowa kɛ mi wie* yɛ Amon+ binuu Yosia,+ Yuda maŋtsɛ lɛ gbii lɛ amli, yɛ Yosia nɔyeli afi ni ji 13 lɛ mli.
3 Ekɛ mi wie ekoŋŋ yɛ Yosia binuu Yehoiakim,+ Yuda maŋtsɛ lɛ gbii lɛ amli kɛyashi Yosia binuu Zedekia,+ Yuda maŋtsɛ lɛ nɔyeli afi ni ji 11 lɛ naagbee, kɛyashi aŋɔ Yerusalembii lɛ nom yɛ nyɔɔŋ ni ji enumɔ lɛ nɔ.+
4 Yehowa kɛɛ mi akɛ:
5 “Mile* bo dani mishɔ̃ bo yɛ onyɛ musuŋ,+Ni mihala bo koni otsu nitsumɔ krɔŋkrɔŋ* dani afɔ bo.*+
Miwó bo gbalɔ mihã jeŋmaji lɛ.”
6 Shi mikɛɛ akɛ: “Ao, Nuŋtsɔ Ofe Yehowa!
Mileee wiemɔ,+ ejaakɛ midako.”*+
7 Kɛkɛ ni Yehowa kɛɛ mi akɛ:
“Kaakɛɛ akɛ: ‘Midako.’*
Shi yaa mɛi fɛɛ ni matsu bo amɛŋɔɔ lɛ aŋɔɔ,Ni nɔ fɛɛ nɔ ni mafã bo akɛ owie lɛ, wiemɔ.+
8 Kaashe amɛhiɛ gbeyei,+Ejaakɛ ‘Mikɛ bo yɛ, ni mahere bo,’+ Yehowa kɛɛ.”
9 Kɛkɛ ni Yehowa kpã enine mli ni eta minaabu he.+ Ni Yehowa kɛɛ mi akɛ: “Mikɛ miwiemɔi lɛ ewo onaa.+
10 Naa, ŋmɛnɛ gbi nɛɛ, mihã bo hegbɛ yɛ jeŋmaji lɛ kɛ maŋtsɛyelii lɛ anɔ,* koni ofamɔ ni okumɔ oshwie shi, koni okpãtã hiɛ ni otsirɛ otswia shi, koni otswa oma shi ni odu.”*+
11 Yehowa kɛɛ mi ekoŋŋ akɛ: “Yeremia, mɛni onaa?” Ni mikɛɛ lɛ akɛ: “Miina almond tso* nine.”
12 Yehowa kɛɛ mi akɛ: “Nɔ ni ona lɛ, nakai ni, ejaakɛ miishi kpe koni matsu miwiemɔ lɛ he nii.”
13 Yehowa kɛɛ mi nɔ ni ji shii enyɔ nɔ akɛ: “Mɛni onaa?” Ni mikɛɛ lɛ akɛ: “Miina kukwɛi ko* ni mli nii miitswa,* ni akpoo naa shi kɛjɛ kooyigbɛ.”
14 Kɛkɛ ni Yehowa kɛɛ mi akɛ:
“Sane fɔŋ ko baajɛ* kooyigbɛ kɛba,Ebaaba shikpɔŋ lɛ nɔ bii lɛ fɛɛ anɔ.+
15 Ejaakɛ ‘Miitsɛ wekui fɛɛ ni yɔɔ kooyigbɛ maŋtsɛyelii lɛ amli lɛ,’ Yehowa kɛɛ,+‘Ni amɛbaaba; amɛteŋ mɔ fɛɛ mɔ kɛ emaŋtsɛ sɛi baabama shiYɛ Yerusalem agbói lɛ anaa,+Amɛbaakumɔ egbogboi ni bɔle ehe kɛkpe lɛ fɛɛNi amɛbaatutua Yuda maji lɛ fɛɛ.+
16 Ni makojo amɛ yɛ amɛnɔfɔŋfeemɔi lɛ fɛɛ ahewɔ,Ejaakɛ amɛje misɛɛ,+Ni amɛmiishã afɔlei ni jeɔ lasu amɛmiihã nyɔŋmɔi krokomɛi+Ni amɛmiikoto amɛ diɛŋtsɛ amɛninenaa nitsumɔi.’+
17 Shi saamɔ ohe oto,*Ni ote shi odamɔ shi ni okɛɛ amɛ nɔ fɛɛ nɔ ni mafã bo lɛ.
Kaahã amɛwo ohe gbeyei,+Kɛjeee nakai lɛ, mahã gbeyei amɔ bo yɛ amɛhiɛ.
18 Ejaakɛ ŋmɛnɛ gbi nɛɛ, mihã otsɔ maŋ ni atswa gbogbo awo he,Dade akulashiŋ, kɛ akɔɔble gbogboi, koni onyɛ odamɔ shikpɔŋ lɛ fɛɛ hiɛ,+Kɛ Yuda maŋtsɛmɛi lɛ kɛ elumɛi lɛ,Kɛ esɔfoi lɛ kɛ eshikpɔŋ lɛ nɔ bii lɛ fɛɛ ahiɛ.+
19 Ni bɔ fɛɛ bɔ ni fee lɛ, amɛkɛ bo baawu,Shi amɛnyɛŋ onɔ kunim amɛye,*Ejaakɛ ‘Mikɛ bo yɛ,’+ Yehowa kɛɛ, ‘ni mahere bo.’”
Shishigbɛ Niŋmaa
^ Eshishi ji, “Yehowa Ji Migbɛfaŋnɔ.”
^ Eeenyɛ efee akɛ, eshishi ji “Yehowa Wóɔ Mɔ Nɔ.”
^ Loo “Yehowa wiemɔ ba miŋɔɔ.”
^ Loo “mikɛ bo to afã.”
^ Hebri sht. ŋm., “dani oje kpo kɛje fɔmɔ kotoku lɛ mli.”
^ Loo “Mihala.”
^ Loo “ejaakɛ gbekɛ nuu kɛkɛ ji mi.”
^ Loo “Gbekɛ nuu kɛkɛ ji mi.”
^ Loo “mikɛ bo eto jeŋmaji lɛ kɛ maŋtsɛyelii lɛ anɔ.”
^ Loo “otɛo.”
^ Hebri sht. ŋm., “mɔ ni miishi kpe.”
^ Loo “kukwɛi ko ni naa lɛɛ.”
^ Hebri sht. ŋm., “aahuu nɔ,” ni tsɔɔ akɛ aahuu eshishi la lɛ.
^ Loo “baafɛ kɛjɛ.”
^ Hebri sht. ŋm., “fĩi ohɛ mli.”
^ Loo “Shi amɛnyɛŋ bo.”
