KƐHÃ WUMƐI KƐ ŊAMƐI
3: Bulɛ
NƆ NI ETSƆƆ
Gbalashihilɛ mli hefatalɔi ni yɔɔ bulɛ kɛhã amɛhe lɛ nuɔ he amɛhãa amɛhe kɛ́ amɛkɛ amɛhe kpãaa gbee yɛ sane ko he po. Wolo ko ni gbɛ́i ji Ten Lessons to Transform Your Marriage lɛ wie akɛ: “Kɛ́ gbalashihilɛ mli hefatalɔi ni yɔɔ bulɛ kɛhã amɛhe lɛ miisusu sane ko he lɛ, amɛkwɛɔ bɔ ni amɛbaafee ni amɛ fɛɛ amɛkpã gbee. Yɛ nɔ najiaŋ ni amɛbaahã sane ko ni amɛkpãaa gbee yɛ he lɛ awo amɛteŋ béi lɛ, amɛsusuɔ naagba lɛ he ni amɛkwɛɔ bɔ ni amɛbaafee amɛtsu he nii. Kɛ́ mɔ kome miitsɔɔ esusumɔ lɛ, mɔ kroko lɛ jɛɔ bulɛ mli eboɔ toi jogbaŋŋ, ni amɛkwɛɔ nɔ ni amɛbaanyɛ amɛfee ni amɛkpã gbee yɛ sane lɛ he.”
BIBLIA MLI SHISHITOO MLA: “Suɔmɔ . . . epeleee ehãaa lɛ pɛ ehe.”—1 Korintobii 13:4, 5.
“Mibuɔ miŋa, no hewɔ lɛ mihãa enaa akɛ mishwɛɛɛ ehe kwraa. Ni misumɔɔɔ mafee nɔ ko ni baahã emiishɛɛ atã loo nɔ ko ni baanyɛ afite wɔgbãla lɛ.”—Micah
NƆ HEWƆ NI EHE HIAA
Kɛ́ mɔ ko ebuuu ehefatalɔ lɛ, ewieɔ ehiɛ, eyeɔ ehe fɛo, ni ejɛɔ lɛ hu. Niiamlitaolɔi komɛi kɛɔ akɛ, kɛ́ gbalashihilɛ mli hefatalɔi feɔ nakai lɛ, ewaaa akɛ amɛbaatse gbãla.
“Kɛ́ wu ko wieɔ wiemɔi ni esaaa eshiɔ eŋa, ejɛɔ lɛ, loo eyeɔ ehe fɛo yɛ gbɛ ni esaaa nɔ lɛ, eŋa lɛ baanu he akɛ ehe bɛ sɛɛnamɔ ni no hãŋ ehe lɛ eye. Ni enɛ baanyɛ afite nyɛgbãla lɛ po.”—Brian.
NƆ NI OBAANYƐ OFEE
OKƐ SAJI NƐƐ APƐI OMLI OKWƐ
Okɛ ojwɛŋmɔ aya sane ni nyɛgbaa kɛ nibii ni nyɛfeɔ lɛ nɔ otsi kome ko okwɛ. No sɛɛ lɛ, bi ohe akɛ:
‘Shii enyiɛ miwie mihefatalɔ lɛ hiɛ, ni shii enyiɛ mijie eyi?’
‘Mɛɛ nibii pɔtɛɛ mifee kɛtsɔɔ mihefatalɔ lɛ akɛ mibuɔ lɛ?’
OKƐ OHEFATALƆ LƐ ASUSU SANEBIMƆI NI NYIƐ SƐƐ NƐƐ AHE
Mɛɛ nifeemɔi kɛ wiemɔi baahã nyɛnu he akɛ nyɛyɛ bulɛ kɛhã nyɛhe?
Mɛɛ wiemɔi kɛ nifeemɔi komɛi tsɔɔ akɛ nyɛbɛ bulɛ kɛhã nyɛhe?
ŊAAWOO
Ŋmalamɔ nibii etɛ ni obaasumɔ ni ohefatalɔ lɛ afee kɛtsɔɔ akɛ ebuɔ bo. Hã ohefatalɔ lɛ hu aŋmala nibii etɛ. Okɛ onɔ lɛ ahã lɛ, ni lɛ hu ekɛ enɔ lɛ ahã bo. Kɛkɛ lɛ, no sɛɛ lɛ nyɛkwɛ bɔ ni nyɛbaafee nyɛtsu nibii nɛɛ ahe nii.
Ŋmalamɔ sui komɛi ni osumɔɔ waa yɛ ohefatalɔ lɛ he. No sɛɛ lɛ, kɛɛmɔ ohefatalɔ lɛ akɛ, onyaa esui nɛɛ ahe waa.
“Mibuɔ miwu waa. No hewɔ lɛ, mikɛ minifeemɔi tsɔɔ akɛ mishwɛɛɛ ehe kwraa, ni mihãa eleɔ akɛ miisumɔ ni ená miishɛɛ. Enɛ biii ni mafee nɔ ko wulu daa gbi dani ena akɛ mibuɔ lɛ. Bei pii po lɛ, nibii bibii ni mifeɔ mihãa lɛ loo nɔ ko fioo ni miwieɔ lɛ hãa enaa akɛ mibuɔ lɛ waa.”—Megan.
No hewɔ lɛ, jeee bɔ ni obaana ohe akɛ bulɛ yɛ ohe loo bulɛ bɛ ohe lɛ ji nɔ ni he hiaa; nɔ ni he hiaa ji ni ohefatalɔ lɛ baanu he akɛ obuɔ lɛ.
BIBLIA MLI SHISHITOO MLA: “Nyɛwoa musuŋtsɔlɛ kpele kɛ mlihilɛ kɛ heshibaa kɛ mlijɔlɛ kɛ tsuishitoo.”—Kolosebii 3:12.
