Hɔgbaa shwane ko lɛ, Yehowa Odasefoi enyɔ komɛi ni yɔɔ maŋ ni ji Curaçao lɛ mli, ni atsɛɔ amɛ Kenneth kɛ Filomena lɛ, tee koni amɛyasara nuu ko kɛ eŋa ni amɛkɛ amɛ kaseɔ Biblia lɛ.

Kenneth wie akɛ: “Be ni wɔshɛ jɛmɛ lɛ, wɔna akɛ aŋmɛ amɛshinaa lɛ mli, ni amɛlɔle lɛ hu bɛ jɛmɛ. Shi minu he akɛ esa akɛ matswa yoo lɛ mobail foŋ lɛ.”

Yoo lɛ wo foŋ lɛ nɔ ni ekɛɛ amɛ akɛ ewu etee nitsumɔ. Shi be ni eyɔse akɛ Kenneth kɛ Filomena ni yɔɔ jɛmɛ lɛ, eje kpo ni ebagbele amɛ.

Be ni Kenneth kɛ Filomena na yoo lɛ nɔŋŋ lɛ, amɛyɔse akɛ efó aahu. Be ni Kenneth bɔi sɔlemɔ koni amɛje Biblia lɛ kasemɔ shishi lɛ, yoo lɛ jwa yaafo ekoŋŋ. No hewɔ lɛ, amɛbi lɛ nɔ ni gbaa enaa.

Yoo lɛ tsɔɔ mli akɛ, ekpɛ eyiŋ akɛ ebaagbe ehe nakai shwane lɛ nɔŋŋ, ni eeŋma yiŋtoo hewɔ ni etaoɔ egbe ehe lɛ efɔ̃ shi ehã ewu lɛ nɔŋŋ kɛkɛ ni Kenneth tswa lɛ lɛ, ni no hã efo sɛɛ. Ehã amɛle akɛ jeŋ shihilɛ eje etsine. No hewɔ lɛ, amɛkɛ lɛ susu ŋmalɛi komɛi ahe kɛshɛje emii. Anɔkwa, nakai miishɛjemɔ wiemɔi lɛ here yoo lɛ yiwala.

Kenneth wie akɛ: “Wɔda Yehowa shi akɛ ehã wɔye wɔbua yoo ni ehao waa nɛɛ, ni titri lɛ akɛ etsirɛ wɔ​—ekolɛ kɛtsɔ ŋwɛibɔfo ko loo emumɔ krɔŋkrɔŋ lɛ nɔ​—ni wɔtswa yoo lɛ!” *

Ani Kenneth kɛ Filomena sane ja akɛ amɛná susumɔ lɛ akɛ Nyɔŋmɔ ji mɔ ni tsɔ ŋwɛibɔfo ko loo emumɔ krɔŋkrɔŋ lɛ, ni ji ehewalɛ ni miitsu nii lɛ, nɔ etsirɛ amɛ koni amɛtswa yoo lɛ? Aloo eji nɔ ko ni ba lɛ heniianaa kɛkɛ?

Wɔnyɛŋ wɔkɛ nɔmimaa awie. Shi nɔ ni wɔle ji, Yehowa tsɔɔ ebɔfoi lɛ anɔ eyeɔ ebuaa mɛi koni amɛle lɛ jogbaŋŋ. Akɛ nɔkwɛmɔnɔ lɛ, Biblia lɛ tsɔɔ akɛ, Nyɔŋmɔ tsɔ ŋwɛibɔfo ko nɔ etsɔɔ Filipo, ni ji Kristofonyo sane kpakpa jajelɔ lɛ gbɛ ni eyaye ebua Etiopia nuu ko ni yɔɔ hegbɛ kpele lɛ koni enu ŋmalɛi lɛ ashishi.​—Bɔfoi 8:26-31.

Jamɔi babaoo tsɔɔ akɛ ŋwɛibɔfoi yɛ. Ni amɛtsɔɔ hu akɛ ekomɛi amli hi waa ni Nyɔŋmɔ tsuɔ amɛ, ni ekomɛi hu tsuɔ nii akɛ mɛi ni buɔ adesai aŋkroaŋkroi ahe. Mɛi komɛi ni heɔ yeɔ akɛ ŋwɛibɔfoi yɛ lɛ heɔ amɛyeɔ hu akɛ ŋwɛibɔfoi lɛ yeɔ amɛbuaa amɛ. Shi mɛi babaoo yɛ ni amɛheee amɛyeee akɛ ŋwɛibɔfoi yɛ.

Ani ŋwɛibɔfoi yɛ? Kɛ́ amɛyɛ lɛ, belɛ nɛgbɛ amɛjɛ? Mɛni ji anɔkwale ni kɔɔ ŋwɛibɔfoi ahe? Ani amɛbaanyɛ amɛye abua bo loo amɛye bo awui? Hã wɔpɛi sanebimɔi nɛɛ amli wɔkwɛ.