Tsɔɔmɔ Obii lɛ Anii

Atsɛ Amɛ “Nugbɔshiimɔ Bii”

KƐ́ NUGBƆ miinɛ waa ni ahum miitswa lɛ, ekolɛ obaanu nugbɔshiimɔ ni naa wa he. Ani eko eha otsui efa pɛŋ?— * Ojogbaŋŋ, Yesu tsɛ esɛɛnyiɛlɔi lɛ ateŋ mɛi enyɔ akɛ “Nugbɔshiimɔ Bii.” Ha wɔkwɛ nɔ hewɔ ni etsɛ amɛ nakai lɛ.

Yesu sɛɛnyiɛlɔi enyɔ nɛɛ ji Yakobo kɛ Yohane. Nyɛmimɛi ji amɛ, ni Zebedeo kɛ eŋa Salome bii ni. Eeenyɛ efee akɛ Yesu mami Maria nyɛmiyoo ji Salome. No hewɔ lɛ, ekolɛ Yesu nyɛkwɛ bii ji Yakobo kɛ Yohane, ni amɛji nanemɛi kɛjɛ amɛgbekɛbiiashi tɔ̃ɔ.

Zebedeo yaa wuo, ni Yakobo kɛ Yohane hu yaa wuo. Mɛi enyɔ nɛɛ fata Yesu klɛŋklɛŋ sɛɛnyiɛlɔi ní ehala amɛ lɛ ahe. Beni etsɛ amɛ lɛ, amɛshi amɛwuoyaa nitsumɔ lɛ amrɔ nɔŋŋ ni amɛnyiɛ esɛɛ. Sɛɛ mli lɛ, Yesu hala esɛɛnyiɛlɔi lɛ ateŋ mɛi 12 akɛ ebɔfoi. Amɛteaŋ mɛi enyɔ ji Yakobo kɛ Yohane.

Beni eshwɛ nyɔji fioo ko ni abaagbe Yesu lɛ, ekɛ ebɔfoi lɛ nyiɛ kɛmiitsɔ gɔji ni yɔɔ Samaria kpokpaa lɛ nɔ lɛ ahe. No mli lɛ je miina, ni etɔ amɛ bliboo. Shi Samariabii lɛ kɛɛ amɛsumɔɔɔ ni Yesu kɛ ebɔfoi lɛ awɔ amɛmaŋ lɛ mli. Ani ole nɔ hewɔ?— Ha wɔkwɛ.

Yesu kɛ ebɔfoi lɛ ji Yudafoi, ni Yudafoi babaoo kɛ Samariabii lɛ yeee. Shi Yesu bɛ nakai kwraa. Ekɛ amɛ yeɔ jogbaŋŋ, ni esa akɛ Yakobo kɛ Yohane hu afee nakai nɔŋŋ. Shi kaselɔi enyɔ nɛɛ amli fu Samariabii lɛ akɛni amɛhereee amɛ hiɛmɛɛ lɛ hewɔ, ni amɛbi Yesu akɛ:  ‘Ani oosumɔ akɛ wɔkɛɛ ni la ajɛ ŋwɛi aba abashã amɛ?’ Mɛni osusuɔ akɛ Yesu kɛɛ?— Ekɛɛ amɛ akɛ esaaa akɛ amɛwieɔ nɔ fɔŋ tamɔ nakai! Esa akɛ Yakobo kɛ Yohane akase bɔ ni ajieɔ mɔbɔnalɛ kpo waa.

Naagba wulu kroko ni Yakobo kɛ Yohane yɔɔ ji akɛ amɛsumɔɔ ni amɛná klɛŋklɛŋ gbɛhe, ni abu amɛ akɛ amɛhe hiaa fe fɛɛ. Beni eshwɛ fioo ni abaagbe Yesu lɛ, amɛtsu amɛmami kɛtee eŋɔɔ, ni eyakɛɛ lɛ akɛ: “Kɛɛmɔ ni mibii enyɔ nɛɛ ateŋ mɔ kome atá oninejurɔ nɔ, ni mɔ kome hu atá obɛku nɔ yɛ omaŋtsɛyeli lɛ mli.” Ojogbaŋŋ, beni bɔfoi nyɔŋma ni eshwɛ lɛ nu nɔ ni Yakobo kɛ Yohane fee lɛ, amɛmli wo la. Eji ofata amɛhe kulɛ, ani bo hu omli baawo la?—

Ekolɛ bo hu omli baawo la. Kɛ́ mɛi miisumɔ ni amɛná klɛŋklɛŋ gbɛhe, ni abu amɛ akɛ amɛhe hiaa fe fɛɛ lɛ, wɔsumɔɔɔ kwraa. Sɛɛ mli lɛ, Yakobo kɛ Yohane na akɛ nɔ ni amɛfee lɛ ejaaa, ni etsɔɔɔ mlihilɛ, no hewɔ lɛ amɛtsake. Amɛbatsɔmɔ bɔfoi ni mli hi, ni yɔɔ suɔmɔ waa. Mɛni wɔbaanyɛ wɔkase kɛjɛ enɛ mli?—

Nɔ kome ni esa akɛ wɔkase yɛ Yesu he ji akɛ, esa akɛ wɔ hu wɔmli ahi aha mɛi krokomɛi. Yesu kɛ mɛi ye jogbaŋŋ, ni hii, yei, kɛ gbekɛbii po fata he. Ani obaabɔ mɔdɛŋ waa be fɛɛ be koni okai nɔkwɛmɔnɔ ní efee lɛ, ní okase lɛ?——w11-E 12/1.

Kanemɔ yɛ obiblia lɛ mli

Marko 3:17

Mateo 27:55, 56; Marko 15:40, 41

Mateo 4:18-22

Yohane 4:4-15, 21-26; Luka 9:51-55

Mateo 20:20-24; Marko 10:35-37, 41

[Shishigbɛ niŋmaa]