Je lɛŋ nɔyelɔi kɛ majimaji ateŋ gbɛjianɔtoi nyɛko amɛkɛ toiŋjɔlɛ aba je lɛ mli. Kɛjɛ Jeŋ Ta II lɛ sɛɛ kɛbaa nɛɛ, ŋmɛnɛ lɛ, tai kɛ béi miiya nɔ waa fe bei fɛɛ ni eho. Mɛi aaafee akpekpe toi akpei enyɔ​—ni ji je lɛ mlijai ejwɛ mli ekome​—​yɛ hei ni tai kɛ bei nɛɛ yaa nɔ yɛ lɛ.

 Mɛni hewɔ adesai nyɛɛɛ amɛkɛ toiŋjɔlɛ aba lɛ? Mɛni Biblia lɛ kɛɔ yɛ he?

1.  1. Mɛi jieɔ sui ni hãaa amɛnyɛ amɛkɛ mɛi ahi shi yɛ toiŋjɔlɛ mli lɛ akpo. Biblia lɛ gba yɛ wɔbei nɛɛ he akɛ, “gbɔmɛi baatsɔmɔ hesuɔlɔi, shikasuɔlɔi, shwãlɔi, henɔwolɔi, . . . mɛi ni yeee anɔkwa, . . . mɛi ni anyɛɛɛ akɛ amɛ afee kpaŋmɔ, . . . mɛi ni nyɛɛɛ amɛhe nɔ amɛye, mɛi ni hiɛ yɔɔ la, . . . kuɛŋtilɔi, mɛi ni naa amɛhe tsɔ.”​—2 Timoteo 3:2-4.

2.  2. Adesa ko loo adesai akuu ko nyɛŋ atsu gbɔmɛi anaagbai ahe nii kɛ́ amɛ-Bɔlɔ lɛ, ni ji Yehowa a Nyɔŋmɔ yeee ebuaaa amɛ. Biblia lɛ hãa wɔnaa akɛ, “bɔ ni gbɔmɔ ni nyiɛ lɛ baakudɔ lɛ diɛŋtsɛ enajifaamɔi ehã po lɛ, ebɛ edɛŋ.”​—Yeremia 10:23.

3.  3. Jeŋ muu lɛ fɛɛ yɛ nɔyelɔ ko ni yitsoŋ wa, ni he wa, ni ji Satan Abonsam lɛ kudɔmɔ shishi, ni lɛ ji “mɔ ni lakaa shikpɔŋ muu lɛ fɛɛ lɛ.” (Kpojiemɔ 12:9) Gbii abɔ ni “jeŋ muu lɛ fɛɛ kã mɔ fɔŋ lɛ hewalɛ mli” nɛɛ, ta kɛ béi baakã he aya nɔ.​—1 Yohane 5:19.

 Biblia lɛ ewo shi akɛ Nyɔŋmɔ kɛ toiŋjɔlɛ baaba, shi jeee kɛtsɔ adesai amɔdɛŋbɔɔ nɔ.

•   “‘Ejaakɛ mi lɛ, mile jwɛŋmɔi ni mijwɛŋɔ yɛ nyɛhe lɛ jogbaŋŋ,’ Yehowa kɛɛ, ‘toiŋjɔlɛ jwɛŋmɔi ni, shi jeee sane fɔŋ, koni ahi ahã nyɛ wɔsɛɛ ni nyɛná hiɛnɔkamɔ.’”​—Yeremia 29:11.

 Mɛni Nyɔŋmɔ baafee kɛtsu shiwoo nɛɛ he nii? ‘Nyɔŋmɔ ni hãa toiŋjɔlɛ lɛ baakpɔtɔ Satan.’ (Romabii 16:20) Nyɔŋmɔ baatsɔ ŋwɛi nɔyeli ko, ni Biblia lɛ tsɛɔ lɛ akɛ “Nyɔŋmɔ Maŋtsɛyeli lɛ” nɔ ehã toiŋjɔlɛ aba jeŋ fɛɛ. (Luka 4:43) Yesu Kristo ji nakai Maŋtsɛyeli lɛ nɔ Maŋtsɛ, ni yɛ enɔyeli lɛ shishi lɛ, abaaye abua mɛi koni amɛkɛ amɛhe ahi shi yɛ toiŋjɔlɛ mli.​—Yesaia 9:6, 7.