Dabi, Yehowa Odasefoi jeee cult ko mli bii. Moŋ lɛ Kristofoi ji wɔ, ni wɔbɔɔ mɔdɛŋ ni wɔkase Yesu, ni wɔhi shi yɛ etsɔɔmɔi lɛ anaa.

 Mɔ fɛɛ mɔ kɛ bɔ ni enuɔ wiemɔ ni ji “cult” lɛ shishi ehãa. Kɛ̃lɛ, kwɛmɔ susumɔi enyɔ ni ehé shi ni mɛi hiɛ yɛ he, ni okwɛ akɛ nakai Yehowa Odasefoi ji lo.

•   Mɛi komɛi kɛɔ akɛ cult ji jamɔ hee loo jamɔ ko ni emli bii ehiii shi yɛ blema tsɔɔmɔi ni yɔɔ lɛ anaa. Yehowa Odasefoi ajamɔ lɛ jeee jamɔ hee ni atse. Dabi kwraa, wɔjáa Nyɔŋmɔ tamɔ bɔ ni blema Kristofoi ni aŋmala amɛnifeemɔi kɛ amɛtsɔɔmɔi yɛ Biblia lɛ mli lɛ já Nyɔŋmɔ lɛ pɛpɛɛpɛ. (2 Timoteo 3:16, 17) Kɛ́ ebalɛ jamɔ gbɛfaŋ lɛ, wɔheɔ wɔyeɔ akɛ, esa akɛ adamɔ Ŋmalɛ Krɔŋkrɔŋ lɛ nɔ akpɛlɛ tsɔɔmɔ ko nɔ, shi jeee nɔ ni mɛi babaoo kpɛlɛɔ nɔ lɛ kɛkɛ.

•   Mɛi komɛi susuɔ akɛ cult ji jamɔ kuu ko ni he yɔɔ oshãra waa ni adesa ko ji ehiɛnyiɛlɔ. Yehowa Odasefoi enaaa gbɔmɔ ko kwraa akɛ amɛhiɛnyiɛlɔ. No najiaŋ lɛ, wɔkɛ nɔ ni Yesu kɛɛ esɛɛnyiɛlɔi lɛ tsuɔ nii; ekɛɛ amɛ akɛ: “Mɔ kome ji nyɛ-Hiɛnyiɛlɔ, Kristo lɛ.”​—⁠Mateo 23:10.

 Yehowa Odasefoi ahe bɛ oshãra kwraa, moŋ lɛ, amɛjamɔ lɛ mli bii lɛ náa amɛjamɔ lɛ he sɛɛ, ni amɛyeɔ amɛbuaa amɛkutsoŋbii lɛ hu. Akɛ nɔkwɛmɔnɔ lɛ, amɛshiɛmɔ nitsumɔ lɛ eye ebua mɛi babaoo ni amɛtsi amɛhe kɛje subaŋi gbohii tamɔ, tsofãi ni akɛtsuɔ nii yɛ gbɛ ejaaa nɔ kɛ dãatɔɔ he. Kɛfata he lɛ, wɔtsɔɔ mɛi nikanemɔ kɛ niŋmaa yɛ jeŋ fɛɛ, ni wɔye wɔbua mɛi akpei abɔ ni amɛle nikanemɔ kɛ niŋmaa. Ni kɛ́ nibii ni mɛi tsɛɔ amɛ adebɔɔ naa oshãrai eko ba he ko lɛ, wɔyayeɔ wɔbuaa. Wɔbɔɔ mɔdɛŋ wɔfeɔ nibii ni baaná mɛi anɔ hewalɛ kpakpa taakɛ Yesu fã esɛɛnyiɛlɔi lɛ akɛ amɛfee lɛ.​—⁠Mateo 5:​13-​16.