Ni kaineti ma te kakaae ae ai tibwa ngkai n taabo aika kakaokoro n te aonnaba, a ao e ribootinaki bwa tao temanna mai buakoia aman aomata aika namakinna bwa a tiku n tii ngaiia.

•    “E kona n reke irouia aomata nako, te anua ae te kani kakaokoroko ao n aki rereitaki ma tabemwaang, n aki ongeia bwa rorora ke a mena ia.”​—Chido Mpemba, te kauoman n tia babaire n te World Health Organization’s Commission on Social Connection.

 Ni kaitaraan are a kona n iangoia aika a bati, a aki tii rotaki n te namakin aei kaara ke naake a kakaokoroia, ma a rotaki naba iai rooro n rikirake, naake a marurung, a kaubwai ao ake iai buuia. E kona te kani kakaokoroko ma tabemwaang ao namakinan ae ko tiku n tii ngkoe, n rota marurungin rabwatan temanna ao marurungin naba ana iango.

•    E taku Dr. Vivek Murthy ae kaain te U.S., ae te mataniwi irouia taani korokoro: “Namakinan ae ko a tiku n tii ngkoe bon tiaki tii te bwai ae aki raoiroi.” E reitia n taku: “E kona naba n ruanikai maiun temanna ngkana e kaokoroa ma tabemwaang ao n tiku n tii ngaia, n aron ruanikain naba te aomata ae momokona 15 te tikareti ni katoabong.”

 E aki tangirira ara tia Karikiriki bwa ti na kaokoroira ma tabemwaang. Ana kantaninga te Atua ibukia aomata bwa e na kakukurei ma n nakoraoi reitakia.

•    Ana boto n reirei te Baibara: “E taku . . . te Atua: ‘E aki raoiroi bwa e na teimatoa n tiku te mwaane . . . n tii ngaia.’ ”​—Karikani Bwaai 2:18.

 E tangirira te Atua bwa ti na karekea reitakira ma ngaia. E berita bwa e na kaanira ngkana ti kataia naba ni kaania.​—Iakobo 4:8.

•    Ana boto n reirei te Baibara: “A a kukurei akana ataia bwa a kainnanoa te Atua, bwa aia bwai te Tautaeka n Uea ae bwaini karawa.”​—Mataio 5:3.

 E tangirira te Atua bwa ti na kaai n taromauria ma tabemwaang. Ngkana ti karaoa aei, ti a buokaki iai bwa ti na namakina te kukurei riki.

•    Ana boto n reirei te Baibara: “Ti na iaiangoira i marenara bwa ti aonga ni kaungaira nakon te tangira ma mwakuri aika raraoi, ao ti na aki kaaki arora ni bobotaki, . . . ma ti na kaungaira i marenara.”​—Ebera 10:​24, 25.

 Ibukin rongorongon riki ae e aera ngkai e kakawaki buakanakin te namakin ae te tiku n tii ngkoe, wareka te kaongora ae “Loneliness in a World of Mass Connection.”