A kakoauaa Ana Tia Kakoaua Iehova ae a kona ni buokira booto n reirei ao tuua aika n te Baibara ni karaoi motinnano aika kakukureia te Atua, ao ni kakabwaiaaki iai. (Itaia 48:​17, 18) Ti aki karioi booto n reirei ma tuua aikai, ma ti boni maiuakini. Ti na iangoi tabeua mai iai ni kaineti ma te iraorao ni karekenano. a

•   Te mare bon te reitaki ae teimatoa. (Mataio 19:⁠6) Ibukina bwa a iangoa te iraorao ni karekenano Ana Tia Kakoaua Iehova bwa te mwaneka nakon te mare, ti taraia raoi bwa e rangi ni kakawaki.

•   Te iraorao ni karekenano bon tii ibukia naake a a ikawai raoi ao n tau nakon te tekateka n taanga. Te koraki akanne ake ‘a a tia ni bwakanako aia bongi n roro n rikirake,’ ke a a bwakanako ma te roro are e korakora iai tangiran te kani wene n taanga.​​—⁠1 I-Korinto 7:​36.

•   A kona ni mare naake a iraorao ni karekenano. Ma iai tabeman ake a eti aia buuraure i aan te tua, ma a aki iangoaki iroun te Atua bwa a inaomata ni manga mare, kioina ngkai n ana kaetieti ao te bwai ae riai iai te buuraure bon te wene ni bure.​​—⁠Mataio 19:⁠9.

•   A riai Kristian ake a a kan iein, n rinea buuia ae raoia n te onimaki. (1 I-Korinto 7:​39) A iangoa te tua aei Ana Tia Kakoaua Iehova, bwa e kaineti nakon te aomata ae maiuakini koaua aikai ao ni bwabetitoaki bwa te tia Kakoaua, ao tiaki te aomata ae e tii karinei ara koaua. (2 I-Korinto 6:​14) E teimatoa te Atua n anga te kaetieti nakoia taan taromauria, bwa a na mare ma tii naake titeboo aia onimaki ma ngaiia. (Karikani Bwaai 24:3; Maraki 2:​11) E manena naba te tua aei n taai aikai, n aron ae a noria taani kakaae ni boong aikai. b

•   A riai ataei n ongeaba irouia aia karo. (Taeka N Rabakau 1:8; I-Korote 3:​20) Ibukia ataei ake a maeka ma aia karo, e nanonaki naba n te tua aei, bwa a na ongeaba n aia babaire aia karo ibukin te iraorao ni karekenano. E kaineti naba aei ma ana ririki te nati are e kona n iraorao ni karekenano iai ao baika e riai ni karaoi.

•   Ni kaineti ma ana kaetieti te Baibara, a boni baireia taani Kakoaua i bon irouia bwa a na iraorao ke a na aki, ao antai ae a na iraorao ni karekenano ma ngaia. E kaineti aei ma te boto n reirei aei: “Ane a na uotii oin uotaia ae tabeia aomata n tatabemania nako.” (I-Karatia 6:​5, kabwarabwara mai nano) Ni kaineti ma te iraorao ni karekenano, a bati ake a wanawana ake a kakaaenako buokaia mairouia taani Kakoaua ake a a ikawai n te onimaki, ake a tangira te kabanea n tamaroa ibukia.​​—⁠Taeka N Rabakau 1:⁠5.

•   A bati mwakuri aika a kakaraoaki aika bure kakaiaki ae riiriki n tain te iraorao ni karekenano. N te katoto, e tua te Baibara bwa ti na rarawa nakon te wene ni bure. E aki tii nanonaki iai te karaobure ma a nanonaki naba mwakuri aika kamwara aika karaoaki irouia aomata aika tuai ni mareaki, n aroni kumekumean ana bwai ni kakariki temanna irouia, ke te oro n te wi, ke te iein n te kurabe. (1 I-Korinto 6:​9-​11) E ngae ngkana e aki karaoaki te wene ni bure, ma karaoani mwakuri aika kauekea tangiran te wene ni bure irouia aomata aika tuai ni mareaki, bon “te kamwara” ao e aki kukurei iai te Atua. (I-Karatia 5:​19-​21) A boni kabuakakaaki n te Baibara taeka aika bubuaka ae reke naba iai “te taetae ae kammaira.”​​—⁠I-Korote 3:⁠8.

•   E kamwamwane te nano, ke te bae memena i nanon te aomata. (Ieremia 17:⁠9) E kona ni kaira temanna bwa e na karaoi bwaai ake e atai bwa a bure. Ibukin totokoani mwamwanaakia n nanoia, a kona taan iraorao ni karekenano n rarawa n tiku n tii ngaiia n taabo ke n taai aika kai reke iai n te kaririaki. A kona ni baireia bwa a na tii memena i buakoia aomata ke e na iai raoia n taai nako. (Taeka N Rabakau 28:26) Kristian aika akea buuia ake a a kan iein, a riai n ataa karuanikain te nako n taabo n iraorao ni karekenano n te intanete, ao riki a na rarawa ni karekenano ma te aomata ae a aki bati ni kinaa.​​—⁠Taian Areru 26:⁠4.