A waakina kairan reirei n te Baibara Ana Tia Kakoaua Iehova aika kaekaaki iai titiraki aika bati n ikotaki ma aikai:

• Antai te Atua?

• E mutiakinai raoi te Atua?

• N na kangaa ni kanakoraoa au mare?

• N na kangaa ni karekea te kukurei n te maiu aei?

Ko kona n nori i nano kaekaan titiraki aika tatabekaki ni kaineti ma aroni kairan te reirei n te Baibara iroura.

Tera aroni kairan te reirei n te Baibara? Ti rinei atu n reirei n aron “te Atua” ke “te mare” ao ti neneri kiibu n te Baibara aika irekereke ma atu n reirei akanne. Ni kabotauaia, ti a nora iai te bae e taekinna te Baibara ibukin te atu n reirei teuana, ao ni karaoan aei ti a kariaria iai te Baibara bwa e na boni kabwarabwara kanoana.

Ibukini buokara n reiakina te Baibara, ti kabongana te boki ae Tera Reireiara Man te Baibara? E kabwarabwaraaki raoi n te boki aei atu n reirei aika bati, te bae taekinna raoi te Baibara ibukin te Atua, Iesu, ao ara tai aika imwaira.

Iraua boon te reirei n te Baibara? Akea boon te reirei, ao a aki kabooaki naba booki ibukin te reirei.

Maanra kairan te reirei? A bati aomata aika kamwaawa teuana te aoa ke e nako riki, ni katoa wiki ibukin reiakinan te Baibara ma ngaira. Ma e kona ni bibitaki maanin te reirei n te Baibara. Ti kona ni kaangaraoia ma am babaire.

Tera ae e na riki ngkana I bubutii bwa N na reirei n te Baibara? Ngkana ko bubutii te reirei n te Baibara, e na kawariko temanna Ana Tia Kakoaua Iehova n te tai ao n te tabo ae e angaraoi iroum. E na kabanea tabeua te miniti ni kabwarabwaraa nakoim aroni kairan te reirei. Ngkana ko tangiria, ko kona n reitaanako te reirei.

Ngkana I butimwaea te reirei, I a riki naba iai bwa Ana Tia Kakoaua Iehova? Ko aki. A tangiria Ana Tia Kakoaua Iehova n reirei ma aomata taekan te Baibara, ma ti aki kairoroa te aomata bwa e na riki bwa kaain ara Aro. Ma ti tii kaota kanoan te Baibara nakoina ma te karinerine, bwa ti ataia ae iai inaomatan temanna ma temanna n rinea te bae e na kakoauaa.​—1 Betero 3:15.