ƝAAKWƐLƐI 9
Pɛlɛn ɲii lɛlɛɛ a hɔlɔɓo ləi ?
1. Ya kɛ ə́ pɛlɛn ɲii lɛlɛɛ hɔlɔɓo, ho kɛli ka húlu lɔ. Lə mɛni ɓa ?
Zehova kaa a Yálá yii gwəinɛɛ. Ya ɓə nwɛlɛɛ lɛlɛɛɠaa ŋɛi da həɠə ɲəi. Gaa bɔ, pɛlɛn nua di kɛ kwəinɛɛ hu (Timɔtə dɔlɔɔ 1:11). Ya ɓə húlu lɔ mɛni tɔlɔɔ hee gbanŋa. Maanɛɛ guɔ húlu lɔ nwun namənaa ɲɛi ɓa, maahɔlɔɓo, yili a pa a woo mɛn pɛlɛn, ə lɛɛ lon gaa nua diɛ pɛli di lonnii hutɔɔi kwəinɛɛ hu, da wɛlikɛmaa. Maanɛɛ kilistalea di di wɔ lɔi hu tɔnŋaa maawiɛ yɛ hwilɛn na húlu lɔ mɛni ɓa.—Lukə 2:1, 4, 5 ɓo.
Húlu lɔ mɛni kaa ləi Yálá ɲɛi ɓa ? Yálá kaa bɔ, hulɔnu da nɛɛnu da húlu lɔ, di ho kea taɠa. Zehova kaa bɔ, nua da húlu lɔ, di lɛɛ a di təlimoɔ di kee ɓa (Hebulu 13:4). Húlu taɠa mɛni wɛlikpɛɛ Zehova ɓa (Malaki 2:16, TMN). Kɛlɛɛ, Zehova ɲɛi ɓa, kilistalon a pɛli húlu taɠai, akɛ nɛa aa wɛli hon, awala kɛtii, ɉilɛ aa wɛli hon.—Matie 19:3-6, 9 ɓo.
2. Hulɔnu da nɛa di maanɛɛ di túwɔ́ ləi a di kee ?
Zehova ə nɛɛnu da hulɔnu di pɛli, ə gɛ diɛ kpɔnmaa tɛɛ di keeni pɔ di wɔ húlu yii ɓoɔ hu (Zənɛsə 2:18, TMN). Hulɔnu ɓə gaa a pɛlɛ namu, ya ɓə maanɛɛ yɛ ɲee bɛlɛn nua maakpaan gbɛɛ mɛni kəlee hu, ə lɛɛ yɛ di kalan Yálá lawoo ɓa. Maanɛɛ ə nɛa wɛlilakɛ kpɔ kɛnɛ. Maanɛɛ hulɔnu da nɛa di di kee wɛlilakɛ, ə lɛɛ diɛ di kee maawiɛ. Yii nɛŋɛn gaa nu kəlee ɓa, ho kɛli hulɔnu da nɛa diɛ di keeni maahwaalɛɛ, ə gɛ di kwəinɛɛ hɔlɔɓo di wɔ húlu lɔɔ hu.—Efɛsə 4:31, 32 ; 5:22-25, 33 ; Piɛli dɔlɔɔ 3:7 ɓo.
3. Woo mɛn awala kɛ pɛlɛn : Nɛnu maanɛɛ ə kilɛ ? Hulɔnu maanɛɛ ə maakwea nɛa ɓa ?
Mɛni a too ka lowai, maanɛɛ ka lɛɛ lɔ ma kaa ka kee hon a nɛlɛɛ wɛlikɛmaa laa hu (Kɔlɛntə dɔlɔɔ 13:4, 5). Mɛni a too pɛlɛn, mo pələ hwaa, hulɔnu da nɛa di di maakwea di kee ɓa. Yálá lawoo a mo yɛ, maa ho nɛɛli hulɔnu da nɛa di ho di kee lɛɛ.—Malikə 10:9 ɓo.
4. Leapɛlɛɛ, lə ɓə Yálá kaa bɔ ka maa mɛni ɓa ?
Zehova kaa bɔ ka kɛ kwəinɛɛ hu. A liɛwooɠaa tɛɛ ka pɔ, ə gɛ ka túwɔ́ a nɛlɛɛ ka wɔ muhəɠə ninɛ laa hu. Zehova kaa nwɔnɔ bɔ, leapɛlɛɛ di lɛɛ di kaanua woo mu (Kɔlɔsə 3:20). Gaa bɔ ka kɛi da non Zesu di liiɓa kɛ, ka kwəi yɛ nɛɛ.—Kilimaa mun 11:9—12:1 ; Matie 19:13-15 ; 21:15, 16 ɓo.
5. Lon gaa nua, ka tɛɛ ləi ka lonnii di kwəinɛɛ hɔlɔɓo ?
Maanɛɛ ka wala, ka ka lonnii kɔnɔn gɛ, ka di yii pɛlɛ mɛni ɲɛi kulɔ, ka di maahəɠəɠaa ya (Timɔtə dɔlɔɔ 5:8). Maanɛɛ nwɔnɔ ka di maakwɛli Yálá kɔlɔnŋaa ɓa, da Yálá wɛlilakɛɛ, ə gɛ di kwəinɛɛ hɔlɔɓo (Efɛsə 6:4). Ka kɛi Yálá wɛlilakɛ a ka túwɔ́ pələ, ka lonnii da pɛli di ka pɔɔ kɔɔn. Ka kɛi hiɛ a Yálá lawoo, yili a pɛli di wɔ kiliŋahiɛ maahwalən ɉii a nɛlɛɛ.—Detelonɔmə 6:4-7, TMN ; Haŋɔn 22:6, TMN ɓo.
Ka kɛi leapɛlɛɛ mamaɓo, kaa di tɛnɛ, yili a di holoonaɓo. Maanɛɛ ka tuwɔ pələ ɲɔn gulɔ di yee pɔ, ə lɛɛ ka di hutɔɔ. Yili a gɛ, di wɔ kwəinɛɛ ə lɛɛ di yəi (Haŋɔn 22:15, TMN). Hutɔɔ maa ho nɛɛli ho wala-wala ho tɛɛ ɲɛn ɉu. Maa ho nwɔnɔ nɛɛli ho kɛ a ɲɛni mɛni.—Kɔlɔsə 3:21 ɓo.
Zehova ŋɔ Kəlaɠaa da hɛɓɛ tamaa pɛɛn, kpɔnmaa tɛɛ mɛni ɓa, lon gaa nua da di lonnii di pɔ. Ɉɛɓɛɠaa tii hu woo a həɠə Biblə hu.—Somə 19:7, 11, TMN ɓo.
You May Also Like
KA PƐLI KƐI KWƏINƐƐ HU KA YƏI BƐLƐN
Ka tinɛn Yálá pɔ pələ, kwəinɛɛ hɔlɔɓo mɛni ɓa ka wɔ húlu yii ɓoɔ hu
Gɛɛmaalən hweelɛi tii da pɛli kpɔnmaa tɛɛi ka pɔ ka wɔ húlu yii lɛlɛ yee ta ə pɛlɛ ma.
KA PƐLI KƐI KWƏINƐƐ HU KA YƏI BƐLƐN
Mɛni a too ka lowai pələi maanɛɛ ka mo la
Hulɔnu da nɛa di wɔ pɛlɛ ɲaa a nɛɛ, awala kɛtii maa a wɛli, a kulɔ lɔ di maa mɛniɠaa ɓo pələ hu.
