Ñandejára hína entéro mbaʼe Apohare. Haʼe oexisti vaʼekue ymaite guive ha siémpre oexistíta (Salmo 90:2). Haʼe ningo ñanderayhueterei upévare omeʼẽ ñandéve umi notísia porã jatopáva la Bíbliape (1 Timoteo 1:11). Ñandejára omeʼẽ ñandéve la vída, upévare ñande jaadora vaʼerã chupe añoite.​—Elee Apocalipsis 4:11.

Ndaipóri avave ohechámava Ñandejárape, pórke haʼe peteĩ espíritu ha ndoguerekói peteĩ kuérpo ñande jaguerekoháicha (Juan 1:18; 4:24). Upéicharõ jepe, ñamañáramo umi mbaʼe haʼe okrea vaʼekuére ikatu jaikuaa mbaʼépa haʼe opensa ha oñandu. Por ehémplo, umi frúta ha yvoty ohechauka Ñandejára ñanderayhuha ha iñaranduha, pe univérso, pe yvága, ko yvy ha umi estrellakuérare jahechakuaa ipoderosoitereiha.​—Elee Romanos 1:20.

Ikatu avei jaikuaa mbaʼeichagua persónapa Ñandejára jaleéramo la Biblia. Por ehémplo, upépe jatopa mbaʼépa ogusta ha ndogustái chupe, mbaʼéichapa haʼe otrata umi héntepe, ha mbaʼéichapa haʼe oñeñandu umi hénte ojapo jave iporãva térã ivaíva.​—Elee Salmo 103:7-10.

Jesús heʼi vaʼekue: “Ore Ru reiméva yvágape, toñembotuicha nde réra” (Mateo 6:9). Heta hénte oipuru rangue héra heʼi chupe Señór térã Ñandejára, péro umíva ningo título reínte, haʼe oreko héra tee. Guaraníme normálmente oñepronunsia “Jehová”, péro oĩ avei opronunsiáva “Yavé”.​—Elee Salmo 83:18 (82:19 ótra Biblia españólpe).

Heta Bíbliagui ojepeʼa Ñandejára réra ha oñemoĩ título reínte, por ehémplo Tupã, Ñande Ruete, Ñandejára térã  Señór. Péro la Biblia ojeskrivírõ guare, Ñandejára réra oĩ vaʼekue 7.000 véserupi. Jesús oikuaauka vaʼekue Ñandejára réra omboʼérõ guare umi héntepe.​—Elee Juan 17:26.

Ehecha pe vidéo ¿Mbaʼéichapa héra Ñandejára?

Koʼág̃arupi oĩ heta hénte osufríva, ¿heʼisépa upéva Ñandejára ndojepyʼapyiha ñanderehe? Oĩ hénte heʼíva Ñandejára ombouha ñandéve umi sufrimiénto ñandeprova hag̃ua, péro upéva japu.​—Elee Santiago 1:13.

Ñandejára ningo opermiti ñande jadesidi umi mbaʼe jajapótava, upéicha ohechauka ñandevaloraha. Ajépa jaagradese pe liverta jarekóva jadesidi hag̃ua jaservi Ñandejárape (Josué 24:15). Péro heta odesidi ojapo ivaíva hapicháre ha upévare heta hénte osufri. Jehová oñeñandu vaieterei ohechávo umi inhustísia.​—Elee Génesis 6:5, 6.

Jehová ningo ojepyʼapy ñanderehe ha oipota javyʼa. Koʼẽrõite haʼe oipeʼáta umi sufrimiénto ha ohundíta umi hénte ombosufrívape hapichápe. Ñahaʼarõ aja upéva, haʼe opermiti gueteri oĩ sufrimiénto, ha pe leksión 8-pe jahecháta mbaʼérepa.​—Elee 2 Pedro 2:9 ha 3:7, 13.

Jehová ñaneinvita ñañemoag̃ui hag̃ua hese pe orasión rupive. Haʼe oñeinteresa káda únore (Salmo 65:2; 145:18). Ñandejára oĩ ñaneperdona hag̃uáicha, ha ohechakuaa jafalláramo jepe ñañehaʼãmbaiteha jajapo haʼe oipotáva. Ñaneimperféktoramo jepe ikatu jareko peteĩ amista hendive.​—Elee Salmo 103:12-14 ha Santiago 4:8.

Ñandejára omeʼẽ ñandéve la vída, upévare jahayhuve vaʼerã chupe opa mbaʼégui (Marcos 12:30). Jahechauka jahayhuha chupe ñaaprendévo chugui ha ñaneñeʼẽrendúvo. Péicha ñañemoag̃uivéta hese.​—Elee 1 Timoteo 2:4 ha 1 Juan 5:3.