Epensamína mbaʼéichapa vaʼerãmoʼã ndaipóririre pe kuarahy. Pe kuarahy ningo omeʼẽ pe enerhía umi yvyramátape ikatu hag̃uáicha ipoty, hiʼa ha oprodusi umi semílla. Avei, pe kuarahy rupive umi yvyramáta ikatu oipyte pe y oikotevẽva pe yvýgui, ha upéi upéva oho jey pe atmósferape oiko rire chugui vapór.

Pe ama ningo peteĩ rregálo iporãitereíva oúva Ñandejáragui, ha upéicha rupi pe yvy oprodusi opa mbaʼe ñaikotevẽva jaʼu hag̃ua. Ñandejára oprepara pe ama ha umi diferénte estasión ikatu hag̃uáicha osẽ porã umi plantasión, ha péicha jaguereko umi aliménto ojapo porãva ñanderehe ha ñanembovyʼáva.

Umi tuakuéra ningo ojepyʼapyeterei jepi omeʼẽ hag̃ua ifamíliape pe tembiʼu ha ao oikotevẽva. Péro ehechamína mbaʼépa heʼi Ñandejára Ñeʼẽ ko témare: “Pemaña porãmína umi guyra ovevévare pe yvágare. Haʼekuéra noñemitỹi, nomonoʼõi ha nombyatýi hembiʼurã galpónpe, péro pende Ru oĩva yvágape omongaru chupekuéra. ¿Ndapevalevéi piko peẽ chuguikuéra?” (Mateo 6:25, 26).

“Pemañamíntena umi lírio oĩvare pe ñúre, [...] che haʼe peẽme, ni Salomón haʼéramo guare pe rréi iplatavéva, noñemondéi vaʼekue haʼekuéraicha. Ñandejára péicha omonde porãramo umi yvoty okakuaávape pe ñúre [...] koʼytevéntema haʼe [omeʼẽta] peẽme pende aorã” (Mateo 6:28, 30).

Ñandejára ikatu omeʼẽ ñandéve umi tembiʼu ha ao ñaikotevẽva, upéicha avei ikatu ñaĩ segúro omeʼẽtaha umi ótra kósa ñaikotevẽva jaikove hag̃ua. Por ehémplo, ñañehaʼãmbaitéramo jajapo umi mbaʼe haʼe ohaʼarõva ñandehegui, katuete ñanevendesíta jatopa hag̃ua peteĩ traváho jajogua hag̃ua umi tembiʼu térã umi ao ñaikotevẽva (Mateo 6:32, 33).

Añetehápe, ikatu ñaime segúro Ñandejára ñanderayhuetereiha. Upévare omeʼẽ ñandéve pe kuarahy, ama, umi guyraʼi ha yvotykuéra. Péro jahechamína koʼág̃a mbaʼéichapa ñande Apohare oñekomunika yvyporakuérandi.