“Rehecha vove umi iñañávape oho porãitereiha, ha ñanáicha hetaveha ohóvo hikuái, upéva heʼise oñehundi potaitemaha pára siémpre” (SALMO 92:7).

Jahecháma haguéicha pe ótro artíkulope, amás día ivaive ohóvo la situasión. Péro upéva nañanesorprendéi vaʼerã, pórke 2 Timoteo 3:1-5-pe ojepredesi vaʼekue voi “umi ára pahápe” la hénte iñañaitereitaha. ¿Mbaʼépa heʼise jaikoha umi ára pahápe? Heʼise koʼẽrõitéma Ñandejára ohunditaha umi iñañávape ha naiñeʼẽrenduséivape chupe. Upe rire ko yvy ape ári opytáta sólamente umi hénte ivuénova ha iñeʼẽrendúva Ñandejárape. “Umi hembiapo porãvape oñemeʼẽta ko yvy, ha oikóta pype opa ára g̃uarã” (Salmo 37:29).

Koʼẽrõite Ñandejára ombochipéta Satanáspe (ROMANOS 16:20).

Ndaiporivéi vove umi hénte aña, Satanás ni idemoniokuéra, hasypeve ikatúta ojeiko pyʼaguapýpe ko yvy tuichakuére. Ñande Apohare opromete voi entéro ivuénovape: ‘Avave napenemongyhyjemoʼãi’ (Miqueas 4:4).

“Ñandejára omokãmbaitéta umi hénte resay, ha ndaiporimoʼãvéima omanóva, oñelamentáva, hasẽva ni hasýva” (APOCALIPSIS 21:4).

Ñandejára osolusionáta umi mbaʼe vai oikóva Satanás, Adán ha Eva káusare. Avei osolusionáta umi provléma jarekóva ñaneimperfékto rupi. Upévare opáta umi sufrimiénto, mbaʼasy ha ndaiporimoʼãvéima ni omanóva jepe. Umi ohayhúva ha iñeʼẽrendúva ñande Apoharépe oikovéta opa ára g̃uarã. Péro, ¿moõpa oikóta hikuái?

“Pe ñu ha pe yvy isékova ovyʼáta, pe desiérto ovyʼaitereíta, henyhẽta yvoty porã porãgui” (ISAÍAS 35:1).

Ñandejára ohundi rire umi iñañávape, ¡oikóta ko yvýgui peteĩ paraíso! Opárupi oĩta umi párke ha hardín porã porã. Ko yvy oprodusi porãitereíta ha hembypáta la ojeʼu vaʼerã (Salmo 72:16). Umi mar, lágo ha rrío ipotĩ jeýta. Ha heta oĩta pype umi pira ha entéro mbaʼe Ñandejára ojapo vaʼekue oiko hag̃ua ýpe. Entéro ikatúta ojapo hogarã ha oiko pype. Núnka mas ndaiporimoʼãvéima umi ndahógaiva, iñembyahýiva, térã imboriahúva (Isaías 65:21, 22).

‘Oñemoingove jeýta’ umi omano vaʼekuépe (HECHOS 24:15).

¿Ndépa rehechase oñemoingove jeývo umi rehayhúva omano vaʼekuépe? Ñandejára Todopoderóso omborresusitáta chupekuéra peteĩ paraísope ko yvy ape ári. ¡Eñeimahinamína mbaʼeichaitépa revyʼáta rehechávo pe persóna rehayhúvape ha errekonoséma voi chupe ensegída ha haʼe avei ndéve! Péro, ¿mbaʼérepa ikatu ñaime segúro oñekumplitaha ko promésa? Pórke la Biblia omombeʼu ñandéve Ñandejára orresusitáma hague voi unos kuánto omano vaʼekuépe oĩ jey hag̃ua ihentekuérandi, umíva apytépe kakuaa ha mitã jepe. Ha la majoría umi kásope oĩ vaʼekue heta ohecháva Jesús omborresusitárõ guare chupekuéra (Lucas 8:49-56; Juan 11:11-14, 38-44).