Si, ore testígo de Jehová ningo roguerovia opa mbaʼe oĩva la Bíbliape ojehai hague ‘[Ñandejára] espíritu rupive ha ideprovechoha’ (2 Timoteo 3:​16). Upéva heʼise pe Antiguo Testamento ha Nuevo Testamento haʼeha Ñandejára Ñeʼẽ. Ore rohenói pe Antiguo Testaméntope Evréo Kuatiañeʼẽ, ani hag̃ua oñepensa umi mbaʼe oĩva upépe itujaitereimaha ha ndaideprovechoveimaha. Ha pe Nuevo Testaméntope katu rohenói Griégo Kuatiañeʼẽ.

 Ñandejára ogia apóstol Páblope oskrivi hag̃ua kóicha: “Opa mbaʼe ojehai vaʼekue yma Ñandejára Ñeʼẽme, ojehai ñanerekomboʼe hag̃ua” (Romanos 15:4). Jaʼekuaa upéicharõ pe Antiguo Testamento orekoha heta informasión iñimportánteva ikatúva ñanepytyvõ. Por ehémplo, omeʼẽ heta konsého ha omombeʼu umi istória tuichaiterei ñanemokyreʼỹtava.

•   Umi istória. Evréo Kuatiañeʼẽme oñemombeʼu ñandéve mbaʼéichapa Ñandejára oprepara vaʼekue ko yvy ha mbaʼéicha rupípa yvyporakuéra opyta pekádo poguýpe. Ko mbaʼe ñanepytyvõ jaikuaa hag̃ua moõguipa jaju ha mbaʼérepa ñamano (Génesis 2:7, 17). Avei ko pártepe oñemombeʼu Ñandejára oipytyvõ hague heta tapicha ohasávape umi situasión ijetuʼúva, ñande jahasáva avei koʼág̃a (Santiago 5:​17).

•   Umi konsého. Evréo Kuatiañeʼẽme jatopa lívro de Proverbios ha Eclesiastés, oĩháme hetaiterei konsého ikatúva ñanepytyvõ koʼág̃a. Por ehémplo, ohechauka ñandéve mbaʼéichapa ikatu javyʼa ñane famíliandi (Proverbios 15:17), mbaʼérepa jahecha vaʼerã hekópe porã ñande traváho (Proverbios 10:4; Eclesiastés 4:6), ha avei mbaʼéichapa ikatu jaipuru porã ñande rekove ñanemitã aja (Eclesiastés 11:9–​12:1).

 Tuichaiterei avei ñanepytyvõta jastudiáramo umi Léi oñemeʼẽ vaʼekue Moisés rupive, oĩva Génesis guive Deuteronomio peve. Natekotevẽiramo jepe ñakumplipaite umi Léi heʼihaichaite, tuicha ñanepytyvõta javyʼa hag̃ua jasegíramo umi konsého oĩva umívape (Levítico 19:18; Deuteronomio 6:​5-7).