Nɛreba dekɛ la Yezu Krista pa’alegɔ pɔsɛ “Kristakɔma” pu’usegɔ to’ore to’ore. Ge Baabule la pa’alɛ ti yelemɛŋɛrɛ Kristakɔma pu’usegɔ ayina ma’a n boi. Geele yɛla atã n basɛ ti to baŋɛ bala bisɛ.

1.   Yezu yuun yeti, eŋa pa’ali la “yelemɛŋɛrɛ la” ge ti daami Kristakɔma la me yuun yi’ira ba pu’usegɔ la ti “yelemɛŋɛrɛ la.” (Yon 8:​32; 2 Peter 2:2; 2 Yon 4; 3 Yon 3) Yele ana wa pa’alɛ ti nɛresɛba pa’alegɔ n ka makɛ la Yezu pa’alegɔ la daɣɛ yelemɛŋɛrɛ Kristakɔma.

2.   Baabule la pa’alɛ ti la nari ti Kristakɔma za’a ‘tara nɔyinɛ la taaba.’ (1 Korint 1:​10) Ge Kristakɔma pu’usegɔ zo’e zo’e pa’alegɔ yɛla ka makɛ la taaba hali la yelepiɣesi n de wuu mina n nari ti a dɛna Kristabia. Pu’usegɔ ana wa za’a kan ta’an dɛna yelemɛŋɛrɛ.​—1 Peter 2:​21.

3.   Yezu yuun tɔɣɛ biŋe ti nɛreba zo’e zo’e wan yeti bamam dela Kristakɔma ge ba kan nana en. A me wan zaɣese ba. (Matu 7:​21-​23; Luke 6:​46) Pu’usegɔ nɛŋadoma n sa’am yelemɛŋɛrɛ pu’usegɔ ti ba ta’an nyɛ nyuurɔ bo bamea la pã’aseri la nɛreba. (Matu 7:​15) Ge nɛreba basɛba wan bɔta la pɔmpɔriŋɔ pu’usegɔ se’ere n sɔi la bilam ti ba wan wona ba boti sɛla ge daɣɛ Baabule yelemɛŋɛrɛ la.​—2 Timoti 4:​3, 4.

 Yezu makerɛ la n tɔɣeri ki la mɔɔ yele la, a yuun yeti nɛreba zo’e zo’e wan yelege bamesi yelemɛŋɛrɛ Kristakɔma pu’usegɔ poan. (Matu 13:24-​30, 36-​43) Yuuma zo’e zo’e poan, nɛreba kan baŋɛ yelemɛŋɛrɛ Kristakɔma la pumpɔriŋɔ Kristakɔma n boi tɔka tɔka se’em. Wuu Yezu n yuun yele se’em la, tuuntuneba la kum pooren ti yelege n meadoma la yuun pɔsɛ zɔ’ɔra. (Tooma 20:29, 30) La boi bim ti yelege n meadoma pa’alegɔ boi la to’ore to’ore ge pumpɔriŋɔ Kristakɔma pu’usegɔ za’a “ka pa’ale nɛreba Yenɛ yetɔgom sebo n de yelemɛŋɛrɛ la.”​—2 Timoti 2:​18.

 Yezu yuun le yeti, nɛreba wan ta baŋɛ pumpɔriŋɔ Kristakɔma la yelemɛŋɛrɛ Kristakɔma n boi tɔka tɔka se’em. Wana wa tum tuuma mɛ tomam saŋa wan n de “teŋa wa zan’an ba’ahegɔ poan” la.​—Matu 13:30, 39.